ព្រះករុណា ព្រះបាទសម្តេច ព្រះបរមនាថ នរោត្តម សីហមុនី យាងដាំដើមឈើ ក្នុងព្រះរាជពិធីបុណ្យរុក្ខទិវា ៩ កក្កដា នៅស្ថានីយផ្សព្វផ្សាយ និង ស្ដារព្រៃឈើបន្ទាយអង្គរ ភូមិខ្នា ឃុំលាយបូរ ស្រុកត្រាំកក់។ រូបថត Royal du Cambodge
តាកែវៈ ព្រះមហាក្សត្រមានព្រះរាជបន្ទូលថា ការដាំដើមឈើ មានផលប្រយោជន៍ធំធេងណាស់សម្រាប់ប្រទេសជាតិ ដែលធ្វើឱ្យមានគម្របបៃតងលើធម្មជាតិ ហើយមានអត្ថប្រយោជន៍សម្រាប់មនុស្សជាតិទាំងអស់គ្នា និងសត្វគ្រប់ប្រភេទនៅលើភពផែនដី។
ព្រះករុណា ព្រះបាទសម្តេច ព្រះបរមនាថ នរោត្តម សីហមុនី មានព្រះរាជបន្ទូលនេះនៅពេលយាងធ្វើជាព្រះរាជាធិបតីប្រារព្ឋព្រះរាជពិធីបុណ្យរុក្ខទិវា ៩ កក្កដា នៅស្ថានីយផ្សព្វផ្សាយ និង ស្ដារព្រៃឈើបន្ទាយអង្គរ ភូមិខ្នា ឃុំលាយបូរ ស្រុកត្រាំកក់ ដែលដើមឈើសរុប ៣ ពាន់ដើម ត្រូវបានដាំនៅលើផ្ទៃដី ៣ហិកតា។ ពិធីនេះមានការចូលរួមពីថ្នាក់ដឹកនាំគ្រប់ជាន់ថ្នាក់ផងដែរ។
ទិវារុក្ខទិវា ៩ កក្កដា ត្រូវបានផ្តួចផ្តើមរៀបចំឡើងដោយព្រះករុណាព្រះមហាវីរក្សត្រ ព្រះបរមរតនកោដចាប់ទាំងពីសម័យសង្គមរាស្រ្តនិយមមក ហើយព្រះអង្គតែងតែយាង ជាព្រះរាជធិបតីក្នុងពិធីនេះជារៀងរាល់ឆ្នាំនៅតាមបណ្តាខេត្តនានា ដើម្បីបំផុសនិងលើកទឹកចិត្តឱ្យប្រជាពលរដ្ឋរបស់ព្រះអង្គ ចូលរួមថែរក្សាការពារ ព្រៃឈើ និងដាំដើមឈើនៅទូទាំងប្រទេស។
ព្រះអង្គមានព្រះរាជបន្ទូលថា៖ «រុក្ខទិវាជាវប្បធម៌ដ៏ប្រសើរ ដែលព្រះថេរាថេរៈគ្រប់ព្រះអង្គ អាជ្ញាធរជាតិគ្រប់ថ្នាក់ និងបងប្អូនជនរួមជាតិ ទាំងអស់នៅទូទាំងប្រទេស បានចូលរួមដាំដើមឈើ ដោយមានទស្សនៈរួមគឺ ការចូលរួមដាំដើមឈើ និងការពារព្រៃឈើគឺជាការជួយខ្លួនឯង ទាំងជីវភាពរស់នៅប្រចាំថ្ងៃទាំងសុវត្ថិភាព ពីគ្រោះធម្មជាតិ ទាំងក្តីសង្ឃឹម សម្រាប់កូនចៅជំនាន់ក្រោយរបស់យើង»។
ព្រះអង្គក៏បានថ្លែងអំណរគុណដល់ប្រទេសជាមិត្តដែលបានចូលរួមគាំទ្រ ដល់ការងារដាំដើមឈើ និង ការថែរក្សា ការពារធនធានព្រៃឈើ សត្វព្រៃ និងបានអំពាវនាវឱ្យបន្តសកម្មភាពនេះបន្តទៀត ដើម្បីជួយគាំទ្រកិច្ចខិតខំ ប្រឹងប្រែងរបស់រាជរដ្ឋាភិបាលកម្ពុជា និងដើម្បីជាប្រយោជន៍ដល់ពិភពលោកទាំងមូល។
