![](https://pppkhmer.sgp1.digitaloceanspaces.com/image/main/20248/28_8_2024_photo_2024_08_27_22_57_27.jpg)
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងប្រតិភូសុខាភិបាលបានអញ្ជើញចុះត្រួតពិនិត្យការរៀបចំទីតាំងផ្នែកចត្តាឡីស័ក នៅថ្ងៃទី ២៨ ខែសីហានេះ។ ក្រសួងសុខាភិបាល
ភ្នំពេញ៖ ក្រសួងសុខាភិបាលបានរៀបចំទីតាំងចត្ដាឡីស័កនៅអាកាសយានដ្ឋានអន្តរជាតិភ្នំពេញ ក្នុងបំណងទប់ស្កាត់ការនាំចូលជំងឺអឹមផក Mpox ឬអុតស្វា។
វិធានការនេះ ធ្វើឡើងដើម្បីពិនិត្យរួមគ្នាក្នុងការទប់ស្កាត់ការនាំចូលជំងឺអឹមផក (Mpox Clade 1b) ចូលមកកម្ពុជា នៅតាមច្រកទាំងអស់ និងវិធានការការពារ ក៏ដូចជាផ្ញើសារក្រើនរំឭកដល់អ្នកដំណើរទាំងអស់។
នៅថ្ងៃទី ២៨ ខែសីហានេះ លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងប្រតិភូសុខាភិបាលបានអញ្ជើញចុះត្រួតពិនិត្យការរៀបចំទីតាំងផ្នែកចត្តាឡីស័ក ដើម្បីឆ្លើយតបនឹងជំងឺអឹមផក (Mpox)។
យោងតាមក្រសួងសុខាភិបាល (MoH) បានឱ្យដឹងថា៖ «ការត្រួតពិនិត្យនេះមានគោលបំណងវាយតម្លៃប្រសិទ្ធភាពនៃវិធានការបង្ការបច្ចុប្បន្ន និងពង្រឹងការការពាររបស់ប្រទេសប្រឆាំងនឹងការរីករាលដាលនៃមេរោគ Mpox»។
ការផ្តោតអារម្មណ៍របស់គណៈប្រតិភូគឺលើការធានាថា អ្នកដំណើរទាំងអស់ដែលចូល និងចេញពីប្រទេសកម្ពុជាត្រូវស្ថិតនៅក្រោមការត្រួតពិនិត្យសុខភាពយ៉ាងម៉ត់ចត់។
ក្រសួងសុខាភិបាលបានបន្តថា៖ «ពង្រឹងយន្តការបន្ថែមទៀតយ៉ាងម៉ត់ចត់ក្នុងការតាមដានកម្តៅ ដោយប្រព័ន្ធកាមេរ៉ា និងការអង្កេតតាមដានរាល់អ្នកដំណើរគ្រប់ច្រកចេញចូលទាំងអស់ ហើយក្នុងករណីមានការសង្ស័យ មន្ត្រីចត្តាទ្បីស័ករបស់ក្រសួងសុខាភិបាល នឹងចាត់ចែងអនុវត្តតាមគោលការណ៍ណែនាំក្នុងការទប់ស្កាត់នឹងឆ្លើយតបទៅនឹងការរាតត្បាតនៃជំងឺឆ្លងជាបន្ទាន់»។
លើសពីនេះ ក្រុមការងាររបស់ក្រសួង បានបំពាក់បន្ថែមនូវម៉ាស៊ីនស្កែនកម្ដៅ និងរៀបចំតម្លើងរូបភាព សារជាវីដេអូសំខាន់ៗ ជាសារអប់រំ និងវិធានការនានា ដល់គ្រប់អ្នកដំណើរស្តីពីជំងឺអឹមផក (Mpox)។
ការត្រួតពិនិត្យនេះមិនត្រូវបានកំណត់ចំពោះមន្ត្រីសុខាភិបាលនោះទេ។
តំណាងមកពីរដ្ឋលេខាធិការដ្ឋានអាកាសចរស៊ីវិល អគ្គនាយកដ្ឋាននគរបាលអន្តោប្រវេសន៍ អគ្គនាយកដ្ឋានគយ និងរដ្ឋាករកម្ពុជា តំណាងក្រុមហ៊ុនបារាំង និងសហការីតំណាងនាយកដ្ឋានប្រយុទ្ធជំងឺឆ្លង (CDC) ព្រមទាំងក្រុមការងារចត្តាទ្បីស័ក ប្រចាំអាកាសយានដ្ឋានអន្តរជាតិភ្នំពេញ និងមន្ត្រីពាក់ព័ន្ធទាំងអស់ ក៏បានចូលរួមផងដែរ៕