ស្រែប្រាំងរបស់ប្រជាកសិករក្នុងស្រុកជើងព្រៃកំពុងខ្វះទឹកស្រោចស្រពស្រូវប្រាំង។ រូបថតរដ្ឋបាលខេត្តកំពង់ចាម
កំពង់ចាម/កំពង់ធំៈ ស្រូវប្រាំងពលរដ្ឋជាង ៣០០ហិកតានៅក្នុងស្រុក ជើងព្រៃ និង ស្រុកបាធាយបាននឹងកំពុងតែរងផលប៉ះពាល់ពីកូនរដូវប្រាំង ខណៈពេលជំនន់ទឹកភ្លៀងក្នុងខេត្តកំពង់ធំ កំពុងតែស្រកចុះ ដែលជួយកាត់បន្ថយការខូចខាត។
យ៉ាងហោចណាស់ស្រូវប្រាំងប្រហែលជា ៤០ហិកតា ក្នុងចំណោម ៣២៧ហិកតានៅក្នុងឃុំចំនួន ៤ នៃស្រុកជើងព្រៃបានខូចខាត ដោយសារតែខ្វះខាតទឹកនៅក្នុងរដូវវស្សានេះ។ ឃុំទាំង ៤ នោះរួមមាន ឃុំត្រពាំងគរ ឃុំស្តើងជ័យ ឃុំសំពងជ័យ និងឃុំព្រីងជ្រុំ។ នេះបើយោងតាមរដ្ឋបាលខេត្តកំពង់ចាម។
រដ្ឋបាលខេត្តបានបញ្ជាក់ថា៖ «ស្រូវពលរដ្ឋជាង ៣០០ហិកតា ក្នុងចំនួនឃុំ ៤ កំពុងជួបកូនរដូវប្រាំង និង មានការខ្វះទឹកស្រោចស្រពស្រូវប្រាំង ដោយសារប្រភពទឹកមានទីតាំងនៅឆ្ងាយពីតំបន់នេះ»។
អភិបាលខេត្តកំពង់ចាម លោក អ៊ុន ចាន់ដា បានដឹកនាំក្រុមការងារចុះទៅពិនិត្យនិងរកដំណោះស្រាយបញ្ហាកង្វះទឹកស្រោចស្រពស្រែប្រាំងនេះ កាលពីថ្ងៃទី១៣ ខែសីហានេះ។
ដើម្បីសម្រួលផ្លូវទឹកហូរទៅដល់តំបន់ឃុំទាំង ៤ នោះ ឱ្យប្រជាពលរដ្ឋបានទឹកប្រើប្រាស់ លោកអភិបាលខេត្តបានសម្រេច បើកប្រភពទឹកចេញពីតំបន់ទឹកឆា ក្នុងស្រុកព្រៃឈរ និងបានធ្វើការស្ដារប្រឡាយចាស់ៗផងដែរ។
លើសពីនោះ ចំពោះតំបន់ដែលមានស្រូវខូចខាត អាជ្ញាធរខេត្តបានត្រៀមស្រូវពូជ សម្រាប់ផ្ដល់ជូនប្រជាពលរដ្ឋធ្វើការដាំដុះឡើងវិញផងដែរ។
ក្រៅពីស្រុកជើងព្រៃនេះ ស្រូវប្រាំងមួយចំនួនក្នុងស្រុកបាធាយក៏កំពុងតែជួបប្រទះបញ្ហាខ្វះខាតទឹកនេះផងដែរ។
លោក ផេន សុផល អភិបាលស្រុក បាធាយ បានឱ្យដឹងថា ស្រូវប្រាំងជាង ៥ពាន់ហិកតា ត្រូវបានពលរដ្ឋធ្វើការដាំដុះ។ ក្នុងនោះស្រូវប្រហែលជា ១ពាន់ហិកតាកំពុងតែរងផលប៉ះពាល់ពីការខ្វះខាតទឹកនេះ។
លោកបញ្ជាក់ថា៖ «ស្រូវប៉ះពាល់ហ្នឹងមិនទាន់ខូចខាតទេ ហើយថ្ងៃនេះ មានភ្លៀងធ្លាក់ខ្លះ។ តែបើអត់ភ្លៀងពី ១អាទិត្យទៅ១០ថ្ងៃទៀតអាចនឹងខូចហើយ»។
លោកក៏បានឱ្យដឹងផងដែរថា លោកអភិបាលខេត្តក៏បានធ្វើការណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម និងមន្ទីរធនធានទឹក និង ឧតុនិយមសហការគ្នាធ្វើការបូមទឹកសង្គ្រោះស្រូវប្រាំងទាំងនោះហើយ។
លោក ស៊ឹម ថាវីរ: ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាមជាប់ប្រជុំមិនអាចធ្វើអត្ថាធិប្បាយបានទេនាថ្ងៃទី១៤ ខែសីហានេះ។
ដោយឡែកចំពោះ ខេត្តកំពង់ធំ ដែលរងគ្រោះធ្ងន់ធ្ងរជាងគេពីជំនន់ទឹកភ្លៀងនាពេលថ្មីៗនេះ មានស្ថានភាពប្រសើរឡើងហើយ ក្រោយពីទឹកបានស្រក។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបានឱ្យដឹងថា ជំនន់ទឹកភ្លៀងបានកំពុងតែស្រកចុះ ក្រោយពីភ្លៀងបានឈប់ធ្លាក់ប្រមាណជា ៥ថ្ងៃមកហើយ។ ទោះយ៉ាងណា ជំនន់ទឹកភ្លៀងនាពេលថ្មីៗនេះ បានបង្កឱ្យមានការខូចខាតដល់ស្រូវប្រមាណជា ៤ ៥០០ហិកា ក្នុងចំណោមស្រូវដែលប៉ះពាល់ជាង ៧ពាន់ហិកតា។
លោកបញ្ជាក់ថា៖ «ទឹកចាប់ផ្តើមស្រកចង់ប្រាំថ្ងៃហើយ។ ស្រូវលិចពីមុនមក ដែលលិចយូរខូចហើយ។ រហូតដល់ថ្ងៃនេះ តួលេខស្រូវដែលខូចហ្នឹងប្រហែលជាង ៤៥០០ហិកតា។ ភាគច្រើនជាងគេនៅស្រុក កំពង់ស្វាយ។ តែស្រូវដែលគ្រាន់តែប៉ះពាល់អាចសង្រ្គោះបាន»។
លោកថ្លែងបន្តដូច្នេះថា៖ «នៅខេត្តកំពង់ចាម ខូចស្រែប្រាំងមួយចំនួន វាអត់មានទឹក តែនៅកំពង់ធំវាលើសទឹកវិញ។ ការប្រែប្រួលអាកាសធាតុវាអញ្ជឹង»៕
