![](https://pppkhmer.sgp1.digitaloceanspaces.com/image/main/20248/28_8_2024_drug_arrested.jpg)
ជនល្មើសចំនួន ៦នាក់ជាមួយថ្នាំញៀន ជិត៤០០គីឡូក្រាម ត្រូវមន្ទីរប្រឆាំងគ្រឿងញៀន ចុះបង្ក្រាបបាននៅ ៣ទីតាងផ្សេងគ្នា ក្នុងរាជធានីភ្នំពេញកាលពីចុងសប្តាហ៍មុន។ រូបថត Anti-drug Department
ភ្នំពេញៈ ថ្នាំញៀនជិត ៤០០គីឡូក្រាម និងជនសង្ស័យចំនួន ៦នាក់ ត្រូវបានមន្ទីរប្រឆាំងគ្រឿងញៀនធ្វើការរឹបអូស និងឃាត់ខ្លួននៅក្នុងទីតាំងចំនួន ៣ផ្សេងគ្នា ក្នុងរាជធានីភ្នំពេញ កាលពីចុងសប្តាហ៍មុន។ នេះបើយោងតាមមន្ទីរប្រឆាំងគ្រឿងញៀននៅថ្ងៃពុធ ទី២៨ ខែសីហានេះ។
ការបង្រ្កាបនេះត្រូវបានធ្វើឡើងក្រោមកិច្ចសហការរវាងកម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក៤) និងស្នងការដ្ឋាននគរបាលរាជធានីភ្នំពេញ ដោយមានការដឹកនាំនិងសម្របសម្រួលដោយលោក គឹម ហុងសាន ព្រះរាជអាជ្ញារងអមសាលាដំបូងរាជធានីភ្នំពេញនាថ្ងៃទី២៤ ខែសីហានេះ។
កងកម្លាំងបានចុះស្រាវជ្រាវស៊ើបអង្កេតរហូតឈានទៅបង្ក្រាបករណីរក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀនស្ថិតនៅ៣ទីតាំង។ ក្នុងនោះរួមមានទីតាំងទី១ ស្ថិតនៅចំណុចបុរីផុងស៊ុយ សង្កាត់កាកាប១ ខណ្ឌពោធិ៍សែនជ័យ។ ទីតាំងទី២ ស្ថិតនៅចំណុចផ្ទះលេខ WG ផ្លូវលេខ៦ ភូមិទួលសំពៅ សង្កាត់ទួលសង្កែ១ ខណ្ឌឬស្សីកែវ និងទីតាំងទី៣ ស្ថិតនៅចំណុចបុរីលឹមឈាងហាក់ ហ្គ្រីនហូម ផ្ទះលេខ១៦D ផ្លូវលេខ២A ភូមិកំរៀង សង្កាត់កន្ទោក ខណ្ឌកំបូល រាជធានីភ្នំពេញ។
វត្ថុតាងដែលត្រូវបានរកឃើញនិងរឹបអូសរួមមាន៖ គ្រឿងញៀនប្រភេទមេតំហ្វេតាមីន (ICE) ២៥៤ ២៩២, ៤០ក្រាម, គ្រឿងញៀនប្រភេទកេតតាមីន (Ketamine) ១២៧ ៦០៦,៨០ក្រាម, គ្រឿងញៀនហេរ៉ូអ៊ីន (Heroine) ៧ ៧០០ក្រាម ដែលសរុបគ្រឿងញៀន ៣៨៩គីឡូ ៥៩៩.២០ក្រាម។ ក្រៅពីនោះក៏មានរថយន្ត Pruise១គ្រឿងផងដែរ។
រីឯជនសង្ស័យទាំង ៦នាក់នោះជាជនជាតិខ្មែរ រួមមានស្រ្តី ២នាក់ផងដែរ។ ក្នុងនោះរួមមានស្រ្តីឈ្មោះប៊ុន ម៉ាឡែន អាយុ៥១ឆ្នាំ, ស្រ្តីឈ្មោះ សេង គីម អាយុ២៦ឆ្នាំ និងបុរស៤នាក់ មានឈ្មោះ រី សុខលិ អាយុ ២៣ឆ្នាំ, ឈ្មោះដាំ ប្រុសពៅ អាយុ ២៨ឆ្នាំ, ឈ្មោះ ជួន ចំរើន អាយុ ៣៥ឆ្នាំ និងឈ្មោះ អេង គីមសាយ អាយុ ២៤ឆ្នាំ។
មន្ទីរប្រឆាំងគ្រឿងញៀនបានបញ្ជាក់ថា បច្ចុប្បន្នជនសង្ស័យនិងវត្ថុតាងត្រូវបានកម្លាំងជំនាញកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញដើម្បីចាត់ការតាមនីតិវិធី។
ទាក់ទងនឹងករណីគ្រឿងញៀននេះដែរ តុលាការខេត្តព្រះសីហនុក៏បានសម្រេចធ្វើការឃុំខ្លួនបុរសជាជនជាតិចិនម្នាក់ឈ្មោះលូ តា (LU DA) អាយុ ៤១ឆ្នាំនៅពន្ធនាគារក្រោមការចោទប្រកាន់ពីបទដឹកជញ្ជូន, ជួញដូរដោយខុសច្បាប់នូវសារធាតុញៀន និងបទឆ្លងដែនចូលមកកម្ពុជាដោយគ្មានការអនុញ្ញាតតាមបញ្ញត្តិមាត្រា៤០ នៃច្បាប់ស្តីពីការត្រួតពិនិត្យគ្រឿងញៀននិងមាត្រា២៩ នៃច្បាប់ស្តីពីអន្តោប្រវេសន៍កាលពីថ្ងៃទី២៦ ខែសីហានេះ។
យោងតាមសេចក្តីប្រកាសរបស់តុលាការខេត្តបានឱ្យដឹងថា កម្លាំងសមត្ថកិច្ចបានធ្វើការកាក់ឃាត់រថយន្ត ១គ្រឿង ម៉ាក LEXUS RX-300 ពណ៌ខ្មៅ នៅចំណុចគោលដៅត្រួតពិនិត្យអាវុធ គ្រឿងផ្ទុះ និងធ្វើតេស្តរកសារធាតុញៀន។ លើសពីនោះបានត្រួតពិនិត្យនិងឆែកឆេរក្នុងរថយន្តរកឃើញមានវត្ថុតាងថ្នាំញៀនប្រភេទអ៊ុចស្តាស៊ី (MDMA) ចំនួន២ កញ្ចប់ធំ ទម្ងន់សរុបជាង ១០គីឡូក្រាមដែលលាក់ទុកក្នុងវ៉ាលី។
កម្លាំងសមត្ថកិច្ចក៏បានធ្វើការឃាត់ខ្លួនជនសង្ស័យឈ្មោះ លូ តា នេះតែម្តង៕