គ្រោះថ្នាក់ចរាចរណ៍នៅថ្ងៃទី២៨ ខែសីហានេះ បានឆក់យកជីវិតមនុស្សចំនួន ១០នាក់ និងបន្សល់ទុកអ្នករងរបួសចំនួន ៣២នាក់។ នេះបើតាមនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិ។
ចំនួនជនរងគ្រោះនេះកើតឡើងនៅក្នុងគ្រោះថ្នាក់ចរាចរណ៍ចំនួន ១១ ករណីនៅទូទាំងប្រទេសដែលក្នុងនោះ ៦ ករណីបានកើតគិតទាំងកើតឡើងនាពេលយប់។
ករណីគ្រោះថ្នាក់ទាំងនេះ ក៏រួមបញ្ចូលទាំងករណីរថយន្តដឹកកម្មករម៉ាកសាំយ៉ុងបុកជាមួយរថយន្តកុងតឺន័រ កាលពីព្រលឹមថ្ងៃនេះ នៅក្នុងភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុផងដែរ។
សារព័ត៌មានហ្វ្រេសញូវបានស្រង់សម្ដីរបាយការណ៍សមត្ថកិច្ចដែលបញ្ជាក់ថា រថយន្តកុងតឺន័រដែលបើកបរក្នុងទិសដៅពីខេត្តព្រះសីហនុទៅភ្នំពេញ បានវ៉ាជែងជាមួយរថយន្តមួយផ្សេងទៀត ហើយបានបុករថយន្តសាំយ៉ុងដឹកកម្មកររោងចក្រ ក្នុងទិសដៅផ្ទុយគ្នា បណ្ដាលឲ្យអ្នកបើកបររថយន្តសាំយ៉ុងស្លាប់ពេលបញ្ជូនដល់មន្ទីរពេទ្យ និងកម្មករជាស្ត្រីម្នាក់បានស្លាប់។
ហេតុការណ៍នេះក៏បណ្តាលឲ្យមនុស្សរងរបួសធ្ងន់ និង ស្រាល ចំនួន២៥នាក់ ដែលក្នុងនោះមាន១៦នាក់ជាស្ត្រី។
យោងតាមគណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងឆមាសទី១ ឆ្នាំ២០២៤ គ្រោះថ្នាក់ចរាចរណ៍បានកើតឡើង ១៥៣៤លើក បណ្តាលឱ្យស្លាប់៧៩៣នាក់ និងរបួសចំ ២១១៦នាក់ ដែលភាគច្រើនបណ្ដាលមកពីការបើកបរលើសល្បឿនកំណត់។ ក្នុងចំណោមអ្នកស្លាប់ មានអ្នកជិះម៉ូតូក្នុងអត្រា ៧៩ភាគរយ ហើយ៦៧ភាគរយនៃពួកគេមិនបានពាក់មួកសុវត្ថិភាព។
លោក ស សុខា រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានប្រាប់ឲ្យសមត្ថកិច្ចពាក់ព័ន្ធពង្រឹងការអនុវត្តច្បាប់ឲ្យបានតឹងរ៉ឹងដើម្បីកាត់បន្ថយគ្រោះថ្នាក់ចរាចរណ៍ប្រចាំឆ្នាំឲ្យបាន ៥ ភាគរយតាមផែនការដែលបានដាក់ចេញ៕