លោក ខូយ រីដា អភិបាលខេត្តពោធិ៍សាត់ ជួបជាមួយកម្លាំងចម្រុះ ដែលត្រូវបានដាក់ឱ្យប្រចាំការ ដើម្បីបង្រ្កាបការទន្រ្ទានដីព្រៃក្នុងខេត្តពោធិ៍សាត់ កាលពីខែមេសា។ រដ្ឋបាលខេត្ត
ពោធិ៍សាត់ៈ កម្លាំងចម្រុះចន្លោះពី៧០០ ទៅ៨០០នាក់ កំពុងតែត្រូវបានដាក់ប្រចាំការនៅតាមមូលដ្ឋាន ដើម្បីទប់ស្កាត់ការទន្រ្ទានដីព្រៃបែបអាណាធិបតេយ្យទូទាំងខេត្តពោធិ៍សាត់ ក្រោយពីដីព្រៃជិត ៤ម៉ឺនហិកតាត្រូវបានដកហូតពីបទល្មើស និងគ្រោងនឹងធ្វើការដំាស្តារព្រៃឈើឡើងវិញ ជាពិសេសគឺនៅតំបន់ភ្នំជួរភ្នំក្រវាញ។
ក្នុងកិច្ចសម្ភាស៍ជាមួយក្រុមអ្នកសារព័ត៌មាន ដែលដឹកនាំដោយក្លិបអ្នកកាសែតកម្ពុជាកាលពីសប្តាហ៍មុន អភិបាលខេត្តពោធិ៍សាត់ លោក ខូយ រីដា បានឱ្យដឹងថា ក្នុងនាមប្រធានគណៈបញ្ជាការឯកភាពរដ្ឋបាលខេត្ត លោកបានត្រៀមកម្លាំងចម្រុះចន្លោះពី ៧០០ ទៅ ៨០០នាក់ នៅតាមរដ្ឋបាលឃុំទាំងអស់នាពេលបច្ចុប្បន្ននេះ ដើម្បីត្រៀមបន្តទប់ស្កាត់បទល្មើសកាប់បំផ្លាញព្រៃឈើ និង ទន្រ្ទានយកដីព្រៃរដ្ឋដោយខុសច្បាប់ ជាពិសេស នៅក្នុងតំបន់ដែលការពារដោយព្រះរាជក្រិត្យ។ ក្នុងនោះក៏មានទាំងក្រុមទាហានជួយការពារតំបន់ទាំងនោះថែមទៀតផងដែរ។
លោកបញ្ជាក់ថា៖ «រយៈពេលកន្លងមក ខ្ញុំសុំគោលការណ៍ដើម្បីទប់ស្កាត់ទាំងអស់ហ្នឹង គឺរៀបចំកម្លាំងរហូតដល់ ៧០០ទៅ ៨០០នាក់ឯនោះទាំងថ្នាក់ជាតិ ក្រោមជាតិ ដើម្បីបញ្ឈប់ការទន្រ្ទានដីព្រៃអាណាធិបតេយ្យទាំងអស់នេះ។ អញ្ជឹងកម្លាំងចម្រុះខ្ញុំរាល់ថ្ងៃកំពុងតែដាក់គ្រប់ឃុំ នៅប្រចាំការគ្រប់កន្លែងទាំងអស់។ យើងកំពុងតែផ្គត់ផ្គង់ជីវភាពពួកគាត់រាល់ថ្ងៃ ដើម្បីធ្វើការងារហ្នឹង។ ការគ្រប់គ្រងដែនដីត្រូវធ្វើឱ្យបាន ហើយបើយើងបណ្តោយអស់បាត់ហើយ»។
លោកបន្តថា៖ «ឥលូវកម្លាំងនៅប្រចាំការរហូតគ្រប់ឃុំទាំងអស់ ដើម្បីការពារឱ្យបានដាច់ខាត។ រឿងហ្នឹង គឺកម្លាំងត្រូវមានជាអចិន្រ្តៃយ៍ ទោះមិនដើរល្បាតក៏ដោយ គឺនៅប្រចំាការហ្នឹង គឺមានកិច្ចការងារកន្លែងណាដែលយើង ដឹងព័ត៌មានគឺ ចេញអន្តរាគមន៍ភ្លាមៗតែម្តង»។
