ករណីផ្ទុះមីនតោន នៅលើដីស្រែ ក្នុងភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង បណ្ដាលឱ្យបុរសម្នាក់ស្លាប់ កាលពីម្សិលមិញ។ អាជ្ញាធរមីន
បាត់ដំបងៈ បុរសអាយុ២៣ឆ្នាំម្នាក់បានស្លាប់ភ្លាមៗនៅកន្លែងកើតហេតុ ក្រោយពីបើកត្រាក់ទ័រកិនលើគ្រាប់មីនតោននារសៀលព្រហស្បតិ៍ ទី១៥ខែសីហានេះ ដែលធ្វើឱ្យចំនួនជនរងគ្រោះដោយសារតែយុទ្ធភណ្ឌគ្រឿងផ្ទុះកើនឡើងដល់៣៨នាក់នៅក្នុងឆ្នាំ២០២៤នេះ។
អាជ្ញាធរមីនបញ្ជាក់ថា៖«មានករណីផ្ទុះមីនតោន នៅលើដីស្រែ ក្នុងភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង បណ្ដាលឱ្យបុរសម្នាក់ឈ្មោះ វ៉ាត សាវុនបានស្លាប់នៅនឹងកន្លែង ខណៈពេលដែលជនរងគ្រោះកំពុងបើកបរត្រាក់ទ័រភ្ជួរដី»។
ជនរងគ្រោះរស់នៅក្នុងភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង។ ករណីផ្ទុះនេះក៏បណ្តាលឱ្យត្រាក់ទ័រខូចខាត ទាំងស្រុងផងដែរ។
លោក ឡាង កុសល អ្នកនាំពាក្យអាជ្ញាធរមីនបានឱ្យដឹងថា ចាប់ពីខែមករា ដល់ខែកក្កដា ឆ្នាំ២០២៤នេះ មានជនរងគ្រោះដោយសារយុទ្ធភណ្ឌគ្រឿងផ្ទុះចំនួន ៣៧នាក់។ តួលេខនេះ មានការកើនឡើងចំនួន ៦១ភាគរយ បើប្រៀបធៀបទៅនឹងរយៈពេលដូចគ្នានៅឆ្នាំ២០២៣ ដែលមានជនរងគ្រោះចំនួន ២៣នាក់។
បើគិតទាំងករណីចុងក្រោយនេះផង ចំនួនជនរងគ្រោះដោយសារតែយុទ្ធភណ្ឌគ្រឿងផ្ទុះបានកើនឡើងដល់៣៨នាក់។ ក្នុងនោះ ជនរងគ្រោះស្លាប់មាន១០នាក់ របួស ២១នាក់ និងពិការអវយវៈ ៧នាក់ផងដែរ។
អាជ្ញាធរមីន និងអង្គភាពស៊ីម៉ាក់ (CMAC)បានធ្វើការអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ និងកុំប៉ះពាល់នៅពេលឃើញគ្រាប់មីន និងសំណល់យុទ្ធភណ្ឌសង្រ្គាម។ លើសពីនោះកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋាន នៅមុនពេលចូលទៅក្នុងតំបន់នោះ។
អាជ្ញាធរមីនបានអំពាវនាដូច្នេះថា៖«សូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល»។
អង្គភាពស៊ីម៉ាក់ក៏បានលើកឡើងផងដែរថា៖«សង្គ្រាមត្រូវបានបញ្ចប់ទាំងស្រុងជាង២៥ឆ្នាំហើយ ប៉ុន្តែឈាមខែ្មរនៅតែហូរដោយសារគ្រាប់មីននិងសំណល់យុទ្ធភណ្ឌសង្គ្រាម»។
អង្គភាពស៊ីម៉ាក់ក៏បានក្រើនរំលឹកផងដែរថា រដូវវស្សាពោរពេញទៅដោយទឹកភ្លៀង ហើយតំបន់មួយចំនួនក៏កំពុងទទួលរងនូវការគំរាមកំហែងដោយសារទឹកជំនន់។ ហេតុនេះ ប្រជាពលរដ្ឋត្រូវប្រុងប្រយ័ត្នឱ្យបានខ្ពស់ ជាពិសេស ពលរដ្ឋ ដែលរស់នៅតាមតំបន់ដែលសង្ស័យថាមីន ត្រូវបង្កើនការប្រុងប្រយ័ត្នពេលធ្វើដំណើរ ព្រោះគ្រាប់មីន និងសំណល់យុទ្ធភណ្ឌសង្រ្គាមអាចនឹងហូរតាមទឹក ឬផុសចេញពីដីដែលបានកប់ជាច្រើនឆ្នាំមកហើយ។
អង្គភាពស៊ីម៉ាក់បានសរសេរនៅលើបណ្តាញសង្គមរបស់ខ្លួនថា៖«សូមកុំប៉ះពាល់គ្រាប់មីនទាំងនោះ ហើយមេត្តាដាក់សញ្ញាសម្គាល់ និងសូមរាយការណ៍មកអង្គភាពស៊ីម៉ាក់ប្រសិនបើលោកអ្នកប្រទះឃើញគ្រាប់មីនហូរតាមទឹកទាំងនោះ»៕
