ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត ណែនាំដល់ក្រសួង ស្ថាប័នពាក់ព័ន្ធបន្តយកចិត្តទុកដាក់លើកិច្ចគាំពារ និងលើកស្ទួយសុខុមាលភាពរបស់មនុស្សចាស់ឱ្យកាន់តែប្រសើរឡើង ដោយលោកបានលើកឡើងអំពីតួនាទីដ៏សំខាន់របស់ពួកគាត់ក្នុងការបង្កើតធនធានដ៏មានសារប្រយោជន៍ និងបទពិសោធន៍យ៉ាងច្រើនសម្រាប់មនុស្សជំនាន់ក្រោយ។
ក្នុងសារាចរចុះថ្ងៃទី២៦ សីហា ស្តីពីការរៀបចំទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៤ លោក ហ៊ុន ម៉ាណែត លើកឡើងថា ការប្រារព្ធទិវានេះមានគោលបំណង «លើកកម្ពស់កិច្ចគាំពារដ៏មានប្រសិទ្ធភាពសំដៅលើកស្ទួយសុខុមាលភាពរបស់មនុស្សវ័យចាស់ឱ្យកាន់តែប្រសើរឡើង។ [ទិវានេះ] ក៏បង្ហាញឱ្យឃើញអំពីតួនាទីដ៏សំខាន់របស់មនុស្សវ័យចាស់ បុព្វការីជន ដែលបានបង្កើតធនធានដ៏មានសារប្រយោជន៍ ព្រមទាំងផ្តល់នូវចំណេះដឹង ចំណេះធ្វើ និងបទពិសោធន៍យ៉ាងច្រើនឥតគណនាសម្រាប់មនុស្សជំនាន់ក្រោយ»។
សារាចរដែលផ្សព្វផ្សាយនាថ្ងៃទី២៧ សីហា លើកឡើងថា៖ «រាជរដ្ឋាភិបាលចាត់ទុកទិវាមនុស្សចាស់កម្ពុជា និងទិវាមនុស្សចាស់អន្តរជាតិជាទិវាបុណ្យរំឭកដល់គុណូបការៈរបស់មនុស្សវ័យចាស់កម្ពុជា បុព្វការីជន ជីដូនជីតា ឪពុកម្ដាយ អ៊ំ ពូ មីង ដែលបានកសាង និងបន្សល់ទុកនូវកេរមរតកដ៏ថ្លៃថ្លាសម្រាប់កូនចៅជំនាន់នេះ និងជំនាន់ក្រោយៗទៀត»។
លោក ហ៊ុន ម៉ាណែត ណែនាំឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា គណៈកម្មាធិការជាតិកម្ពុជាដើម្បីមនុស្សចាស់ត្រូវសហការជាមួយក្រសួង ស្ថាប័ន ដៃគូអភិវឌ្ឍ អង្គការមិនមែនរដ្ឋាភិបាល និងអង្គការអន្តរជាតិដែលពាក់ព័ន្ធដើម្បីអបអរសាទរទិវានេះឱ្យបានអធិកអធម។
លោកណែនាំដល់រដ្ឋបាលរាជធានី ខេត្ត ត្រូវរៀបចំពិធីអបអរសាទរទិវានេះ ដោយបង្កលក្ខណៈឱ្យមន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ ព្រះសង្ឃ បព្វជិត ព្រមទាំងប្រជាជនគ្រប់វ័យបានចូលរួមចំណែកតាមគន្លងប្រក្រតីភាពថ្មីដើម្បីបង្កើនការយល់ដឹងឱ្យកាន់តែទូលំទូលាយអំពីសារៈសំខាន់នៃគោលនយោបាយជាតិស្តីពីមនុស្សវ័យចាស់២០១៧-២០៣០។
លោកនាយករដ្ឋមន្ត្រីបញ្ជាក់ថា៖ «រដ្ឋបាលថ្នាក់ក្រោមជាតិត្រូវបន្តផ្តល់កិច្ចអន្តរាគមន៍ជំរុញសកម្មភាពបង្កើតសមាគមមនុស្សចាស់ បន្ថែមទៀតនៅតាមសហគមន៍មូលដ្ឋានឱ្យបានទូទាំងព្រះរាជាណាចក្រកម្ពុជា ស្របតាមផែនការ ដែលបានកំណត់ដោយឈរលើស្មារតីសាមគ្គីភាពជួយគា្នទៅវិញទៅមករវាងមនុស្សវ័យចាស់ទូទៅ ជាពិសេសយកចិត្តទុកដាក់ជួយមនុស្សវ័យចាស់ជរា ព្យាធិ ពិការ ក្រីក្រ គ្មានទីពឹង»។
លោកអំពាវនាវដល់ដៃគូអភិវឌ្ឍន៍ អង្គការមិនមែនរដ្ឋាភិបាល និងអង្គការអន្តរជាតិនានាបន្តជួយគាំទ្រដល់កម្មវិធីអភិវឌ្ឍសមាគមមនុស្សចាស់ដែលមានស្រាប់។