ព្រះអង្គបានឧទ្ធិសឱ្យពិធីរុក្ខទិវានេះ «ស្ថិតក្នុងបេះដូងរបស់ប្រជាជនកម្ពុជាគ្រប់ៗរូប និងក្លាយជាប្រពៃណីនៃការរួមសាមគ្គីគ្នា ដាំដើមឈើគ្រប់ប្រភេទ និងការថែរក្សាការពារ និងអភិវឌ្ឍន៍ធនធានព្រៃឈើ និង សត្វព្រៃដែលមរតជាតិរបស់យើងឱ្យបានគង់វង្សរហូតតទៅ»។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ដាំដើមឈើក្នុងព្រះរាជពិធីបុណ្យរុក្ខទិវា ៩ កក្កដា នៅស្ថានីយផ្សព្វផ្សាយ និង ស្ដារព្រៃឈើបន្ទាយអង្គរ ភូមិខ្នា ឃុំលាយបូរ ស្រុកត្រាំកក់។ រូបថត ក្រសួងកសិកម្ម
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ថ្លែងក្នុងពិធីនោះថា ទិវា រុក្ខទិវា លើកទី ២៩ ដែលកំពុងតែប្រារព្ឋនៅពេលនោះ មានកូនឈើធ្នង់ ក្រញូង និងក្ងោក សរុប ៣ពាន់ដើម ត្រូវបានដាំ លើផ្ទៃដី ៣ហិកតា។ ដោយឡែក ក្នុងឆ្នាំ២០២៤នេះ រដ្ឋបាលព្រៃឈើ នៃក្រសួងកសិកម្ម ទើបតែបានបញ្ចប់ការដាំកូនឈើចម្រុះចំនួន១៦ ៥០០ដើមនៅលើផ្ទៃដីទំហំ ១០ហិកតាផ្សេងទៀត នៅស្ថានីយផ្សព្វផ្សាយ និងស្ដារព្រៃឈើសុក្រំ ក្នុងឃុំសំរោង ស្រុកភ្នំក្រវាញ ខេត្តពោធិ៍សាត់។
លោកបានបន្តថា គិតត្រឹមឆ្នាំ ២០៤នេះ ពិធីប្រារព្ឋទិវា រុក្ខទិវាបានបង្កើតជាសួនរុក្ខទិវាសរុប ៤៧៥ ហិកតានៅតាមបណ្តារាជធានីខេត្តចំនួន១៤ ហើយព្រឹត្តិការរុក្ខទិវា ក៏បានបង្កើតជាចលនាស្រលាញ់ព្រៃឈើ និងដាំកូនឈើជាច្រើនផ្សេងទៀតទូទាំងប្រទេស ដែលបានបង្កើតជាចំការឈើជាង ៨ម៉ឺនហិកតា និងសួនសាធារណៈ ឬឯកជនជាច្រើនទៀត នៅតាមសាលារៀន វត្តអារាម រមណីដ្ឋាន និងសួនឯកជន។ ជាងនេះទៀត រដ្ឋបាលព្រៃឈើក៏បានបណ្តុះកូនឈើបានជាង ២០,៥លានដើមផងដែរតាមរយៈថវិការដ្ឋគិតត្រឹមឆ្នាំ ២០២៤នេះ។
លោករដ្ឋមន្រ្តីបានបញ្ជាក់ថា៖«ជាមួយនឹងសមត្ថភាពបណ្តុះកូនឈើ និងដាំឈើ យើងបានចែកជូនប្រជាពលរដ្ឋ ចំនួនជាង ៥០ម៉ឺនដើមក្នុង១ឆ្នាំ ខណៈដែលកូនឈើច្រើនលានដើមទៀតត្រូវបានបណ្តុះនិងដាំ ដោយប្រជាពលរដ្ឋជាលក្ខណៈឯកជនដោយមិនរាប់បញ្ជូលឈើហូបផ្លែ ឬដំណំាឧស្សាហកម្មផ្សេងទៀតឡើយ»។
