សៀវភៅឆ្លងដែនកម្ពុជា-ថៃ (Border Pass)។ រដ្ឋបាលខេត្តកោះកុង
ភ្នំពេញៈ ក្រោយពីការដាក់ឱ្យអនុវត្តសាកល្បង កាលពីដើមឆ្នាំនេះមក ការផ្តល់សេវាប័ណ្ណព្រំដែន កម្ពុជា-ថៃ នៅរដ្ឋបាលក្រុង ស្រុកនៃខេត្តជាប់ព្រំដែនជាមួយប្រទេសថៃ ត្រូវបានបន្តដោយស្វ័យប្រវត្តិ និងបានបង្កភាពងាយស្រួលដល់ពលរដ្ឋមូលដ្ឋានរាប់ម៉ឺននាក់ក្នុងការចេញចូលប្រទេសថៃ។
ប្រជាពលរដ្ឋជាង ១ម៉ឺននាក់ បានកំពុងតែប្រើប្រាស់ប័ណ្ណព្រំដែនឆ្លងកាត់ចេញចូលទៅប្រទេសថៃ តាមច្រកព្រំដែនអន្តរជាតិប៉ោយប៉ែតជារៀងរាល់ថ្ងៃ ក្រោយពីការផ្តល់សេវាប័ណ្ណព្រំដែន កម្ពុជា-ថៃ នៅរដ្ឋបាលក្រុងស្រុកត្រូវបានបន្ត។ នេះបើយោងតាមការអះអាងរបស់អភិបាលខេត្ត បន្ទាយមានជ័យ លោក អ៊ុំ រាត្រី នៅក្នុងខ្លិបវីដេអូមួយដែលបង្ហោះលើបណ្តាញសង្គមរបស់លោកនាថ្ងៃទី២០ ខែសីហានេះ។
លោកអភិបាលមានប្រសាសន៍ថា៖ «ឥឡូវនេះមានភាពងាយស្រួលមែនទែន មិនដូចមុនទេ។ ប័ណ្ណព្រំដែនឥឡូវនេះយើងមានប្រើរហូតដល់ QR code។ ពីមុនអត់មានទេ ពិនិត្យមើលក្នុងកុំព្យូទ័រហើយ វាយតែម តែឥឡូវអត់ទេអូស QR code ចេញមក ទិន្នន័យចេញមកតែម្តងដូចលិខិតឆ្លងដែនអញ្ជឹង»។
លោក អ៊ុំ រាត្រី បន្តថា ពីមុនការធ្វើប័ណ្ណព្រំដែនគឺនៅអាជ្ញាធរថ្នាក់ខេត្ត តែក្នុងឆ្នាំ ២០២៤នេះ រដ្ឋបាលខេត្តបានអនុញ្ញាតឱ្យគ្រប់ក្រុងស្រុកផលិតប័ណ្ណព្រំដែនជូនពលរដ្ឋទៅតាមតម្លៃកំណត់របស់រដ្ឋាភិបាល គឺ ២ ម៉ឺនរៀលក្នុងមួយប័ណ្ណ។ លើសពីនោះប័ណ្ណព្រំដែននេះក៏អាចប្រើប្រាស់នៅតាមច្រកតំបន់ក្នុងខេត្តបានផងដែរ ក្រោយពីមានការសម្របសម្រួលជាមួយភាគីថៃរួចមក។
