ភ្នំពេញៈ លោកគុយ វ៉ាត អតីតអ្នកគ្រប់គ្រងជាន់ខ្ពស់ក្នុងក្រុមហ៊ុន ស៊ី អាយ ស៊ី ផាតន័រ (CIC Partner Co.ltd) និងជាថៅកែហាង Park Coffee ត្រូវបានឃុំខ្លួនបណ្តោះអាសន្នក្នុងពន្ធនាគារ ក្រោមការចោទប្រកាន់ពីបទមិនបំពេញកាតព្វកិច្ចចំពោះឧបករណ៍អាចជួញដូរបានកាលពីថ្ងៃអង្គារ ទី២៧ ខែសីហានេះ។ នេះបើយោងតាមលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ។
លោក គុយ វ៉ាត ត្រូវបាននគរបាលព្រហ្មទណ្ឌនៃក្រសួងមហាផ្ទៃបានធ្វើការចាប់ខ្លួនកាលពីថ្ងៃទី២៤ ខែសីហានេះពាក់ព័ន្ធទៅនឹងការចេញសែកអត់ទឹកប្រាក់ និងការឆបោកប្រាក់រាប់លានដុល្លារអាមេរិក។
លោក អ៊ី រិន្ទ បានប្រាប់ភ្នំពេញប៉ុស្តិ៍ នៅថ្ងៃពុធ ទី២៨ សីហានេះថា៖ «ហ្នឹងហើយ ត្រូវបានចោទប្រកាន់ មិនបំពេញកាតព្វកិច្ចចំពោះឧបករណ៍អាចជួញដូរបាន ដែលបានចេញសែកអត់លុយ [ចេញមូលប្បទានបត្រគ្មានសាច់ប្រាក់]។ ហើយត្រូវបានចៅក្រមសម្រេចឃុំខ្លួនកាលពីម្សិលមិញ»។
លោក អ៊ី រិន្ទ សុំមិនធ្វើអត្ថាធិប្បាយបន្ថែមលើករណីនេះ។
យោងតាមមាត្រា ២៣១ នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់សងប្រាក់បានឱ្យដឹងថា បទចោទនេះត្រូវផ្តន្ទាទោសពិន័យជាប្រាក់ចំនួនពី ២លានដល់ ៦លានរៀល និង ត្រូវផ្តន្ទាទោសជាប់ពន្ធនាគារពី ១ឆ្នាំ ទៅ ៣ឆ្នាំ ដោយមិនទាន់គិតដល់កាតព្វកិច្ចទូទាត់សងចំនួនប្រាក់នៃឧបករណ៍អាចជួញដូរបាននោះទៅអ្នកកាន់។
ទាក់ទងនឹងរឿងអាស្រូវនៅក្នុងពិភពអ្នកជំនួញនេះផងដែរ តុលាការខេត្តសៀមរាបបានបញ្ជាឱ្យអាជ្ញាធរមានសមត្ថកិច្ចតាមរកចាប់ខ្លួនលោកស្រីឧកញ៉ាលី អ៊ុំអេង ពាក់ព័ន្ធទៅនឹងការប្រើប្រាស់ឯកសារសាធារណៈក្លែងកាលពីឆ្នាំ ២០២២ ក្រោយពីចេញដីកានាំខ្លួន ប៉ុន្តែជនត្រូវចោទបានគេចខ្លួនបាត់។
អ្នកនាំពាក្យសាលាដំបូងខេត្តសៀមរាប លោក យិន ស្រាង ប្រាប់ភ្នំពេញប៉ុស្តិ៍នៅថ្ងៃពុធ ទី២៨ ខែសីហាថា តំណាងចៅក្រមនៃអយ្យការអមសាលាដំបូងខេត្តសៀមរាបបានចេញដីកាបង្គាប់ឱ្យចាប់ខ្លួនលោកស្រីឧកញ៉ា លី អ៊ុំអេង ក្នុងសំណុំរឿង« ប្រើប្រាស់ឯកសារសាធារណៈក្លែង» ប៉ុន្តែលោកអះអាងថា លោកមិនបានដឹងថា អ្នកណាជាដើមបណ្តឹងក្នុងសំណុំរឿងនេះនោះទេ។
លោកបញ្ជាក់ថា៖ «សំណុំរឿងនេះនៅដៃចៅក្រម។ ខាងនេះ [ចៅក្រម] បានចេញដីកាឱ្យអនុវត្តហើយ។ ការងារអនុវត្តខាងនគរបាលយុត្តិធម៌អ្នកធ្វើ។ រឿងអនុវត្តបានសម្រេច ឬមិនបានសម្រេចនៅលើគាត់»។
កាលពីថ្ងៃទី៧ ខែសីហានេះ លោក ហេង ឈៀងគ្រី ចៅក្រមស៊ើបសួរ នៃសាលាដំបូងខេត្តសៀមរាបបានចេញដីកាបង្គាប់ឱ្យនាំខ្លួនលោកស្រី លី អ៊ុំអេង អាយុ ៥២ឆ្នាំ ដែលមានអាសយដ្ឋានបច្ចុប្បន្ននៅបុរីសៀងណាំ ផ្ទះលេខ១៧ ផ្លូវ០១ ភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ក្រោយពីស្រ្តីរូបនេះបានរត់គេចខ្លួន។
