ស្នងការដ្ឋាននគរបាលខេត្តបាត់ដំបងបានធ្វើការឃាត់ខ្លួនជនសង្ស័យម្នាក់ និង រឹបអូសគ្រឿងញៀន ប្រភេទ មេតំហ្វេតាម៉ីនយ៉ាម៉ា WY សរុបចំនួន ១៥ ៩៦៥គ្រាប់ ដែលស្មើនិងទម្ងន់ ១៥៧១,៦៩ក្រាម។ រូបថត ស្នងការដ្ឋាននគរបាលខេត្តបាត់ដំបង
ភ្នំពេញ/បាត់ដំបងៈ តុលាការខេត្តបាត់ដំបងកំពុងតែធ្វើការសួរនាំជនសង្ស័យម្នាក់ ពាក់ព័ន្ធទៅនឹងថ្នាំញៀនជាង ១ម៉ឺនគ្រាប់ ខណៈនគរបាលរាជធានីភ្នំពេញកំពុងសាកសួរជនបរទេសជាច្រើននាក់ក្រោយពីឆ្មក់ចូលបង្រ្កាបក្លិបកម្សាន្តមួយឈ្មោះ GT នាថ្ងៃទី១០ ខែសីហានេះ។
ក្នុងប្រតិបត្តិការស្រាវជ្រាវ និងបង្រ្កាបគ្រឿងញៀនដ៏ធំមួយរយៈពេល ៣ថ្ងៃ ស្នងការដ្ឋាននគរបាលខេត្តបាត់ដំបងបានធ្វើការឃាត់ខ្លួនជនសង្ស័យម្នាក់ និង រឹបអូសគ្រឿងញៀន ប្រភេទ មេតំហ្វេតាម៉ីនយ៉ាម៉ា WY សរុបចំនួន ១៥ ៩៦៥គ្រាប់ ដែលស្មើនិងទម្ងន់ ១៥៧១,៦៩ក្រាម។ នេះបើយោងតាមលោកវរសេនីយ៍ឯក អ៊ិម កុសល ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តបាត់ដំបង នាថ្ងៃទី១២ ខែសីហានេះ។
លោកបានឱ្យដឹងថា ក្នុងដំណាក់កាលទីមួយ នៅពីយប់ថ្ងៃទី៧ ខែសីហានេះ សមត្ថកិច្ចបានបង្ក្រាបករណីរក្សាទុក ដឹកជញ្ជូន ឬ ជួញដូរដោយខុសច្បាប់នូវសារធាតុញៀន ១ករណី ក្នុងបទល្មើសជាក់ស្ដែងនៅក្នុងភូមិអូរតាគាំ១ សង្កាត់ទួលតាឯក ក្រុងបាត់ដំបង។ នគរបាលបានឃាត់ខ្លួនជនសង្ស័យជាបុរសម្នាក់ឈ្មោះ ឈួម សុខវណ្នី ហៅឃ្លោក អាយុ ៣៧ឆ្នាំ រស់នៅក្នុងឃុំជ្រៃ ស្រុកថ្មគោល ខេត្តបាត់ដំបង។ ក្នុងនោះបានរកឃើញ និងរឹបអូសបានថ្នាំញៀនប្រភេទមេតំហ្វេតាមីនយ៉ាម៉ា WY ចំនួន ១៩៧៤គ្រាប់ អាវុធខ្លី១ដើម និងសម្ភារៈពាក់ព័ន្ធមួយចំនួនទៀត។
ក្រោយមក សមត្ថកិច្ចបានបន្តធ្វើការស្រាវជ្រាវ និងដកហូតបានថ្នាំញៀនប្រភេទ មេតំហ្វេតាមីនយ៉ាម៉ា WY ចំនួន ១៣ ៩៩១គ្រាប់បន្ថែមទៀត។
លោកបញ្ជាក់ថា៖ «សរុបប្រតិបត្តិការទាំង ២នេះ សមត្ថកិច្ចនគរបាលបានធ្វើការដកហូតនូវថ្នាំញៀន ប្រភេទមេតំហ្វេតាមីនយ៉ាម៉ា WY ១៥ ៩៦៥គ្រាប់ ស្មើនឹងទម្ងន់១ ៥៧១,៦៩ក្រាម។ សមត្ថកិច្ចនឹងធ្វើការស្រាវជ្រាវបន្តទៀត ចំពោះមុខសញ្ញាដែលពាក់ព័ន្ធក្នុងករណីនេះ»។
ជនសង្ស័យ និងវត្ថុតាងត្រូវបានបញ្ជូនទៅតុលាការដើម្បីចាត់ការបន្តនាថ្ងៃទី១០ ខែសីហា ហើយតុលាការខេត្តកំពុងតែបន្តការសាកសួរជនសង្ស័យរូបនេះបន្ថែមទៀត។