លោកថ្លែងថា៖ «ពីមុនគាត់ប្រមូលផ្តុំគ្នាមួយកន្លែង តែឥឡូវអត់ទេ ពង្រាយគ្រប់ស្រុកទាំងអស់។ អញ្ជឹងពលរដ្ឋមិនចាំបាច់ឡើងមកសាលាខេត្តទេ។ ពីមុនប័ណ្ណចេញចូលបានតែច្រកអន្តរជាតិប៉ោយប៉ែតទេ តែឥឡូវអត់ទេ។ ដោយមានការសម្របសម្រួលរវាងកម្ពុជា ថៃ ពលរដ្ឋចេញតាមច្រកតំបន់ក៏បានដែរ។ វាមានភាពងាយស្រួលមែនទែនសម្រាប់ពលរដ្ឋ កាត់បន្ថយពេលវេលាច្រើនមែនទែន។ អនុវត្តតាមឥឡូវដំណើរការយ៉ាងរលូន»។
រាជរដ្ឋាភិបាលកម្ពុជាបានដាក់ឱ្យអនុវត្តសាកល្បងរយៈពេល ៦ខែ នូវការផ្តល់សេវាប័ណ្ណព្រំដែន កម្ពុជា-ថៃ នៅរដ្ឋបាលក្រុង ស្រុកនៃខេត្តជាប់ព្រំដែនជាមួយប្រទេសថៃ ចាប់ពីថ្ងៃទី១ ខែមករា កន្លងមក។ ក្នុងរយៈពេលអនុវត្តសាកល្បងនេះ អភិបាលក្រុង ស្រុក ត្រូវបានធ្វើប្រតិភូកម្មអំណាចឱ្យក្នុងការពិនិត្យ សម្រេច និងចុះហត្ថលេខាលើប័ណ្ណព្រំដែន កម្ពុជា-ថៃ ជូនពលរដ្ឋ ដែលមានលំនៅឋានអចិន្ត្រៃយ៍នៅក្នុងដែនសមត្ថកិច្ចរបស់ខ្លួន។
សេចក្តីសម្រេចស្តីពីការអនុវត្តសាកល្បង ដែលចុះហត្ថលេខាដោយលោកនាយករដ្ឋមន្រ្តី ហ៊ុន ម៉ាណែត សរសេរថា៖ «ក្នុងការអនុវត្តសាកល្បងនេះនឹងត្រូវបន្តដោយស្វ័យប្រវត្តិ ប្រសិនបើពុំមានការសម្រេចផ្សេង ណាមួយពីរាជរដ្ឋាភិបាលកម្ពុជា»។
ទោះយ៉ាងណា ក្នុងការស្នើសុំប័ណ្ណព្រំដែននេះ ប្រជាពលរដ្ឋត្រូវបង់ប្រាក់ចំនួន ២ ម៉ឺនរៀលក្នុងមួយប័ណ្ណ។
លោក ជា ពិសិដ្ឋ នាយករដ្ឋបាលខេត្តឧត្តរមានជ័យ ក៏បានឱ្យដឹងផងដែរថា ពលរដ្ឋអាចស្នើសុំធ្វើប័ណ្ណព្រំដែននៅថ្នាក់ក្រុងស្រុកតាមរយៈច្រកចេញចូលតែមួយក៏បាន ឬនៅខេត្តក៏បានដែរ។
លោកបញ្ជាក់ថា៖ «ក្រោយពីសាកល្បង ៦ខែ ឥឡូវយើងចូលយន្តការអនុវត្តជាក់ស្តែងហើយ។ ការអនុវត្តសាកល្បងបានជោគជ័យហើយ អញ្ជឹងបន្តអនុវត្តបម្រើសេវាហ្នឹងតែម្តង»។
លោកបន្តថា ការផលិតប័ណ្ណនេះគឺមានរយៈពេល ៥ថ្ងៃ តាមការកំណត់របស់រដ្ឋាភិបាល ប៉ុន្តែជាក់ស្តែង នៅខេត្តយ៉ាងយូរតែ ២ថ្ងៃទេ អាចធ្វើជូនពលរដ្ឋរួចរាល់ហើយ។ ទោះយ៉ាងណា លោកមិនមានតួលេខនៅក្នុងដៃពីចំនួនប័ណ្ណដែលត្រូវផលិតជូនពលរដ្ឋនាពេលកន្លងមកនោះទេ៕
