រូបថតអំពីព័ត៌មានក្លែងក្លាយជាភាសាចិន ដែលត្រូវបានបដិសេធដោយស្ថានទូតចិននៅកម្ពុជា កាលពីថ្ងៃទី២២ ខែសីហា។ ស្ថានទូតចិនប្រចាំកម្ពុជា
ករណីព័ត៌មានក្លែងក្លាយបានកើនឡើងក្នុងមួយរយៈពេលចុងក្រោយនេះ ស្របពេលមានសន្ទុះនៃការបញ្ចេញមតិប្រឆាំងនិងគាំទ្រទៅលើតំបន់អភិវឌ្ឍន៍ត្រីកោណកម្ពុជា ឡាវ វៀតណាម (CLV-DTA)។
កាលពីថ្ងៃទី២២ ខែសីហា ក្រសួងការពារជាតិបានប្រកាសច្រានចោលព័ត៌មានក្លែងក្លាយជាភាសាចិនផ្សព្វផ្សាយនៅថ្ងៃទី១៩ ខែសីហា ដែលថា អតីតរដ្ឋមន្ត្រីការពារជាតិ លោក ទៀ បាញ់ ដែលបច្ចុប្បន្នជាសមាជិកឧត្តមក្រុមប្រឹក្សាផ្ទាល់ព្រះមហាក្សត្រ និង លោក ទៀ សីហា រដ្ឋមន្ត្រីការពារជាតិក៏ដូចជាកងយោធពលខេមរភូមិន្ទបានធ្វើរដ្ឋប្រហារទម្លាក់រដ្ឋាភិបាល និងបានសម្រុកចូលទីស្ដីការគណៈរដ្ឋមន្ត្រី ដើម្បីចាប់លោកនាយករដ្ឋមន្ត្រី ហ៊ុន ម៉ាណែត និងបានចូលចាប់លោក ហ៊ុន សែន ប្រធានព្រឹទ្ធសភា។
លោកស្រី ម៉ាលី សុជាតា អ្នកនាំពាក្យក្រសួងការពារជាតិបានបដិសេធព័ត៌មាននេះ ដោយលោកស្រីថ្លែងថា៖ «ចេតនាបំភ្លៃការពិតនិងញុះញង់ដ៏អាក្រក់និងគួរឲ្យស្អប់ខ្ពើមបំផុតនេះ គឺជាទង្វើដែលមិនអាចអត់ឱនឲ្យបានទេ។ ក្រសួងការពារជាតិនឹងចាត់វិធានការគ្រប់បែបយ៉ាងដើម្បីនាំខ្លួនក្រុមអគតិជ្រុលនិយម និងអ្នកពាក់ព័ន្ធដទៃទៀត ឲ្យមកទទួលខុសត្រូវពេញលេញចំពោះមុខច្បាប់ឲ្យបានជាដាច់ខាត»។
លោកស្រីបញ្ជាក់ថា កងទ័ពប្ដេជ្ញារក្សាភាពស្មោះត្រង់ចំពោះរដ្ឋាភិបាល និងលោកនាយករដ្ឋមន្ត្រី ហ៊ុន ម៉ាណែត និងប្ដេជ្ញាការពារសាមគ្គីជាតិ ស្ថិរភាព សន្តិភាព និងភាពសុខសាន្តរបស់ប្រជាជន។
ករណីព័ត៌មានក្លែងក្លាយជាភាសាចិននេះ ក៏ទទួលបានប្រតិកម្មពីសំណាក់ឯកអគ្គរដ្ឋទូតចិនប្រចាំកម្ពុជា លោក Wang Wenbin ផងដែរ ដោយលោកបានបង្ហោះសារនៅលើហ្វេសប៊ុកថា៖ «យើងថ្កោលទោសចំពោះការប្រឌិតនិងផ្សព្វផ្សាយព័ត៌មានក្លែងក្លាយ ហើយនឹងសហការជាមួយមិត្តភ័ក្ដិកម្ពុជាដើម្បីទប់ស្កាត់និងប្រឆាំងនឹងព័ត៌មានក្លែងក្លាយ។