លោករដ្ឋមន្រ្តីក៏បានថ្លែងផងដែរថា ពាក់ព័ន្ធនិងការអភិរក្ស និងអភិវឌ្ឍធនធាតិព្រៃឈើ ក្រសួងកសិកម្ម បាននឹងកំពុង តែអនុវត្តយុទ្ធសាស្រ្ត និងសកម្មភាព ជាច្រើនដូចជា ការជំរុញការចុះបញ្ជីដីរដ្ឋ និង ការពង្រឹងការគ្រប់គ្រងដីរដ្ឋឱ្យកាន់តែមានប្រសិទ្ធភាព ជាពិសេស គឺការគ្រប់គ្រងដីព្រៃ ដីសហគមន៍ព្រៃឈើ និងដីស្ថានីយ៍ស្តារដាំឈើ។ ក្រៅពីនោះ មានការដោះស្រាយតម្រូវការឈើប្រើប្រាស់ក្នុងស្រុកតាមរយៈការជំរុញឱ្យមានឧស្សាហកម្មដាំឈើ និងការលើកទឹកចិត្តឱ្យប្រជាពលរដ្ឋ ចូលរួមដាំដើមឈើ ដើម្បីប្រើប្រាស់ និងកាត់បន្ថយសម្ពោធទៅលើ ធនធានធម្មជាតិ។ លើសពីនោះ ក្រសួងបង្កើនការដាំកូនឈើ ដើម្បីគាំទ្រសកម្មភាពដាំឈើទូទាំងប្រទេស ហើយនឹងពង្រឹងទប់ស្កាត់ បង្ក្រាបបទល្មើសធនធានធម្មជាតិ តាមរយៈកិច្ចសហប្រតិបត្តិការយ៉ាងជិតស្និតជាមួយនឹងគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិនិងរដ្ឋបាលថ្នាក់ក្រោមជាតិ។
មន្ទីរបរិស្ថានខេត្តកំពង់ស្ពឺត្រៀមកូនឈើរួចរាល់ ដើម្បីដាក់បង្ហាញ និងចែកជូនដោយឥតគិតថ្លៃ ក្នុងកម្មវិធីតាំងពិព័រណ៍ផ្សព្វផ្សាយ និងចែកកូនឈើនាថ្ងៃទី១០-១២ ខែកក្កដានៅទីស្តីការក្រសួងបរិស្ថាន។ រូបថត ក្រសួងបរិស្ថាន
ទាក់ទងនឹងការដាំដើមឈើនេះដែរ ក្រសួងបរិស្ថាននឹងរៀបចំពិព័រណ៍ផ្សព្វផ្សាយនិងចែកកូនឈើ ក្រោមមូលបទ «ពន្លកបៃតង» និងវេទិកាកេសរកូលជាតិលើកទី៤ ចាប់ពីថ្ងៃទី១០ ដល់ថ្ងៃទី១៦ ខែកក្កដានេះនៅទីស្តីការក្រសួងបរិស្ថាន និងនៅតាមមន្ទីរបរិស្ថានរាជធានី-ខេត្តផងដែរ។
រដ្ឋមន្រ្តីក្រសួងបរិស្ថាន លោក អ៊ាង សុផល្លែត មានប្រសាសន៍ថា៖«ពន្លកបៃតង គឺជាការបណ្តុះនូវផ្នត់គំនិត នូវភាពបៃតងសម្រាប់កម្ពុជា ព្រមទាំងបណ្តុះស្មារតីនិងផ្នត់គំនិត ដល់សាធារណជនគ្រប់មជ្ឈដ្ឋាន ឱ្យស្រលាញ់ភាពបៃតង និងស្រឡាញ់ដើមឈើ»។
ពិព័រណ៍ «ពន្លកបៃតង» រៀបចំឡើងដោយមានការតាំងបង្ហាញ និងចែកកូនឈើប្រមាណជាង ១លានដើមជូន ពលរដ្ឋយកទៅដាំដុះនៅតាមគេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានាដោយឥតគិតថ្លៃ។ ពិព័រណ៍នេះក៏ដើម្បីផ្សព្វផ្សាយលើកកម្ពស់ការយល់ដឹង ស្តីពីការដាំឈើឱ្យបានច្រើន ដើម្បីបង្កើនគម្របបៃតងនៅកម្ពុជា និងជំរុញការចូលរួមអភិរក្សជីវៈចម្រុះពីគ្រប់ភាគីពាក់ព័ន្ធ ស្របនឹងយុទ្ធសាស្ត្រចក្រាវិស័យបរិស្ថាន ដែលបានដាក់ចេញជាបន្តបន្ទាប់ និងជាជំហានៗ ផ្តោតលើមុំយុទ្ធសាស្រ្តចំនួន ៣គឺ ស្អាត បៃតង និងចីរភាព៕