លោកក៏បន្តថា ដីព្រៃដែលត្រូវទន្រ្ទានចំនួន ៣ ៩ ៧៥៥ហិកតាហើយត្រូវបានដកហូត។ ក្រៅពីនោះ នៅតំបន់ខ្លះទៀត ក៏មិនទាន់ធ្វើការដកហូតមកវិញផងដែរ។ សកម្មភាពទន្រ្ទានយកនោះ មិនមែនទើបតែកើតមានក្នុងពេលដែលលោកចូលកាន់តំណែងជាអភិបាលខេត្តពោធិ៍សាត់ កាលពីចុងឆ្នាំ ២០២២នោះទេ។
លោកបន្ថែមថា៖ «អ្នកខ្លះថា ព្រៃឈើហ្នឹងអស់ពេល ចៅហ្វាយខេត្តនេះមកកាន់។ មិនមែនទេ។ មិនមែនកាប់ប៉ុន្មាន ថ្ងៃខ្ញុំមកនេះទេ គឺខ្ញុំមកដល់ភ្លាម ខ្ញុំសុំគោលការណ៍ទៅរាជរដ្ឋាភិបាលដើម្បីចាត់វិធានការណ៍ភ្លាម ព្រោះអានេះវាមានទាំងពីយូរបន្តិចៗមកហើយ។ អត់បន្ទោសជំនាន់ណា ជំនាន់ណាទេ»។
ទោះយ៉ាងណា លោកមិនបានបង្ហាញតួលេខអ្នកដែលពាក់ព័ន្ធទៅនឹងបទល្មើសទាំងនោះទេ។ ប៉ុន្តែលោកថា លោកបានធ្វើការត្រួតពិនិត្យមើលអ្នកប្រព្រឹត្តទាំងនោះ ហើយរកឃើញថា ពួកគេជាពលរដ្ឋមកពីកន្លែងផ្សេងៗប្រហែលជាង២០ខេត្តឯនោះ។
លោកបន្តថា ដំបូងឡើយមានមនុស្សតែមួយចំនួនតូចតែប៉ុណ្ណោះ ប៉ុន្តែនៅពេលដែលគ្មានការទប់ស្កាត់ ពួកគេចេះតែបបួលអ្នកផ្សេងទៅទន្រ្ទានយកដីព្រៃដែរ ដែលនេះបញ្ហាប្រឈមត្រូវដោះស្រាយ។
បញ្ហាប្រឈមចម្បង គឺការបាត់បង់ធនធានព្រៃឈើ សម្រស់ធម្មជាតិ និង ប៉ះពាល់ដល់ប្រភពទឹក។ ម្យ៉ាងវិញទៀត ការចូលទៅរស់នៅដោយខុសច្បាប់របស់មនុស្សទាំងនោះ គឺជាបន្ទុករបស់អាជ្ញាធរ នៅថ្ងៃក្រោយ។ ក្នុងនោះរួមមានការដោះស្រាយបញ្ហាធ្វើផ្លូវ ភ្លើង ទឹក មន្ទីរពេទ្យ និង សាលារៀន ជាដើម ខណៈពេលដែល ដំណោះស្រាយអាទិភាពគ្រប់គោលដៅទាំងអស់នៅក្នុងខេត្តមិនទាន់មានគ្រប់ជ្រុងជ្រោយនៅឡើយផង។
លោក ខូយ រីដា អភិបាលខេត្តពោធិ៍សាត់ ផ្តល់កិច្ចសម្ភាស៍ដល់ក្រុមអ្នកសារព័ត៌មានប្រមាណជិត ៦០នាក់ មកពី ៣៧ស្ថាប័ន ដែលមានបេសកកម្មចុះមកផ្សព្វផ្សាយអំពីសក្តានុពលទេសចរណ៍ធម្មជាតិ និង ការអភិវឌ្ឍថ្មីៗ ក្នុងខេត្តពោធិ៍សាត់ កាលពីសប្តាហ៍មុន។ រដ្ឋបាលខេត្ត