លោកថ្លែងថា៖ «ជនសង្ស័យនៅក្នុងនិតីវិធីរបស់អយ្យការ មិនទាន់ទៅដល់ចៅក្រមស៊ើបសួរទេ។ សំណុំរឿងហ្នឹងពាក់ព័ន្ធនឹងការដឹកជញ្ជូន និងការចែកចាយគ្រឿងញៀន។ នៅបាត់ដំបងយូរៗទើបមានករណីធំបែបហ្នឹង ក្រៅពីហ្នឹងមានករណីតូចតាចទេ»។
ក្រោយពីលោកឧបនាយករដ្ឋមន្រ្តី ស សុខា បានណែនាំឱ្យស្នងការដ្ឋាននគរបាលទូទាំងប្រទេសរៀបចំផែនការក្នុង១សប្តាហ៍ ដើម្បីបោសសម្អាតបទល្មើសគ្រឿងញៀននៅតាមក្លិបកំម្សាន្ត និង ខារ៉ាអូខេនានាកាលពីចុងខែកក្កដាកន្លងមក នគរបាលរាជធានីខេត្តបាននឹងកំពុងតែចុះត្រួតពិនិត្យនៅតាមក្លិបកំម្សាន្ត និង ខារ៉ាអូខេជាបន្តបន្ទាប់។
លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបានដឹកនាំកម្លាំងនគរបាលឆ្មក់ចូលក្លិបកម្សាន្តឈ្មោះ GT ដោយបានធ្វើការឃាត់ជនបរទេសជាច្រើននាក់យកទៅសួរនាំ ក្រោមការសង្ស័យពាក់ព័ន្ធនឹងបទល្មើសគ្រឿងញៀននាថ្ងៃទី១០ ខែសីហានេះ ក្រោយពីបានធ្វើការស៊ើបអង្កេតឃើញមុខសញ្ញារួចមក។
លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញបានឱ្យដឹងថា សមត្ថកិច្ចនៅមិនទាន់បញ្ចប់ការសាកសួរជនជាតិវៀតណាម និងជនជាតិចិនទាំងនោះនៅឡើយទេ។ លោកក៏មិនទាន់អាចបញ្ជាក់បា្រប់ពីចំនួនអ្នកដែលត្រូវបានឃាត់ខ្លួនយកទៅសួរនាំនោះដែរ។
លោកថ្លែងថា៖ «ចាំសរុបឱ្យជាក់លាក់សិនរឿងហ្នឹង ឱ្យចប់សព្វគ្រប់សិន ឥឡូវយើងមិនទាន់ធ្វើចប់ទេ។ នៅមានការបកប្រែសួរនាំជនបរទេសវៀតណាម និង ចិនហ្នឹង»។
លោកឧត្តមសេនីយ៍ឯក ជួន ណារិន្ទ បានថ្លែងដោយខ្លីតាមវីដេអូដែលត្រូវបានចែកចាយតាមបណ្តាញសង្គមក្នុងពេលចុះប្រតិបត្តិការនោះថា ករណីនេះមានការពាក់ព័ន្ធនឹងការចែកចាយ និងប្រើប្រាស់គ្រឿងញៀន។
លោកមានប្រសាសន៍ថា៖ «មានការកំណត់មុខសញ្ញារួចហើយ មុននឹងធ្វើ ព្រោះជំនាញគេធ្វើការងារ មិនមែនធ្វើដោយចៃដន្យទេ។ យើងអត់ទាន់ដឹងថា មាន [ថ្នាំញៀន] ទម្ងន់ប៉ុន្មានទេ តែគ្រាន់តែថាមានប្រើប្រាស់ថ្នាំនៅក្នុងនេះ។ ខ្ញុំពិនិត្យមើលមិញនេះ វាជាប្រភេទ K កេតាមីន»។
កម្លាំងនគរបាលក្នុងខេត្តបាត់ដំបងក៏បានឆ្មក់បង្រ្កាបឃាត់ខ្លួននៅទីតាំងខារ៉ាអូខេមួយកន្លែងផងដែរក្នុងស្ថិតក្នុងភូមិដូង ឃុំបឹងរាំងស្រុកកំរៀង កាលពីពេលថ្មីៗនេះផងដែរ។ ក្នុងនោះបានធ្វើការឃាត់ខ្លួនមនុស្សចំនួន ១៧នាក់ និងថ្នាំញៀនមួយចំនួនផងដែរ។
សមត្ថកិច្ចតាមបណ្តាខេត្តផ្សេងៗក៏បានកំពុងតែចុះស្រាវជ្រាវ និងបង្រ្កាបបទល្មើសគ្រឿងញៀននៅតាមទីតាំងកម្សាន្តផ្សេងៗទៀតផងដែរ៕