លោក ហ៊ុន ម៉ាណែត ណែនាំដល់គ្រប់ក្រសួង ស្ថាប័ន ដែលមានសមាសភាពក្នុងគណៈកម្មាធិការជាតិកម្ពុជាដើម្បីមនុស្សចាស់ ត្រូវរៀបចំបង្កើតក្រុមការងារទទួលបន្ទុកការងារមនុស្សចាស់ ដើម្បីជំរុញការអនុវត្តគោលនយោបាយជាតិស្តីពីមនុស្សវ័យចាស់២០១៧-២០៣០។
លោកថ្លែងថា៖ «គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវចុះសំណេះសំណាលជាមួយមនុស្សវ័យចាស់ ស្របតាមគោលនយោបាយជាតិស្ដីពីមនុស្សវ័យចាស់២០១៧-២០៣០ នៅតាមមូលដ្ឋាន វត្តអារាម វិហារសាសនានានា ដោយនាំយកជំនួយឧបត្ថម្ភតាមសទ្ធាជ្រះថ្លាជួយដល់មនុស្សវ័យចាស់ ជរា ព្យាធិ ពិការ ក្រីក្រ គ្មានទីពឹង»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ប្រាប់ភ្នំពេញប៉ុស្តិ៍នាថ្ងៃទី២៧ សីហា ថាការដែលលោក ហ៊ុន ម៉ាណែត ណែនាំទៅដល់ក្រសួង ស្ថាប័នឱ្យយកចិត្តទុកដាក់មនុស្សចាស់នេះជារឿងមួយប្រសើរ ប៉ុន្តែក៏ត្រូវមានផែនការសកម្មភាពដើម្បីជួយទៅដល់មនុស្សចាស់ជាក់លាក់ ដែលនេះជាសកម្មភាពមួយដែលអាចមើលឃើញអំពីការប្ដេជ្ញាចិត្តច្បាស់លាស់របស់រដ្ឋាភិបាល។
លោកថ្លែងថា៖ «ទិវាមនុស្សចាស់នេះ យើងអត់ចង់ឃើញកើតឡើងត្រឹមតែទិវាទេ។ ចង់ឃើញមានសកម្មភាពជាក់ស្ដែងដើម្បីគាំពារដើម្បីជួយទៅដល់មនុស្សចាស់។ ហើយរឿងងាយទេ មនុស្សចាស់ត្រូវការអីធំជាងគេ? [គឺ] បញ្ហាការថែទាំសុខភាព។ អ៊ីចឹង ថាតើរដ្ឋមានជួយទំនុកបម្រុងការថែទាំសុខភាពដល់គាត់ទេ? មានផ្ដល់ប័ណ្ណ ប.ស.ស. សម្រាប់ការព្យាបាលជំងឺដល់គាត់ទេ?»។
លោក យង់ គិមអេង បន្តថា៖ «បើសិនជាមានការគិតគូរ ជាដំបូងគឺជាអាទិភាពគឺត្រូវតែគិតគូរអំពីការផ្តល់ប័ណ្ណថែទាំសុខភាព ប.ស.ស. ហ្នឹងឱ្យគាត់អ្នកចាស់ៗ ដែលគាត់មានជីវភាពក្រីក្រ គឺត្រូវតែឱ្យគាត់។ បណ្ណសម្រាប់ថែរក្សាសុខភាពហ្នឹងគឺត្រូវបានអនុវត្តបានយ៉ាងល្អប្រសើរ ហើយគ្មានការរើសអើងពីមន្ទីរពេទ្យ ពីបុគ្គលិក ពីគ្រូពេទ្យអីជាដើម។ នេះជារឿងមួយសំខាន់ដែលអាចធ្វើឱ្យមនុស្សចាស់ហ្នឹងមានសង្ឃឹមសម្រាប់ជីវិតចុងក្រោយ»។
លោកបន្ថែមថា រដ្ឋក៏ត្រូវតែមើលទៅលើជីវភាពរស់នៅរបស់ពួកគាត់ផងដែរ ដោយមនុស្សចាស់ខ្លះក៏មានទីពឹង រីឯមនុស្សចាស់ខ្លះទៀតមិនមានទីពឹង។ នៅពេលមនុស្សចាស់ធ្វើការមិនកើត និងមិនអាចប្រកបមុខរបរបាន ពួកគាត់ត្រូវពឹងទៅលើការថែទាំពីសាច់ញាតិ និងរដ្ឋ។
លោក យង់ គិមអេង លើកឡើងថា៖ «បើសាច់ញាតិក្រីក្រ បើសាច់ញាតិអត់មាន ឬក៏សាច់ញាតិចិត្តមិនបាន ពេលនោះគឺពឹងពាក់ទៅលើរដ្ឋជាអ្នកដែលជួយផ្តល់កិច្ចថែទាំដល់គាត់ ព្រោះថារដ្ឋ គឺត្រូវតែមានការទទួលខុសត្រូវចំពោះពលរដ្ឋ។ រដ្ឋមិនអាចគេចពីការទទួលខុសត្រូវចំពោះពលរដ្ឋបានទេ»៕