អនុប្រធានមន្ទីរកសិកម្មខេត្តបាត់ដំបង លោក អ៊ិន សុវណ្ណមុន្នី ដឹកនាំក្រុមការងារចុះត្រួតពិនិត្សសត្វល្អិតលើដំណាំស្រូវ នៅស្រុកបវេល ខេត្តបាត់ដំបងកាលពីម្សិលមិញ។ រូបថត ក្រសួងកសិកម្ម
បាត់ដំបងៈ កសិករក្នុងខេត្តបាត់ដំបងត្រូវបានណែនាំឱ្យកាត់បន្ថយការប្រើប្រាស់ថ្នាំពុលគីមីបាញ់កម្ចាត់សត្វមមាចនៅពេលស្រូវជិតប្រមូលផល ដោយសារតែវាធ្វើឱ្យប៉ះពាល់ដល់គុណភាពស្រូវ សុខភាពសាធារណៈ និងការនាំចេញទៅកាន់ទីផ្សារអន្តរជាតិផងដែរ។
ការណែនាំនេះត្រូវបានធ្វើឡើង ក្រោយពេលដែលអនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង លោក អ៊ិន សុវណ្ណមុន្នី និងក្រុមការងារបានចុះត្រួតពិនិត្យបញ្ហាសត្វល្អិតបំផ្លាញដំណាំស្រូវ ក្នុងឃុំបវេល ស្រុកបវេល។
លោក សុវណ្ណមុន្នី បានឱ្យដឹងនាថ្ងៃទី១៥ ខែសីហានេះថា តាមការប៉ាន់ស្មានស្រូវជាង ១០០ហិកតាក្នុងស្រុក បវេលកំពុងតែទទួលរងផលប៉ះពាល់ពីសត្វ មមាចខ្នងស និង មមាចត្នោត អស់រយៈពេលប្រហែល ២០ថ្ងៃមកហើយ។ ស្រូវទាំងនោះកំពុងតែស្ថិតក្នុងដំណាក់កាលដាក់ទឹកដោះ និងខ្លះទៀតស្ថិតនៅដំណាក់កាលឱនដាក់គ្រាប់ទៅហើយ។ នៅសល់ប្រហែលមិនដល់កន្លះខែទៀតផង ស្រូវនោះនឹងអាចប្រមូលបានហើយ។
លោកសង្កេតឃើញថា ដើម្បីកម្ចាត់សត្វល្អិតចង្រៃនេះ ប្រជាកសិករបានបន្តប្រើប្រាស់ថ្នាំគីមី ពី ២ ទៅ ៣ ថ្ងៃម្តង តែមិនមានលទ្ធផលនោះទេ។ ផ្ទុយទៅវិញ ការប្រើប្រាស់នេះ វាធ្វើឱ្យប៉ះពាល់ដល់គុណភាពស្រូវ និងសុខភាពអ្នកបរិភោគផងដែរ ដោយសារតែសារធាតុគីមីបានបន្សល់ទុកនៅក្នុងស្រូវនោះ។
លោកមានប្រសាសន៍ថា៖ «សត្វហ្នឹងវានៅខាងក្រោមស្រូវ អញ្ជឹងបាញ់ក៏មិនត្រូវវាដែរ។ បើយើងបាញ់ក្នុងដំណាក់កាលនេះ វាសល់កាកសំណល់គីមីនៅក្នុងផលិតកម្ម ដែលនាំឱ្យមានការប៉ះពាល់ទៅដល់ទីផ្សារនាំចេញទៀត។ បើនាំចេញទៅអាស៊ានទៅសហគមន៍អឺរ៉ុប គេរកឃើញគេមិនទិញយើងទៀតទេ»។
កសិករបង្ហាញសត្វមមាចនៅទំលើគុម្ពស្រូវ។ រូបថត ក្រសួងកសិកម្ម