ក្រៅពីនេះ ក៏មានព័ត៌មានក្លែងក្លាយមួយចំនួនទៀតដែលផ្ដោតគោលដៅលើផ្ទៃក្នុងគណបក្សប្រជាជនកម្ពុជា ដោយអះអាងថា លោក ស ខេង អតីតរដ្ឋមន្ត្រីក្រសួងមហាផ្ទៃនឹងក្លាយជានាយករដ្ឋមន្ត្រីនាពេលខាងមុខ។
ក្រៅពីនេះក៏មានព័ត៌មានក្លែងក្លាយដែលថា លោក ស ខេង និងលោក ស សុខា ដែលជារដ្ឋមន្ត្រីក្រសួងមហាផ្ទៃ ត្រូវបានឃុំខ្លួននៅក្នុងផ្ទះដោយសារតែមិនគាំទ្រ CLV-DTA។ អ្នកនាំពាក្យក្រសួងមហាផ្ទៃ លោក ទូច សុឃៈ បញ្ជាក់ថា រាល់ការលើកឡើងបែបនេះគឺជាព័ត៌មានក្លែងក្លាយ។
យោងតាមរបាយការណ៍របស់គណៈកម្មការប្រឆាំងព័ត៌មានក្លែងក្លាយរបស់ក្រសួងព័ត៌មាន នៅក្នុងខែកក្កដាកន្លងទៅ គណៈកម្មការនេះបានកត់ត្រាព័ត៌មានក្លែងក្លាយចំនួន ៣២០ ករណី រាប់បញ្ចូលទាំងព័ត៌មានបែបញុះញង់ ព័ត៌មានបែបប្រឌិតខុសពីការពិត ព័ត៌មានបំពុលសង្គម និងព័ត៌មានបែបប្រមាថដល់អង្គព្រះមហាក្សត្រនិងថ្នាក់ដឹកនាំរាជរដ្ឋាភិបាល។ នេះបើតាមការបញ្ជាក់របស់លោក ទេព អស្នារិទ្ធ អ្នកនាំពាក្យក្រសួងព័ត៌មាន។
លោកថា ព័ត៌មានទាំងនេះក៏បូករួមទាំងការអត្ថាធិប្បាយបំភ្លៃការពិតជុំវិញប្រធានបទ CLV-DTA ផងដែរ។ ប្រភពនៃការសាយភាយនៃព័ត៌មានក្លែងក្លាយទាំងនេះ ភាគច្រើនមានប្រភពនៅក្រៅប្រទេស ដែលត្រូវបានចែកចាយ ឬផ្សព្វផ្សាយបន្តដោយក្រុមមានចេតនាទុច្ចរិតក្នុងគោលបំណងធ្វើឲ្យមានភាពវឹកវរនៅក្នុងសង្គម។
លោកនិយាយថា៖ «វិធានការដែលគណៈកម្មការបានដាក់ចេញ គឺយើងបានទាក់ទងទៅក្រុមហ៊ុនហ្វេសប៊ុក និងក្រុមហ៊ុនទិកតុកដើម្បីសុំការសហការលុបចោលមាតិកាទាំងឡាយដែលផ្ទុកព័ត៌មានបំពុលនិងក្លែងក្លាយដែលមានចរិតញុះញង់និងបំភ្លៃការពិតទាំងនោះ»។
លោកបន្តថា ករណីខ្លះគណៈកម្មការក៏បានសុំឲ្យក្រុមហ៊ុនលុបឬប្លុកចោលគណនីហ្វេសប៊ុកឬទិកតុកទាំងនោះ ព្រោះគណនីខ្លះជាគណនីក្លែងក្លាយ ដែលកាន់ដោយមនុស្សតែម្នាក់។