លោកថ្លែងប្រាប់អ្នកសារព័ត៌មានជិត ៦០នាក់មកពី ៣៧អង្គភាពដូច្នេះថា៖«បទល្មើសយើងអនុវត្តច្បាប់ តែភាគច្រើនគឺយើងអប់រំជាចម្បង ជាអាទិភាពទី១។ ទាល់តែអស់ជម្រើស បានយើងច្បិច។ យើងចាប់យកទៅដាក់គុកច្រើនពេក មានបាយឯណាឱ្យហូប។ ហើយមានកន្លែងឯណាដាក់? មិនមែនយើងនិយាយអញ្ជឹងឱ្យប្រព្រឹត្តបទល្មើសទេ បើអប់រំមិនបានគឺត្រូវចាត់ការហើយ»។
ទោះយ៉ាងណា លោកក៏បានលើកឡើងដែរថា ការគ្រប់គ្រង និង សម្រេចធ្វើអី្វមួយរបស់អាជ្ញាធរ គឺត្រូវមានការថ្លឹងថ្លែងច្បាស់លាស់ឱ្យបានគ្រប់ជ្រុងជ្រោយទាំងអស់។
លោកថា៖ «មិនមែនចេះតែថា លីពូថៅ ហើយកាំបិត ខ្វែវដើរតែកាប់ទេ។ អត់បានទេ។ ថ្លឹងទាំងសងខាង ថ្លឹងទាំងធនធាន ថ្លឹងទាំងជីវិតរស់នៅ ជីវភាពរបស់ប្រជាជន ថ្លឹងពីគោលនយោបាយរដ្ឋាភិបាល។ បើធ្វើអាជ្ញាធរគេឱ្យដាវអាជ្ញាសឹក មកលីតែកាប់ ងាប់ហើយគ្មានសុខទេ ខ្លួនឯង ក៏មិនសុខទេ អាហ្នឹងនោះ។ អញ្ជឹងត្រូវប្រើខួរក្បាលគិតគ្រប់ជ្រុងជ្រោយ ទៅតាមស្ថានភាពហ្នឹង»។
ក្នុងការគ្រប់គ្រង និង ការពារដីព្រៃទាំងនោះ លោកអភិបាលបានដាក់ការទទួលខុសត្រូវទៅលើអាជ្ញាធរមូលដ្ឋានមុនគេ ដែលរាប់ចាប់តាំងពីរូបលោក ជាប្រធានគណៈបញ្ជាការឯកភាពរដ្ឋបាលខេត្ត រហូតដល់ថ្នាក់ស្រុក ឃុំ និងភូមិ។ លើលពីនោះនៅក្នុងដែនជម្រកសត្វព្រៃវិញ ក៏មានមន្ទីរនិងក្រសួងបរិស្ថានផងដែរ។
លោកបញ្ជាក់ថា៖ «ខ្ញុំត្រូវដាក់មកលើខ្លួនខ្ញុំមុនគេ ដាច់ខាតត្រូវតែធ្វើ។ បើខ្ញុំអ្នកដឹកនាំម៉ាខេត្តហ្នឹង ខ្ញុំមិនធ្វើ អ្នកណាធ្វើឥលូវហ្នឹង។ ក្រសួងបរិស្ថានគាត់មានកម្លាំងប៉ុន្មាន? ការពារធនធានធម្មជាតិនេះ ខ្ញុំដាក់មកលើខ្លួនខ្ញុំមែន ប៉ុន្តែ ខ្ញុំប្រើភាសាយើង។ យើងគឺទាំងអស់គ្នា កម្លាំងនឹងមធ្យោបាយសរុបទាំងអ្នកអនុវត្តផ្ទាល់ ទាំងអ្នកដែលផ្តល់ធនធាន អ្នកផ្តល់គំនិត..ដែលសុទ្ធតែចូលរួមការពារ»។