លោកបញ្ជាក់ថា៖ «២ថ្ងៃ គាត់បាញ់ម្តង។ ថ្នាំមុនបាញ់មិនទាន់សាបផង បាញ់ថែមទៀត...ហើយបើយើងហូបទៅប៉ះពាល់សុខភាពសាធារណៈទៀត។ ការបាញ់ក៏មិនអាចគ្រង់គ្រងទាំងស្រុងបានដែរ វាស៊ីតែដើម វាមិនប៉ះពាល់ដល់គុណភាពប៉ុន្មានដែរទេ។ អត់ប្រសិទ្ធភាព ហើយកសិករបាត់បង់ថវិកា ដែលប៉ះពាល់សេដ្ឋកិច្ចថែមទៀត ហើយការបាញ់ថ្នាំប៉ះពាល់មុនគេគឺអ្នកបាញ់ហ្នឹងហើយ»។
លោកបន្ថែមថា ការបាញ់ក្នុងកម្រិតច្រើននេះក៏បណ្តាលឱ្យប៉ះពាល់ដល់បរិស្ថាន និងងាប់ប្រភេទសត្វផ្សេងទៀតដែលមានប្រយោជន៍ផងដែរ។
លោកពន្យល់ថា នៅពេលដែលស្រូវជិតនឹងប្រមូលផលហើយនេះ។ សត្វមមាច ជញ្ជក់ដើមស្រូវ ដែលធ្វើឱ្យបាត់បង់ការដឹកនាំសារធាតុចិញ្ចឹមមួយចំនួនទៅផ្គត់ផ្គង់ផ្លែ ដែលមិនទាន់ពេញលេញ។ ផ្អែកទៅលើផលប៉ះពាល់នេះ ដំណាំស្រូវអាចនឹងថយទិន្នផលប្រមាណពី ១០ភាគរយទៅ ១៥ប៉ុណ្ណោះ។
ក្រុមការងារកសិកម្មក៏បានណែនាំដល់កសិករ ឱ្យកាត់បន្ថយការប្រើប្រាស់ជី និងថ្នាំពុលគីមី ហើយចៀសវាងការប្រើប្រាស់ពូជដែលបានពីការប្រមូលផលនេះ ដោយសារតែវាឆ្លងមេរោគនៅក្នុងពូជស្រូវនេះ។
មន្ត្រីជំនាញត្រួតពិនិត្យស្រូវដែលត្រូវសត្វមមាចបំផ្លាញ។ រូបថត ក្រសួងកសិកម្ម
ក្រៅពីនោះ កសិករត្រូវភ្ជួររាស់ និងពន្លិចទឹកភ្លាមៗ បន្ទាប់ពីប្រមូលផលរួច ដើម្បីសម្លាប់ពងពពួកមមាច និងត្រូវតាមដានវត្តមានសត្វល្អិតក្នុងស្រែជាប្រចាំ ដើម្បីកុំឱ្យបញ្ហាសត្វល្អិតនេះកើតមានឡើងចំពោះស្រូវថ្មីផ្សេងទៀត។
លោក អ៊ិន សុវណ្ណមុន្នី ក៏បានណែនាំដល់ការិយាល័យកសិកម្ម បរិស្ថាន ធនធានធម្មជាតិនៃរដ្ឋបាលស្រុកទាំង ១៤ស្រុក ក្រុង ត្រូវចេញគោលការណ៍ណែនាំពីការគ្រប់គ្រងសត្វល្អិត ជាពិសេស គឺសត្វមមាចនេះ និងផ្សព្វផ្សាយដល់ប្រជាកសិករឱ្យបានលឿនរហ័សនិងទូលំទូលាយ។
បើយោងតាមលោក សុវណ្ណមុន្នី ស្រូវនៅតំបន់ផ្សេងៗទៀត មិនមានការរាយការណ៍ពីផលប៉ះពាល់ពីសត្វល្អិតចង្រៃនេះនោះទេ។
ក្រៅពីមមាច ដំណាំស្រូវក្នុងខេត្តជាច្រើនក៏រងផលប៉ះពាល់ពីការបំផ្លាញដោយដង្កូវហ្វូង និងរុយសជាដើមផងដែរនៅក្នុងរដូវវស្សាឆ្នាំនេះ៕
