![](https://pppkhmer.sgp1.digitaloceanspaces.com/image/main/20248/21_8_2024_monx_at_temples.jpg)
សត្វជាច្រើនចាំទទួលចំណីពីភ្ញៀវទេសចរ នៅតំបន់ប្រាសាទ ខេត្តសៀមរាប។ Post Staff
រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និង នេសាទបានប្រកាសឲ្យប្រជាពលរដ្ឋដែលមានស្វាកាច ឬជួបនឹងស្វាកាចនៅតាមទីសាធារណៈ សូមជូនដំណឹងទៅលេខទូរស័ព្ទ hotline ដើម្បីរដ្ឋបាលព្រៃឈើទៅចាប់យកស្វាទាំងនោះ។
សេចក្ដីប្រកាសព័ត៌មានរបស់រដ្ឋបាលព្រៃឈើដែលផ្សព្វផ្សាយនៅថ្ងៃនេះបានឲ្យដឹងថា ការទទួលស្វា និងដកហូតសត្វស្វាពីកន្លែងសាធារណៈនេះធ្វើឡើងក្នុងគោលបំណងរក្សាសុវត្ថិភាពជូនប្រជាពលរដ្ឋ និងភ្ញៀវទេសចរ។
សេចក្ដីប្រកាសព័ត៌មានបញ្ជាក់ថា៖ «ក្នុងករណីដែលមានសត្វស្វាកាច ឬស្វាចំនួនច្រើនបង្កការរំខាន និងធ្វើទុក្ខបុកម្នេញ សូមទាក់ទងមកតាមរយៈទូរស័ព្ទលេខ ០៨៥៧៨០៨៤៧ ឬ ០១០៥៥៦៦៣០នេះ ដែលរដ្ឋបាលព្រៃឈើនឹងចេញអន្តរាគមន៍ក្នុងការដកហូតសត្វស្វាដែល អាចបង្កគ្រោះថ្នាក់ទាំងនោះចេញពីតំបន់សាធារណៈមួយចំនួននេះ»។
សេចក្ដីប្រកាសព័ត៌មានដដែលបញ្ជាក់ថា ស្វាដែលនឹងទទួលបាននឹងយកទៅលែងក្នុង ព្រៃធម្មជាតិដើម្បីបង្កើនចំនួនសត្វស្វាដោយធម្មជាតិ ឬយកទុកធ្វើជាមេបង្កាត់ពូជនៅក្នុងកសិដ្ឋាន ឬរក្សាទុកនៅតាមសួនសត្វ ផ្អែកទៅតាមស្ថានភាពនៃសត្វស្វានីមួយៗ។
លោក យុង រតនា អនុប្រធានការិយាល័យអភិរក្សនិងវិបុលកម្ម នៃរដ្ឋបាលព្រៃឈើប្រចាំនៅភ្នំតាម៉ៅ បានប្រាប់ភ្នំពេញប៉ុស្តិ៍ថា ការប្រកាសទទួលសត្វស្វាកាចៗឬស្វាដែលប្រជាពលរដ្ឋលែងត្រូវការ ដោយសារតែកន្លងមក ប្រជាពលរដ្ឋខ្លះបានចិញ្ចឹមស្វានៅតាមផ្ទះ ហើយពេលស្វាធំ ពួកគាត់ឈប់ស្រឡាញ់វា ឬដោយសារតែវាកាច ហើយក៏យកទៅលែងនៅតាមព្រៃតូចៗ ឬនៅតាមវត្តអារាម ឬទីសាធារណៈ ដែលបង្កគ្រោះថ្នាក់ដល់ពលរដ្ឋផ្សេងទៀត។
លោកនិយាយថា៖ «នៅភ្នំពេញ ស្វាបែបនេះមានមួយចំនួនដែរ ហើយខេត្តសៀមរាប និងខេត្តកំពតសំបូរទៅតាមប្រភេទស្វា។ ពេលខ្លះបងប្អូនប្រជាពលរដ្ឋគាត់ចិញ្ចឹមស្វា ហើយពិបាកដោះលែង។ កាលពីតូចគាត់ស្រឡាញ់ ដល់ពេលវាធំវាកាច អាចខាំកូនចៅ ឬសមាជិកគ្រួសារ។ ពេលខ្លះគាត់យកទៅលែងនៅទីវាលដែលមានដើមឈើបន្តិចបន្តួច»។
លោកបញ្ជាក់ថា លោកតែងទទួលបានស្វាជាញឹកញាប់ទាំងពីប្រជាពលរដ្ឋ និងទទួលបានពីក្រុមបង្ក្រាបសត្វព្រៃទូទាំងប្រទេសដែលធ្វើការជាមួយអង្គការក្រៅរដ្ឋាភិបាលធ្វើការរឿងអភិរក្សសត្វព្រៃ។
រដ្ឋបាលព្រៃឈើស្នើសុំកិច្ចសហការពីប្រជាពលរដ្ឋ និងស្នើកុំឲ្យលែងស្វានៅតាមវត្តអារាម ឬទីសាធារណៈ និងកុំឲ្យចំណី ប៉ះពាល់ ឬលេងជាមួយសត្វស្វា ហើយត្រូវរក្សាគម្លាតឆ្ងាយពីស្វាដើម្បីធានាសុវត្ថិភាព បញ្ចៀសគ្រោះថ្នាក់បង្កដោយសត្វស្វាទាំងនេះ និងដើម្បីកាត់បន្ថយហានិភ័យនៃការចម្លងជំងឺ៕