![](https://pppkhmer.sgp1.digitaloceanspaces.com/image/main/20248/30_8_2024_during_a_june_26_inspection_ouk_vuthy_undersecretary_of_state_at_the_water_resources_ministry_ordered_the_removal_of_illegally_contructed_brick_walls_water_resources_ministry.jpg)
ក្រុមការងារបច្ចេកទេសចុះពិនិត្យទីតាំងដីចំណីស្ទឹងព្រែកត្នោតដែលរងការរំលោភបំពាន ក្នុងភូមិសាស្ត្រស្រុកកណ្ដាលស្ទឹង ខេត្តកណ្តាល និងខណ្ឌកំបូល រាជធានីភ្នំពេញ កាលពីខែ មិថុនា។ រូបថត ក្រសួងធនធានទឹក
ភ្នំពេញៈ ក្រសួងធនធានទឹក និងឧតុនិយមស្នើឱ្យមានវិធានការតាមផ្លូវច្បាប់លើ «ជនរឹងរូស» ដែលបន្តរំលោភបំពានស្ទឹងព្រែកត្នោត ហើយឱ្យពលរដ្ឋដែលបានចូលកាន់កាប់រួចមកហើយនោះធ្វើការរុះរើសំណង់ចេញដោយស្ម័គ្រចិត្ត។
សំណើរនេះត្រូវបានធ្វើឡើង ក្រោយពីក្រសួងបានសង្កេតឃើញថា នាពេលថ្មីៗនេះ មានក្រុមជនមួយចំនួនបានធ្វើសកម្មភាពរំលោភបំពានតាមបណ្តោយដងស្ទឹងព្រែកត្នោតដូចជា ការចាក់ដីរំលោភចូលស្ទឹងព្រែកត្នោត ការរំលោភកាន់កាប់មាត់ច្រាំងស្ទឹងព្រែកត្នោត និងការរំលោភចូលដីចំណីស្ទឹងព្រែកត្នោត ដែលមានចម្ងាយ ៣០ម៉ែត្រពីមាត់ច្រាំងស្ទឹងជាដើម។
សេចក្តីជូនដំណឹងរបស់ក្រសួងធនធានទឹកចុះថ្ងៃទី២៩ ខែសីហា បានស្នើដល់អាជ្ញាធរ មានសមត្ថកិច្ចពាក់ព័ន្ធ «ជាពិសេសរដ្ឋបាលខេត្តកំពង់ស្ពឺ ខេត្តកណ្តាល និងរដ្ឋបាលរាជធានីភ្នំពេញ ចូលរួមសហការទប់ស្កាត់ និងចាត់វិធានការតាមផ្លូវច្បាប់លើជនរឹងរូស ដែលពុំព្រមសហការជាមួយអាជ្ញាធរ ហើយនៅតែបន្តសកម្មភាពរំលោភប៉ះពាល់ដល់ទ្រព្យសម្បត្តិសាធារណៈរបស់រដ្ឋនៅតាមបណ្តោយដងស្ទឹងព្រែកត្នោត»។
ក្រសួងបានលើកឡើងថា ដងស្ទឹងព្រែកត្នោត រួមទាំងមាត់ច្រាំង ស្ទឹង និងដីចំណីស្ទឹងចម្ងាយ ៣០ម៉ែត្រ ពីមាត់ច្រាំងស្ទឹង គឺជាទ្រព្យសម្បត្តិសាធារណៈរបស់រដ្ឋដែលការពារដោយ រដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តជាធរមាន។ ទ្រព្យសម្បត្តិសាធារណៈរបស់រដ្ឋ ជាទ្រព្យសម្បត្តិ ដែលត្រូវបានប្រើប្រាស់ជាប្រយោជន៍សាធារណៈ ហើយបុគ្គលមិនអាចយកមកធ្វើជាកម្មសិទ្ធិបានឡើយ ទោះបីជាខ្លួនបានចូលកាន់កាប់តាំងពីពេលណាមកក៏ដោយ (ពុំមានអាជ្ញាយុកាល)។