លោកបានអះអាងថា លោក និង រដ្ឋមន្រ្តីក្រសួងរ៉ែ និងថាមពល ដែលជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តពោធិ៍សាត់ លោក កែវ រតនៈ បានប្តេជ្ញាចិត្តរួមគ្នា ដើម្បីប្តូរផ្តាច់ការពារធនធានទាំងអស់នេះ។ បន្ថែមពីនោះ ក៏គ្រោងនឹងធ្វើការដាំស្តារព្រៃឈើនៅកន្លែងដែលដកហូតយកមកវិញ ជាពិសេស គឺនឹងចាប់ផ្តើមដាំពីជើងភ្នំឡើងទៅលើភ្នំវិញ ដោយសង្ឃឹមថា នឹងមានការចូលរួមពីស្ថាប័នពាក់ព័ន្ធទាំងអស់និងដៃគូអភិវឌ្ឍន៍ផងដែរ។
លោកមានប្រសាសន៍ថា៖ «កំពូលភ្នំខ្លះ គឺបាត់បង់ច្រើនណាស់។ ខ្ញុំមិនបកស្រាយច្រើនទេ។ ក្នុងអាណត្តិខ្ញុំ គឺត្រូវចាត់ចែងកិច្ចការងារហ្នឹង ធ្វើម៉េចឱ្យភ្នំទាំងអស់ហ្នឹង មានដើមឈើឡើងវិញ។ ថ្ងៃនេះ ហ្នឹងយើងមិនទាន់ដាំនៅឡើងទេ ដោយសារតែយើងកំពុងតែធ្វើនៅតំបន់ក្រោមៗនេះសិន»។
លោកអភិបាលបានសម្តែងការជឿជាក់ថា នៅប្រហែលជា ៥ឆ្នាំក្រោយទៀត ការងារដំាស្តារព្រៃឡើងវិញនោះ នឹងទទួលបានជោគជ័យ ហើយនៅក្នុងរដូវស្សានេះ ដើមឈើក៏មានការលូតលាស់ឡើងវិញខ្លះដែរនៅកន្លែងដែលទទួលរងការកាប់បំផ្លាញនោះ។
លោក តាន់ គឹមសួរ ប្រធានសមាគមយុវជនស្រលាញ់ធម្មជាតិ បានសង្កេតឃើញថា អភិបាលខេត្តពោធិ៍សាត់ លោកខូយ រីដា ជាថ្នាក់ដឹកនាំមួយរូប ដែលមានការប្តេជ្ញាខ្ពស់ក្នុងការដឹកនាំ ក៏ដូចជាសហការនៅក្នុងការបង្រ្កាបបទល្មើសព្រៃឈើ។ ជាក់ស្តែងនៅពេលថ្មីៗនេះ ឧក្រិដ្ឋកម្មព្រៃឈើធំមួយ ដែលកើតមានអស់រយៈពេលជាច្រើនឆ្នាំមកដោយបុគ្គលឈ្មោះ កោះ សុភី ហៅតាហយត្រូវបានបង្រ្កាប រហូតដល់មានចំណាត់ការពីតុលាការទៀតផង។
លោកថ្លែងថា៖ «ឯកឧត្តមជាថ្នាក់ដឹកនាំមួយរូបដែលនិយាយពិត ធ្វើពិតតែម្តង។ ខ្ញុំឃើញថា គាត់មានឆន្ទៈខ្ពស់ខ្វាយខ្វល់ចំពោះធនធានធម្មជាតិ។ គ្រាន់តែរយៈពេលខ្លីដែលខ្ញុំបានចុះធ្វើកិច្ចការជាមួយគាត់ គឺមានប្រសិទ្ធភាពល្អខ្លាំងមែនទែន»៕
