![](https://pppkhmer.sgp1.digitaloceanspaces.com/image/main/20248/13_8_2024_bad_student_in_kampong_chhnang.jpg)
កំពង់ឆ្នាំង៖ កុមារាដែលបង្ហាញអប្បកិរិយាបែបហិង្សា និងព្រងើនជាមួយគ្រូបង្រៀន រួមទាំងអាណាព្យាបាល ត្រូវបានអាជ្ញាធរកោះហៅមកធ្វើកិច្ចសន្យាបញ្ឈប់ទង្វើអសីលធម៌នៅក្នុងថ្នាក់រៀននេះ។
យោងតាមលិខិតរបស់លោក ម៉ាញ ណៃ ប្រធានការិយាល័យអប់រំស្រុកជលគីរី ដែលផ្ញើជូនលោកអភិបាលស្រុកជលគិរីអំពីហេតុការណ៍កុមារាម្នាក់បង្ហាញអប្បកិរិយាមិនសមរម្យដាក់គ្រូបង្រៀន បានបង្ហាញថា កុមារារូបនេះរៀនថ្នាក់ទី ៦។
សិស្សរូបនេះ បានប្រើអាកប្បកិរិយាបែបហិង្សាមកលើគ្រូបង្រៀនក្នុងបន្ទប់រៀន ដោយរត់មកធាក់តុគ្រូ និងសម្តែងចរិកចង់វាយគ្រូ។ ហេតុការណ៍នេះកើតឡើងនាពេលរសៀលថ្ងៃទី ១២ ខែសីហា ឆ្នាំ២០២៤។
ឪពុកម្ដាយរបស់កុមារារូបនេះ ដែលរស់នៅក្នុងភូមិថ្មី ឃុំ កំពង់អុស ស្រុកជលគិរី ខេត្តកំពង់ឆ្នាំង ត្រូវបានអាជ្ញាធរហៅមកធ្វើកិច្ចសន្យា និងឱ្យសិស្សសុំទោសគ្រូបង្រៀន។
លោក ម៉ៅ ច័ន្ទរក្សា ដែលបានបង្ហោះវីដេអូឃ្លីបលើបណ្ដាញសង្គម TikTok និងត្រូវបានចែកចាយបន្ដលើ Facebook បានឱ្យដឹងថា៖ «ឥឡូវនេះ រឿងរ៉ាវត្រូវបានដោះស្រាយដោយកូនសិស្ស និងឪពុកម្ដាយត្រូវបានសមត្ថកិច្ចហៅមកធ្វើកិច្ចសន្យា ហើយបានឱ្យខ្ញុំលប់វីដេអូលើបណ្ដាញសង្គមចោលវិញ»៕