លោកឯកអគ្គរដ្ឋទូត Darmosumarto ប្រគល់សម្ភារៈជូននាយកសាលាក្នុងពិធីសម្ពោធដាក់ឲ្យប្រើប្រាស់ សាលាបឋមសិក្សា និងអនុវិទ្យាល័យមិត្តភាពឥណ្ឌូណេស៊ី-កម្ពុជា ក្នុងខេត្តព្រៃវែង ជាថ្មី កាលពីនៅថ្ងៃទី៦ ខែកក្កដា ឆ្នាំ២០២៤ ។ រូបថត សហការី
ព្រៃវែង៖ សាលាបឋមសិក្សា និងអនុវិទ្យាល័យមិត្តភាពឥណ្ឌូណេស៊ី-កម្ពុជា ក្នុងខេត្តព្រៃវែង ត្រូវបានរៀបចំកែលម្អឡើងវិញអំឡុងកិច្ចសហប្រតិបត្តិការអន្តរជាតិ និងស្មារតីសហគមន៍រវាងកម្ពុជា និងឥណ្ឌូនេស៊ី។
ព្រឹត្តិការណ៍ដ៏សំខាន់នេះបានកើតឡើងនៅថ្ងៃទី៦ ខែកក្កដា ឆ្នាំ២០២៤ ស្របពេលជាមួយនឹងខួបលើកទី៦៥ នៃទំនាក់ទំនងការទូតទ្វេភាគីរវាងប្រជាជាតិទាំងពីរ និងខួបលើកទី៧៩ នៃឯករាជ្យរបស់ប្រទេសឥណ្ឌូនេស៊ី។
ឥស្សរជនសំខាន់ៗបានចូលរួមអបអរសាទរក្នុងពិធីសម្ពោធដាក់ការកែលម្អសាលារៀនជាថ្មី រួមមាន លោក Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក សួន សុម៉ាលីន អភិបាលខេត្តព្រៃវែង និងលោកស្រី ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា។
ម្ចាស់ជំនួយមកពីសហគមន៍ឥណ្ឌូណេស៊ី និងអ្នកតំណាងធុរកិច្ចឥណ្ឌូណេស៊ីដែលកំពុងប្រតិបត្តិការក្នុងប្រទេសកម្ពុជាក៏មានការចូលរួមផងដែរ។
លោកឯកអគ្គរដ្ឋទូត Darmosumarto បានថ្លែងថា៖ «កិច្ចខិតខំប្រឹងប្រែងរួមគ្នារបស់សហគមន៍ឥណ្ឌូនេស៊ី គឺជាសក្ខីភាពមួយចំពោះទំនាក់ទំនងមិត្តភាពយូរអង្វែងរវាងឥណ្ឌូនេស៊ី និងកម្ពុជា»។
សាលានេះត្រូវបានសាងសង់ឡើងដំបូងក្នុងឆ្នាំ១៩៩៥ ជាមួយនឹងមូលនិធិពីរដ្ឋាភិបាលឥណ្ឌូនេស៊ី បម្រើសិស្សជាង ៧៩០ នាក់ចាប់ពីថ្នាក់មត្តេយ្យដល់កម្រិតមធ្យមសិក្សា។
គម្រោងជួសជុលនេះ មានថវិកាលើសពី ៣៤០០០ ដុល្លារអាមេរិក រួមមានការផ្គត់ផ្គង់សម្ភារៈសិក្សាថ្មី ឧបករណ៍មន្ទីរពិសោធន៍ គ្រឿងសង្ហារឹម បន្ទប់ទឹក កន្លែងអានសៀវភៅ និងទ្វារសាលាថ្មី។
ការកែលម្អចំពោះសាលារៀនចាស់នេះត្រូវបានធ្វើឡើងតាមរយៈការបរិច្ចាគដ៏សប្បុរសពីបុគ្គលិកស្ថានទូត និងសហគមន៍ឥណ្ឌូនេស៊ីនៅកម្ពុជា ដែលមានចំនួនជិត ១០ ម៉ឺននាក់។
លោក Arik Mintorogo ប្រធានសមាគមសហគមន៍ឥណ្ឌូណេស៊ីនៅកម្ពុជាបានសម្តែងមោទនភាពក្នុងការចូលរួមក្នុងគម្រោងដ៏មានអត្ថន័យនេះ។
លោកបានកត់សម្គាល់ថា៖ «ការធ្វើឱ្យប្រសើរឡើងនូវសាលារៀននេះមិនត្រឹមតែផ្តល់នូវកន្លែងអប់រំកាន់តែដ៏ល្អសម្រាប់សិស្សប៉ុណ្ណោះទេ ប៉ុន្តែថែមទាំងពង្រឹងចំណងមិត្តភាពរវាងសហគមន៍ឥណ្ឌូនេស៊ី និងម្ចាស់ផ្ទះដែលមានចិត្តល្អក្នុងតំបន់របស់យើង»។
យោងតាមលោក Darmosumarto បានឱ្យដឹងថា ស្ថានទូតឥណ្ឌូនេស៊ីប្រចាំនៅរាជធានីភ្នំពេញ និងសហគមន៍ឥណ្ឌូនេស៊ីប្រចាំនៅកម្ពុជា នៅតែប្តេជ្ញាចិត្តក្នុងការជួយដល់តម្រូវការអប់រំរបស់សិស្សានុសិស្សនៅសាលាបឋមសិក្សា និងអនុវិទ្យាល័យមិត្តភាពឥណ្ឌូនេស៊ី-កម្ពុជា។
លោកឯកអគ្គរដ្ឋទូតបញ្ជាក់ថា៖ «និស្សិតទាំងនេះគឺជាអនាគតនៃកិច្ចសហប្រតិបត្តិការឥណ្ឌូនេស៊ី-កម្ពុជា»។
ការរស់ឡើងវិញនៃសាលានេះគឺជាការគោរពដ៏សមរម្យមួយចំពោះទំនាក់ទំនងការទូតដ៏យូរអង្វែងរវាងប្រទេសទាំងពីរដែលត្រូវបានបង្កើតឡើងជាផ្លូវការក្នុងឆ្នាំ១៩៥៩ ជាមួយការចុះហត្ថលេខាលើសន្ធិសញ្ញាមិត្តភាព។
ខណៈដែលប្រទេសឥណ្ឌូនេស៊ីរៀបចំប្រារព្ធទិវាបុណ្យឯករាជ្យជាតិលើកទី៧៩ របស់ខ្លួននៅថ្ងៃទី១៧ ខែសីហា ខាងមុខ ព្រឹត្តិការណ៍នេះបង្ហាញពីចំណងមិត្តភាពយូរអង្វែង និងការគាំទ្រគ្នាទៅវិញទៅមក ដែលជាលក្ខណៈនៃទំនាក់ទំនងរវាងឥណ្ឌូនេស៊ី និងកម្ពុជា៕
