កម្លាំងអធិការដ្ឋាននគរបាលខណ្ឌបឹងកេងកង ប្រជុំជួរត្រួតពិនិត្យកម្លាំងដើម្បីត្រៀមរងចាំទទួលបញ្ជាពីថ្នាក់ដឹកនាំ ក្នុងការថែរក្សាការពារសន្តិសុខ សណ្តាប់សុវត្ថិភាពសង្គម ក៏ដូចជាការបង្ការទប់ស្កាត់ និងបង្ក្រាបបទល្មើសផ្សេងៗ។ ស្នងការដ្ឋាននគរបាលរាជធានីភ្នំពេញ
អ្នកនាំពាក្យក្រសួងមហាផ្ទៃ លោក ទូច សុឃៈ បានអំពាវនាវឲ្យអ្នកដែលចាញ់ឧបាយកលញុះញង់ប្រឆាំងនឹងគម្រោង CLV-DTA ហើយចូលរួមក្នុងផែនការបាតុកម្មផ្ដួលរំលំរដ្ឋាភិបាល ដកខ្លួនចេញហើយសារភាពជាបន្ទាន់ដើម្បីទទួលបានការលើកលែង។
លោកថា សមត្ថកិច្ចបានកំណត់មុខសញ្ញាអ្នកដែលពាក់ព័ន្ធអស់ហើយ ខណៈដែលការឃាត់ខ្លួន និងចាប់ខ្លួនអ្នកដែលកៀរគរគ្នាដើម្បីប្រឆាំងនឹងរដ្ឋាភិបាល ក្រោមរូបភាពប្រឆាំង CLV-DTA ត្រូវបានធ្វើឡើងជាបន្តបន្ទាប់។
លោក សុឃៈ ប្រាប់ភ្នំពេញប៉ុស្តិ៍នៅថ្ងៃនេះថា៖ «មកទល់នឹងពេលនេះ សមត្ថកិច្ចនៅតែអន្ទងឲ្យជនបង្ក ឬអ្នកដែលចាញ់ឧបាយកលរបស់ជនបង្ក ឬអ្នកចូលរួមមេត្តាបញ្ឈប់ ហើយដកខ្លួនថយចេញពីក្រុមជនល្មើសទាំងអស់នោះ។ បើសិនជាមកសារភាព អាចរួចផុតពីការទទួលសុខត្រូវផ្សេងៗ។ បើគ្រាន់តែចូលរួមល្មមៗ សូមដកខ្លួនចេញជាបន្ទាន់»។
កាលពីថ្ងៃទី១៣ ខែសីហា ក្រសួងយុត្តិធម៌បានចេញសេចក្ដីថ្លែងការណ៍ពន្យល់ពីផ្លូវច្បាប់ថា អ្នករៀបចំផែនការផ្ដួលរំលំរដ្ឋាភិបាល ឬ បដិវត្តន៍ពណ៌ នឹងត្រូវជាប់បទល្មើសឧបឃាត ដែលប្រឈមនឹងការចាប់ពន្ធនាគារចន្លោះពី ១៥ទៅ ៣០ឆ្នាំ។ ចំណែកអ្នកដែលចូលរួមក្នុងផែនការនេះនឹងត្រូវជាប់ក្នុងបទល្មើស «រួមគំនិតក្បត់» ប្រឈមជាប់ពន្ធនាគារពី ៥ ទៅ ១០ឆ្នាំ។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិមិនបានប្រាប់អំពីចំនួនមនុស្សសរុបដែលត្រូវបានឃាត់ខ្លួនពាក់ព័ន្ធនឹងករណីនេះទេ។
ទាំងលោក ជិន ម៉ាលីន អ្នកនាំពាក្យក្រសួងយុត្តិធម៌ និងលោក សុឃៈ ក៏មិនបានបង្ហាញពីចំនួនមនុស្សដែលត្រូវបានឃាត់ខ្លួនដែរ គ្រាន់តែបានបញ្ជាក់ថា ការឃាត់ខ្លួនត្រូវបានធ្វើឡើងជាបន្តបន្ទាប់នាពេលចុងក្រោយនេះ។
បើតាមការកត់ត្រាត្រួសៗរបស់ភ្នំពេញប៉ុស្តិ៍ គិតមកត្រឹមថ្ងៃទី១៥ ខែសីហានេះ មនុស្សប្រមាណ ១០នាក់ត្រូវបានចាប់ខ្លួនពាក់ព័ន្ធនឹងការប្រឆាំងនឹង CLV-DTA ដែលចាប់ផ្ដើមជាមួយនឹងការឃាត់ខ្លួនលោក ស៊្រុន ស្រន កញ្ញាភឹង សោភា និងលោកសាន សិត នៅខេត្តសៀមរាប កាលពីចុងខែកក្កដា ហើយត្រូវបានចោទប្រកាន់ពីបទញុះញង់។
លោក ទូច សុឃៈ៖ «ចំពោះចំនួនមនុស្ស ខ្ញុំក៏មិនបានបូកសរុបទេ ប៉ុន្តែការឃាត់ខ្លួន ឬចាប់ខ្លួនអ្នកដែលយកគម្រោង CLV-DTA នេះមកធ្វើជាឈ្នាន់ ឬចលករមួយបោកប្រជាពលរដ្ឋ បោកយុវជននោះយើងបានចាប់ខ្លួនជាបន្តបន្ទាប់។ មែនទែនទៅសមត្ថកិច្ចក្រសួងមហាផ្ទៃបានកំណត់មុខសញ្ញាបាននៅក្នុងដៃចំពោះអ្នកដែលប្រព្រឹត្តទាំងអស់នោះ ហើយយើងកំពុងបន្តនីតិវិធីចាប់ខ្លួនអ្នកទាំងអស់នោះ»។
លោក សុឃៈ ថ្លែងថា អ្នកដែលបានចាប់ខ្លួនបានប្រព្រឹត្តហួសពីសេរីភាពបញ្ចេញមតិ ដោយបានរៀបចំផែនការទុច្ចរិត និងមានឧបករណ៍សម្រាប់ប្រព្រឹត្តបទល្មើសដែលមានការរៀបចំច្បាស់លាស់ ក្នុងគោលដៅផ្ដួលរំលំរដ្ឋាភិបាល ឬធ្វើរដ្ឋប្រហារ៕