លោកពន្យល់ដូច្នេះថា៖ «ជាបទពិសោធន៍ដែលយើងធ្លាប់មានចំណាត់ការគឺ មនុស្សម្នាក់អាចមានគណនីដល់ទៅ១០ ឬលើសហ្នឹង។ គាត់ចងជាក្រុមគណនី ពេលគាត់បញ្ចេញព័ត៌មានក្លែងក្លាយម្ដងគឺទៅទាំងអស់ ហើយបណ្ដាញរបស់គាត់ក៏យកព័ត៌មាននោះទៅផ្សាយតៗគ្នាដើម្បីឲ្យឃើញចំនួនច្រើន។ ប៉ុន្តែ ជាក់ស្ដែងភាគច្រើន អ្នកគ្រប់គ្រងគណនីទាំងនោះមានតែប៉ុន្មាននាក់ ហើយភាគច្រើននៅក្រៅប្រទេស»។
នៅក្នុងខែកក្កដាដដែល គណនីក្លែងក្លាយ ឬ គណនីដែលផ្សព្វផ្សាយព័ត៌មានដែលមិនមានមូលដ្ឋានច្បាស់លាស់នៅកម្ពុជា ឬព័ត៌មានគ្មានតុល្យភាពដែលធ្វើឲ្យសាធារណជនយល់ច្រឡំ ក្រសួងព័ត៌មានបានចេញលិខិតព្រមានទៅអង្គភាពចំនួន២។ លើសពីនេះ គេហទំព័រ១ ត្រូវបានបញ្ឈប់ដោយសារតែការរំលោភទៅក្រមសីលធម៌អ្នកសារព័ត៌មាន និងការបំពានលិខិតដែលតម្កល់នៅក្រសួងព័ត៌មាន។
បើតាមលោក អស្នារិទ្ធ ការសាយភាយលឿននៃព័ត៌មានក្លែងក្លាយគឺដោយសារតែការប្រើប្រាស់បណ្ដាញសង្គមនៅកម្ពុជាមានច្រើន ហើយការយល់ដឹងអំពីព័ត៌មាននៅមានកម្រិតនៅឡើយ។ យ៉ាងណាក៏ដោយ លោកកត់សម្គាល់ឃើញថា សាធារណជនកាន់តែច្រើនឡើងយល់ដឹងអំពីព័ត៌មានក្លែងក្លាយ និងផលវិបាករបស់វា ដែលធ្វើឲ្យពួកគេមានការប្រុងប្រយ័ត្នខ្ពស់ជាងមុន។
លោកថា ព័ត៌មានក្លែងក្លាយពាក់ព័ន្ធនឹងរឿង CLV-DTA ក៏មានការឆ្លើយតបពីសំណាក់សាធារណជនទៅលើអ្នកដែលចែករំលែកព័ត៌មានក្លែងក្លាយផងដែរ ដែលលោកចាត់ទុកថានេះជាចំណុចវិជ្ជមានកើតចេញពីការយល់ដឹងរបស់ពលរដ្ឋទៅលើព័ត៌មានក្លែងក្លាយ។
ក្នុងឆ្នាំ២០២៣ ក្រសួងព័ត៌មានបានកត់ត្រាទុកព័ត៌មានក្លែងក្លាយចំនួនជាង ៣ពាន់ករណី។ ក្នុងឆមាសទី១ ឆ្នាំ២០២៤នេះ ក្រសួងព័ត៌មានបានកត់ត្រាទុកព័ត៌មានក្លែងក្លាយសរុបចំនួន ១៧០១ ករណី ដែលចំនួននេះបានកើនឡើងចំនួន ១២ភាគរយ បើប្រៀបធៀបនឹងចំនួនកត់ត្រាទុកក្នុងរយៈពេលដូចគ្នាកាលពីឆ្នាំមុនដែលមានចំនួន ១៥១៩ ករណី៕
.jpg)
