កោះកុងៈ ផ្សោតប្រភេទថ្មីមួយក្បាល ដែលការសិក្សាកន្លងមកមិនដែលបានរកឃើញនោះ ត្រូវបានជួយសង្រ្គោះ ក្រោយពីបានជាប់ប្ញសកោងកាង ពេលទឹកស្រក ស្ថិតនៅក្នុងឃុំពាមក្រសោប ស្រុកមណ្ឌលសីមា។
ពលរដ្ឋបានប្រទះឃើញផ្សោតមួយក្បាល ដែលជាប្រភេទថ្មីឈ្មោះថា Risso's dolphin ហើយបានរាយការណ៍ទៅមន្រ្តីជំនាញជលផល។ មន្ត្រីសង្កាត់ជលផលស្មាច់មានជ័យ និង សហគមន៍នេសាទពាមក្រសោបបានទៅជួយសង្គ្រោះផ្សោតនោះនាថ្ងៃទី២៦ ខែសីហា ហើយបានយកទៅប្រលែងវិញ។ នេះបើយោងតាមលោក សេង ប៊ុណ្ណា នាយខណ្ឌរដ្ឋបាលជលផលខេត្តកោះកុងនាថ្ងៃពុធ ទី២៨ ខែសីហានេះ។
ផ្សោតសមុទ្រមួយក្បាលនេះ ជាផ្សោតឈ្មោល ដែលមានប្រវែង ២,៤០ម៉ែត្រ និងទម្ងន់ប្រមាណ ១២០គីឡូក្រាម។
លោកបញ្ជាក់ថា៖ «ពលរដ្ឋផ្ទះគាត់នៅក្បែរហ្នឹងឃើញ ហើយរាយការណ៍មកសហគមន៍។ សហគមន៍បានរាយការណ៍មកមន្រ្តីជលផលដើម្បីជួយ។ វាមកលេង រកចំណីកៀកមកខាង។ ដល់ពេលទឹកនាច រាក់ទៅ វារកកន្លែងត្រឡប់វិញអត់ឃើញ ក៏ចេះតែចូលៗទៅក្នុងព្រៃកោងកាង ក៏ជាប់»។
លោក ប៊ុណ្ណា ក៏បានឱ្យដឹងផងដែរថា ផ្សោតប្រភេទ Risso's dolphin នេះ ជាប្រភេទផ្សោតសមុទ្រថ្មី ដែលការសិក្សាមួយរបស់គម្រោងអង្គការ IUCN កាលពីឆ្នាំ ២០១៥ មិនបានរកឃើញនោះទេ។
លោកថ្លែងថា៖ «តាមការសិក្សាខាង IUCN កាលពីឆ្នាំ ២០១៥ នៅកម្ពុជា មានផ្សោត ១១ប្រភេទ។ ក្នុងនោះ មាន ៣ប្រភេទនៅខេត្តកោះកុង។ ប៉ុន្តែប្រភេទដែលជាប់ហ្នឹងជាប្រភេទថ្មី ដែលការសិក្សានោះអត់មានឃើញវត្តមានវាក្នុងសមុទ្រខេត្កកោះកុង។ ទើបឃើញមានវត្តមានវាកាលពីឆ្នាំទៅ»។
លោកបន្ថែមថា ផ្សោតប្រភេទ Risso's dolphin នេះមានប្រហែលជា ៧ ទៅ ៨ក្បាលប៉ុណ្ណោះ តែផ្សោតទាំង ៣ប្រភេទក្នុងខេត្តកោះកុង ដែលការសិក្សារកឃើញកាលពីឆ្នាំ ២០១៥នោះមានប្រហែលជា ៥០០ក្បាលផងដែរ ហើយត្រូវបានចាត់ទុកថា ជាប្រភេទកំពុងតែរងគ្រោះ។
លោកលើកឡើងថា៖ «អ្នកនេសាទធ្លាប់ចាប់បានដែរកន្លងមក តែគាត់អត់យកទេ។ អ្នកនេសាទមានជំនឿថា យកផ្សោតទៅវាស៊យគេ។ អញ្ជឹងគេអត់យកទេ ទើបលែងវិញ»។
ទោះយ៉ាងណា លោកថា ផ្សោតប្រភេទថ្មីនេះ មិនទាន់មានការចុះបញ្ជីជាផ្លូវការនៅឡើយនោះទេ។ ដោយសារតែខេត្តកោះកុងមានព្រំប្រទល់ជាប់ប្រទេសថៃ ហេតុនេះផ្សោតសមុទ្រទាំងនោះអាចចល័តទៅវិញទៅមកក្នុងផ្ទៃសមុទ្រផងដែរ៕