រដ្ឋមន្ត្រីការបរទេស លោក សុខ ចិន្តាសោភា (កណ្តាល) នាថ្ងៃទី២៦ សីហា បានចេញដំណើរទៅបំពេញទស្សនកិច្ច និងធ្វើជាសហប្រធានកិច្ចប្រជុំលើកទី៤នៃគណៈកម្មការចម្រុះកម្ពុជា-ហ្វីលីពីនសម្រាប់កិច្ចសហប្រតិបត្តិការទ្វេភាគី (JCBC) នៅទីក្រុងម៉ានីល។ ក្រសួងការបរទេស
ភ្នំពេញៈ លោក សុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានធ្វើដំណើរទៅកាន់ប្រទេសហ្វីលីពីននាថ្ងៃទី២៦ សីហា ដើម្បីបំពេញទស្សនកិច្ច និងធ្វើជាសហប្រធានកិច្ចប្រជុំលើកទី៤នៃគណៈកម្មការចម្រុះកម្ពុជា-ហ្វីលីពីនសម្រាប់កិច្ចសហប្រតិបត្តិការទ្វេភាគី (JCBC) ដែលនឹងប្រព្រឹត្តទៅនាថ្ងៃទី២៧-២៨ ខែសីហា នៅទីក្រុងម៉ានីល។
សេចក្ដីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី២៦ សីហា ថា កិច្ចប្រជុំនេះ នឹងធ្វើការតាមដាន និងពិនិត្យឡើងវិញនូវវឌ្ឍនភាពនៃការអនុវត្តកិច្ចព្រមព្រៀង ដែលបានឯកភាពក្នុងកិច្ចប្រជុំ JCBC លើកទី៣ កាលពីឆ្នាំ ២០២១ និងដាក់ចេញផែនការសកម្មភាពថ្មី ដើម្បីបន្តពង្រឹងទំនាក់ទំនងដ៏យូរអង្វែងរវាងប្រទេសទាំងពីរ។
សេចក្ដីប្រកាសព័ត៌មានបន្តថា រដ្ឋមន្ត្រីទាំងពីរ ក៏នឹងពិភាក្សាអំពីការវិវត្តក្នុងតំបន់ និងបញ្ហាអន្តរជាតិដែលជាផលប្រយោជន៍ និងកង្វល់រួមផងដែរ។ លោក សុខ ចិន្តាសោភា នឹងជួបជាមួយលោក Ferdinand Romualdez Marcos ប្រធានាធិបតីហ្វីលីពីន និងចូលរួមកម្មវិធីអាហារថ្ងៃត្រង់ដែលរៀបចំឡើងដោយលោកស្រី Sara Duterte អនុប្រធានាធិបតីហ្វីលីពីន។
លោក ឯក ប៊ុនលី អ្នកស្រាវជ្រាវនៃមជ្ឈមណ្ឌលខ្មែរសិក្សាកិច្ចការតំបន់ (CCRS) ថ្លែងថា កិច្ចប្រជុំ JCBC កម្ពុជា-ហ្វីលីពីនលើកទី៤នេះក៏នឹងផ្ដោតលើការកែលម្អ និងពិនិត្យពាណិជ្ជកម្មទ្វេភាគី ការវិនិយោគ កសិកម្ម និងទំនាក់ទំនងរវាងប្រជាជន និងប្រជាជនផងដែរ។
លោកថា គ្មានអ្វីដែលគួរឱ្យងឿងឆ្ងល់ទេ ថា ទំនាក់ទំនងរបស់ប្រទេសទាំងពីរមានការកើនឡើងចាប់តាំងពីទំនាក់ទំនងការទូតរបស់ខ្លួនឡើងវិញក្នុងទសវត្សរ៍ឆ្នាំ១៩៩០។
លោកជឿជាក់ថា ជំនួបរវាងលោក សុខ ចិន្តាសោភា និងលោក Marcos នឹងនាំមកនូវការពិភាក្សាផ្នែកសន្តិសុខដ៏រសើបជាច្រើនរវាងភាគីទាំងពីរ ជាពិសេសលើបញ្ហាសមុទ្រចិនខាងត្បូងដែលកំពុងតែអូសបន្លាយ ដូចជាការកើនឡើងនៃជម្លោះចិន-ហ្វីលីពីននៅសមុទ្រចិនខាងត្បូង ហើយសំខាន់បំផុតលើសំណួរថាតើលើកនេះ កម្ពុជា និងហ្វីលីពីនអាចធ្វើយ៉ាងដូចម្ដេចបានដើម្បីតម្រឹមគោលជំហររបស់ខ្លួនលើបញ្ហាសមុទ្រចិនខាងត្បូង។
លោក ប៊ុនលី ថ្លែងថា៖ «វាគឺជាផលប្រយោជន៍របស់រដ្ឋមន្ត្រីការបរទេសកម្ពុជាក្នុងការប្រើប្រាស់ ឱកាសនេះដើម្បីដោះស្រាយការយល់ខុសរបស់បស្ចិមលោកអំពីជំហររបស់ទីក្រុងភ្នំពេញ ដែលជារឿយៗត្រូវបានគេយល់ខុសថាជាប្រទេសគាំទ្រចិនផ្កាប់មុខទាក់ទងនឹងសមុទ្រចិនខាងត្បូង។ អព្យាក្រឹតភាពមិនមែនមានន័យថា ការចូលរួមប្លុកណានោះទេ ហើយការជ្រើសរើសគោលជំហររបស់ប្រទេសដែលមិនស្របនឹងមហាអំណាចធំៗក៏មិនគួរត្រូវបានគេចាត់ទុកថាជាការប្រឆាំងប្រទេសណាមួយនោះដែរ»។
លោកពន្យល់ថា លោក សុខ ចិន្តាសោភា និងលោក Marcos អាចសម្រេចបាននូវផលប្រយោជន៍ទ្វេភាគី និងតំបន់សំខាន់ៗនាពេលអនាគត ដោយការផ្លាស់ប្ដូរទស្សនៈរបស់ពួកគេលើវិធីពង្រឹងពហុភាគីនិយមអាស៊ាន ជាពិសេសតាមរយៈការពិភាក្សាអំពីវិធីការពារមហាអំណាចពីការ «លួចយក» វេទិកាដឹកនាំដោយអាស៊ាន ដើម្បីបង្កើត «ប្រព័ន្ធបែងចែកសម្ព័ន្ធមិត្ត (hub-and-spoke)» នៅក្នុងអាស៊ីអាគ្នេយ៍។
លោក ប៊ុនលី ថ្លែងថា៖ «ទោះជាយ៉ាងណាក៏ដោយ យើងមិនគួររំពឹងថា ជំនួបតែមួយរវាងរដ្ឋមន្ត្រីការបរទេសកម្ពុជា និងប្រធានាធិបតីហ្វីលីពីននឹងមានឥទ្ធិពលដល់ទំនាក់ទំនងទ្វេភាគី និងតំបន់ភ្លាមៗបាននោះទេ»៕