មាត្រា៨១ នៃច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ដែលប្រកាសឱ្យប្រើដោយព្រះរាជក្រម ចុះថ្ងៃទី១៤ ខែវិច្ឆិកា ឆ្នាំ២០២០ ចែងថា៖ «រាល់អំពើរំលោភកាន់កាប់ទ្រព្យសម្បត្តិរដ្ឋ ជាអចលនទ្រព្យដោយខុសច្បាប់ ត្រូវផ្តន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ៤លានរៀល ដល់ ១០លានរៀល។
ក្រសួងក៏បានអំពាវនាវដល់សាធារណជន ឱ្យចូលរួមថែរក្សាការពារទ្រព្យសម្បត្តិរបស់រដ្ឋ ជាពិសេសដងស្ទឹងព្រែកត្នោត មាត់ច្រាំងស្ទឹង និងដីចំណីស្ទឹងចម្ងាយ ៣០ម៉ែត្រពីមាត់ច្រាំងស្ទឹង ដែលជាប្រភពទឹកដ៏សំខាន់សម្រាប់បម្រើដល់ជីវិតមនុស្ស សត្វ និងរុក្ខជាតិ។
ក្រៅពីនោះ ក្រសួងក៏បានអំពាវនាវដល់ពលរដ្ឋដែលបានចូលកាន់កាប់មាត់ច្រាំងស្ទឹងព្រែកត្នោត និងដីចំណីស្ទឹងព្រែកត្នោតចម្ងាយ ៣០ម៉ែត្រ ពីមាត់ច្រាំងស្ទឹង ដោយពុំបានដឹងអំពីបទប្បញ្ញត្តិច្បាប់ជាធរមាននេះ «សហការរុះរើសំណង់ និងដកចេញដោយស្ម័គ្រចិត្ត» ដើម្បីចូលរួមអនុវត្តគម្រោងរំដោះទឹកជំនន់ស្ទឹងព្រែកត្នោត។
លោក គង់ ឈុនលី នាយករដ្ឋបាលស្តីទីខេត្តកំពង់ស្ពឺ មានប្រសាសន៍ដោយខ្លីថា អាជ្ញាធរខេត្តនឹងចាត់ចែងដោះស្រាយបញ្ហានេះ ទៅតាមសំណើររបស់ក្រសួងធនធានទឹក។
លោក ជី ស៊ីវុត្ថា នាយករដ្ឋបាលខេត្តកណ្តាល និងលោក ចាប វន្នី ប្រធានមន្ទីរព័ត៌មានខេត្ត និងជាអ្នកនាំពាក្យរដ្ឋបាលខេត្តកណ្តាលផងនោះមិនទាន់បានទទួលព័ត៌មានពីករណីនេះនៅឡើយទេ។
លោក ឌឹម បូរ៉ា អភិបាលរងខេត្ត និងជាអ្នកនាំពាក្យរដ្ឋបាលខេត្តកណ្តាលជាប់រវល់មិនអាចធ្វើអត្ថាធិប្បាយបានផងដែរ។
អនុរដ្ឋលេខាធិការក្រសួងធនធានទឹក លោក អ៊ុក វុទ្ធី បានដឹកនាំក្រុមការងារដែលរួមមានទាំងមេធាវីផងនោះ ចុះពិនិត្យទីតាំងដីចំណីស្ទឹងព្រែកត្នោត ដែលរងការរំលោភបំពាន ក្នុងភូមិសាស្ត្រស្រុកកណ្ដាលស្ទឹង ខេត្តកណ្តាល និងខណ្ឌកំបូល ក្នុងរាជធានីភ្នំពេញកាលពីថ្ងៃទី២៦ ខែមិថុនាកន្លងមក។
លោកអនុរដ្ឋលេខាធិការបានពិនិត្យសង្កេត និងស្រាវជ្រាវ ប្រវត្តិនៃការសាងសង់លំនៅឋាន និងបោះបង្គោលព្រំចាប់យកដី នៅលើដីចំណីស្ទឹងព្រែកត្នោត ដើម្បីអនុវត្តតាមនីតិវិធីច្បាប់។ លើសពីនោះក៏បាន វាយកម្ទេចសំណង់របងឥដ្ឋខុសច្បាប់ ដែលសង់ហ៊ុមព័ទ្ធយកដីចំណីស្ទឹងព្រែកត្នោត ដែលជាដីសាធារណ:របស់រដ្ឋ និងដែលត្រូវរក្សាទុកជាប្រយោជន៍សាធារណ:ផងដែរ។ នេះបើយោងតាមក្រសួងធនធានទឹក។
ប្រព័ន្ធរំដោះទឹកស្ទឹងព្រែកត្នោត ដែលមានប្រវែង ២៦០គីឡូម៉ែត្រ កំពុងតែត្រូវបានសាងសង់ ដើម្បីបញ្ជៀសការជន់លិចរាជធានីភ្នំពេញ ដែលទឹកហូរធ្លាក់មកពីភ្នំឱរ៉ាល់ ក្នុងខេត្តកំពង់ស្ពឺ៕