ភ្នំពេញៈ អនុប្រធានទី១ នៃអាជ្ញាធរមីន លោក លី ធុជ បានលើកឡើងថា ប្រជាជនកម្ពុជារាប់ពាន់នាក់ដែលរងគ្រោះដោយសារមីន បានទទួលការថែទាំសុខភាព ការស្តារនីតិសម្បទា និងគាំពារផ្លូវចិត្ត ដែលអាចឱ្យពួកគាត់កសាងជីវិតឡើងវិញ និងរួមចំណែកយ៉ាងសំខាន់ដល់កិច្ចការសង្គម តាមរយៈការខិតខំប្រឹងប្រែង និងការប្ដេជ្ញាចិត្តឥតងាករេរបស់រដ្ឋាភិបាលកម្ពុជា។
ការលើកឡើងនេះត្រូវបានធ្វើឡើងក្នុងកម្មវិធីបើកសន្និសីទថ្នាក់តំបន់អឺរ៉ុប ស្តីពីការបង្កើនកិច្ចសហប្រតិបត្តិការ និងការអនុវត្តកិច្ចសង្រ្គោះជនរងគ្រោះដោយសារមីន និងសំណល់ជាតិផ្ទុះពីសង្រ្គាម នាថ្ងៃទី២៦ ខែសីហានេះនៅទីក្រុង Ljubljana ប្រទេស ស្លូវេនី។
តាងនាមកម្ពុជា ជាប្រធានអនុសញ្ញាអូតាវ៉ាឆ្នាំ២០២៤ លោកបញ្ជាក់ប្រាប់សន្និសីទថ្នាក់តំបន់អឺរ៉ុបថា៖ «កម្ពុជាជាប្រជាជាតិមួយដែលធ្លាប់ទទួលបន្ទុកដ៏ធ្ងន់នៃគ្រាប់មីន បានប្រែក្លាយទៅជាពន្លឺនៃក្តីសង្ឃឹម និងភាពធន់»។
យោងតាម អាជ្ញាធរមីនបានឱ្យដឹងថា ចាប់ពីខែមករា ឆ្នាំ១៩៧៩ ដល់ខែកក្កដា ឆ្នាំ២០២៤ កម្ពុជាមានជនរងគ្រោះដោយសារយុទ្ធភណ្ឌគ្រឿងផ្ទុះចំនួន ៦៥ ០៧៤នាក់។ ក្នុងនោះរួមមាន ជនរងគ្រោះដោយសារមីន ៥១ ២០២នាក់ (៧៩ភាគរយ) និងសំណល់ជាតិផ្ទុះពីសង្គ្រាម (ស.ផ.ស)១៣ ៨៧២នាក់(២១ភាគរយ)។ ជនរងគ្រោះស្លាប់មាន ១៩ ៨៣១នាក់ របួស ៣៦ ១៤៨នាក់ និងពិការអវយវៈចំនួន ៩ ០៩៥នាក់ផងដែរ។
ជនរងគ្រោះជាបុរសមាន ៥២ ៦៩៨នាក់ ក្មេងប្រុសអាយុក្រោម ១៨ឆ្នាំមាន ៦ ១២១នាក់ ស្ត្រី ៤ ៧៩៦នាក់ ក្មេងស្រីអាយុក្រោម ១៨ឆ្នាំ ១ ៣៩៦នាក់ និងជនរងគ្រោះមិនស្គាល់អត្តសញ្ញាណ ៦៣នាក់។
ក្នុងសន្និសីទនោះ លោក លី ធុជ បានបន្ថែមថា សមិទ្ធិផលសម្រេចបានកន្លងមកមានសារៈសំខាន់ ប៉ុន្តែវាមិនគ្រប់គ្រាន់ទេ។ ពិភពលោកនៅតែប្រឈមមុខនឹងផលវិបាកដ៏អាក្រក់នៃគ្រាប់មីន ហើយជនរងគ្រោះដោយសារមីនជាច្រើន នៅតែបន្តប្រឈមមុខនឹងឧបសគ្គក្នុងការទទួលបានជំនួយដែលត្រូវការ។
លោក លី ធុជ ក៏បានលើកឡើងដែរថា ការជួបជុំគ្នាដ៏មានសារៈសំខាន់នេះ គឺជារំលឹកអំពីសកម្មភាពសមូហភាព និងឆន្ទៈរួបរួមគ្នា ដើម្បីការងារមនុស្សជាតិ និងជម្នះរាល់ផលលំបាកបន្សល់ទុកនាសម័យសង្រ្គាម និងជម្លោះផ្សេងៗ។ សន្និសីទនេះ មិនត្រឹមតែផ្តោតលើជំនួយជនរងគ្រោះប៉ុណ្ណោះទេ គឺត្រូវគិតលើការលើកកម្ពស់សេចក្តីថ្លៃថ្នូរ សិទ្ធិ និងអនាគតរបស់អ្នករស់រានមានជីវិតពីគ្រាប់មីន និងជនរងគ្រោះគ្រប់រូប។
លោកក៏លើកឡើងដែរថា កាលពី ២៥ ឆ្នាំមុន ពិភពលោកបានចាត់វិធានការយ៉ាងម៉ឺងម៉ាត់ដោយបង្កើតអនុសញ្ញាហាមប្រាមមីនប្រឆាំងមនុស្ស ដែលជាសន្ធិសញ្ញាកើតចេញពីភាពជាដៃគូពិសេសរវាងសង្គមស៊ីវិល និង រដ្ឋាភិបាល ដើម្បីឆ្លើយតបបញ្ហាមនុស្សធម៌ ដែលបង្កឡើងដោយមីនប្រឆាំងមនុស្ស។ ចាប់តាំងពីពេលនោះមក អនុសញ្ញាបានបោះជំហានយ៉ាងសំខាន់ ជាពិសេស ក្នុងការរួមបញ្ចូលជំនួយជនរងគ្រោះទៅក្នុងគោលនយោបាយជាតិដ៏ទូលំទូលាយទាក់ទងនឹងសុខភាព ការអប់រំ និងការងារ។
លោកគូសបញ្ជាក់ថា៖ «ក្នុងនាមជាសហគមន៍សកលលោក យើងត្រូវប្តេជ្ញាចិត្តក្នុងការមិនទុកនរណាម្នាក់ចោល។ ពិភពលោកដែលមានសន្តិភាព មិនមែនគ្រាន់តែអវត្ដមាននៃសង្គ្រាមប៉ុណ្ណោះទេ ប៉ុន្តែត្រូវមានវត្តមាននៃភាពយុត្តិធម៌ សេចក្តីថ្លៃថ្នូរ និងក្តីសង្ឃឹមសម្រាប់មនុស្សជាតិ»។
ក្នុងឱកាសនោះ លោកបានជំរុញឱ្យគ្រប់ភាគីពាក់ព័ន្ធគិតគូរអំពីផែនការសកម្មភាពសៀមរាប-អង្គរថ្មី និងបន្តដឹកនាំប្រកបដោយចក្ខុវិស័យ និងក្តីមេត្តា ដើម្បីស្វែងរកព្រំដែនថ្មី វិធីសាស្រ្តថ្មី ការសហការថ្មី និងការប្តេជ្ញាចិត្តថ្មី ដើម្បីធានាថាគ្មានជនរងគ្រោះណាមួយ ត្រូវបានទុកចោលនោះទេ។ ការអនុវត្តផែនការសកម្មភាពសៀមរាប-អង្គរថ្មីត្រូវមានលក្ខណៈគ្រប់ជ្រុងជ្រោយ ទទួលជោគជ័យ និងមានប្រសិទ្ធភាព៕