ដីកាសរសេរថា៖ «ឈ្មោះ លី អ៊ុំអេង ត្រូវបានដាក់ក្រោមការពិនិត្យពីបទ ប្រើប្រាស់ឯកសារសាធារណៈក្លែង ប្រព្រឹត្តនៅក្រុងសៀមរាប ខេត្តសៀមរាប កាលពីអំឡុងខែកុម្ភៈរហូតដល់ខែតុលាឆ្នាំ ២០២២ បទល្មើសព្រហ្មទណ្ឌមានចែង និងកំណត់ឱ្យផ្តន្ទាទោសតាមបញ្ញត្តិមាត្រា៦៣០ នៃក្រមព្រហ្មទណ្ឌ»។ ជនត្រូវចោទរូបនេះ ត្រូវបានចោទប្រកាន់ពីបទមជ្ឈិម ដែលត្រូវផ្តន្ទាទោសដាក់ពន្ធនាគារ។
មុនពេលចេញដីកាបង្គាប់ឱ្យចាប់ខ្លួននេះ តុលាការបានចេញដីកាបង្គាប់ឱ្យនាំខ្លួន។ ប៉ុន្តែកងរាជអាវុធហត្ថខេត្តសៀមរាបបានបញ្ជាក់ក្នុងលិខិតចុះថ្ងៃទី២៥ ខែកក្កដា ឆ្នាំ២០២៤ ស្តីពីការអនុវត្តដីកាបង្គាប់ឱ្យនាំខ្លួនថា កម្លាំងជំនាញបានចុះដល់លំនៅដ្ឋានជនត្រូវចោទ តែរកពុំឃើញ។
លោកចៅក្រមស៊ើបសួរ ហេង ឈៀងគ្រី បានបញ្ជាក់ក្នុងដីកាបន្តថា ដើម្បីធានាដល់ការស៊ើបសួរឱ្យបានពេញលេញទៅតាមនីតិវិធីច្បាប់ គប្បីចេញដីកាបង្គាប់ឱ្យចាប់ខ្លួន ជនត្រូវចោទឈ្មោះ លី អ៊ុំអេង មកបង្ហាញខ្លួនចំពោះមុខចៅក្រមស៊ើបសួរនៃសាលាដំបូងខេត្តសៀមរាប ដើម្បីចាត់ការបន្តតាមនីតិវិធី។
លោកចៅក្រមបានបញ្ជាដល់កងកម្លាំងសាធារណៈឱ្យស្រាវជ្រាវរកចាប់និងនាំខ្លួន ឈ្មោះ លី អ៊ុំអេង ទៅក្នុងពន្ធនាគារ ឬ មណ្ឌលឃុំខ្លួន។ លើសពីនោះ ក៏បានបញ្ជាដល់ប្រធានពន្ធនាគារ ឬមណ្ឌលឃុំខ្លួនឱ្យទទួលនិងឃុំខ្លួនជនត្រូវចោទឈ្មោះ លី អ៊ុំអេង និងត្រូវនាំទៅបង្ហាញដល់ចៅក្រមស៊ើបសួរក្នុងរយៈពេលយ៉ាងខ្លីបំផុត ប្រសិនបើស្ថិតក្នុងដំណាក់កាលស៊ើបសួរនៅឡើយ។
លោកស្រី លី អ៊ុំអេង ត្រូវបានត្រាស់បង្គាប់តែងតាំងជា «ឧកញ៉ា» តាមរយៈព្រះរាជក្រឹត្យមួយកាលពីខែមករា ឆ្នាំ២០១៣។
ទោះយ៉ាងណា ឧកញ៉ា ហ៊ុន ឡាក់ អ្នកនាំពាក្យសមាគមឧកញ៉ាកម្ពុជាបានឱ្យដឹងថា លោកមិនបានដឹងទេថា លោកស្រី លី អ៊ុំអេង នៅមានង៉ាជាឧកញ៉ាទៀត ឬយ៉ាងណានោះទេ។
លោកថ្លែងថា៖ «ខ្ញុំអត់ទាន់បានដឹងដែរ។ គាត់មិនមែនជាសមាជិកផង ដោយសារតែសមាគមយើងអត់ទាន់បានធ្វើបច្ចុប្បន្នភាពគោរមងារ។ នៅពេលធ្វើបច្ចុប្បន្នកម្មគោរមវន្តឡើងវិញទាំងអស់ បានងាយស្រួល»។
លោកបានលើកឡើងថា ការប្រព្រឹត្តសកម្មភាពផ្សេងៗរបស់អ្នកដែលមានងារ ឬមិនមែនងារជាឧកញ៉ានោះ គឺជាបញ្ហាបុគ្គលផ្ទាល់ខ្លួន ដែលមិនពាក់ព័ន្ធទៅនឹងសមាគមនោះទេ។
លោកបានឱ្យដឹងដែរថា បើយោងតាមសៀវភៅព្រះរាជកិច្ចមានឧកញ៉ាជាង ១ ៤០០រូប។ ប៉ុន្តែចំនួនពិតប្រាកដនាពេលបច្ចុប្បន្ននេះគឺមិនទាន់ជាក់លាក់នោះទេ។
ក្រៅពីមានបញ្ហាដីធ្លីជាមួយនឹងបុគ្គលឯកជនផ្សេងៗ លោកស្រីឧកញ៉ា លី អ៊ុំអេង ដែលជាអ្នកជំនួញអចលនទ្រព្យរូបនេះក៏មានរឿងក្តីពីបញ្ហាដីធ្លីជាមួយនឹងអាជ្ញាធរជាតិអប្សរាផងដែរនាពេលកន្លងមក៕