![](https://pppkhmer.sgp1.digitaloceanspaces.com/image/main/20248/30_8_2024_arey_ksat_bridge.jpg)
រូបថតតំណាងស្ពានមិត្តភាពកម្ពុជា-កូរ៉េ។ ដោយ ក្រសួងសាធារណការនិងដឹកជញ្ជូន
ពលរដ្ឋនៅក្រុងអរិយក្សត្រខេត្តកណ្ដាល បង្ហាញក្ដីរីករាយដែលទទួលបានដំណឹងថា ស្ពានមិត្តភាពកម្ពុជា-កូរ៉េ នឹងចាប់ផ្ដើមសាងសង់នៅខែមិថុនាឆ្នាំក្រោយ។ អ្នកវិភាគសេដ្ឋកិច្ចថ្លែងថា ស្ពាននេះនឹងផ្ដល់ផលប្រយោជន៍យ៉ាងច្រើនជាពិសេសបង្រួមការធ្វើដំណើរមកទីក្រុងភ្នំពេញកាត់តែតូច។
លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានថ្លែងប្រាប់សារព័ត៌មានកាលពីថ្ងៃទី២៩ខែសីហាថា ស្ពានដែលពលរដ្ឋនៅត្រើយខាងកើតទីក្រុងភ្នំពេញទន្ទឹងរង់ចាំជាយូរមកហើយ នឹងត្រូវបើកការដ្ឋានសាងសង់នៅរង្វង់ខែមិថុនាឆ្នាំក្រោយ ដោយប្រើប្រាស់រយៈពេលសាងសង់ ៦០ ខែ ក្នុងទឹកប្រាក់ ២៣៥លានដុល្លារដែលជាកម្ចីរបស់ធនាគារមួយនៅកូរ៉េខាងត្បូង។
ស្ពាននេះចេញពីម្ដុំផ្សាររាត្រីក្នុងខណ្ឌដូនពេញទៅកាន់ក្រុងអរិយក្សត្រខេត្តកណ្ដាល មានប្រវែងសរុប ២៣៧៥ម៉ែត្រ ទទឹង២៧,៥ម៉ែត្រ។
លោក កែវ ដួង ពលរដ្ឋម្នាក់រស់នៅក្រុងអរិយក្សត្របង្ហាញក្ដីរីករាយនៅពេលដែលព័ត៌មានច្បាស់ការអំពីការសាងសង់ស្ពាននេះត្រូវបានប្រកាសជាផ្លូវកា ដែលព័ត៌មាននេះលោកនិងពលរដ្ឋក្នុងក្រុងនេះទន្ទឹងរង់ចាំជាយូរមកហើយ។
លោកថ្លែងថា៖ «ដោយសារខ្ញុំជាអ្នករស់នៅក្រុងអរិយក្សត្រ ដំណឹងនេះជាដំណឹងមួយគួរឲ្យរំភើបដែរដោយសារព័ត៌មានចុងក្រោយនេះមានភាពជាក់លាក់ ទាំងប្រភពថវិកា និងការរៀបចំច្បាស់លាស់ នេះជាព័ត៌មានគួរឲ្យរីករាយ។ ខ្ញុំគិតថា អ្នករស់នៅក្រុងអរិយក្សត្រក៏មានអារម្មណ៍មិនខុសគ្នាដែរ»។
លោកបន្តថា៖ «បច្ចុប្បន្ននេះអ្នករស់នៅក្រុងអរិយក្សត្រត្រូវចំណាយពេលក្នុងការធ្វើដំណើរពីផ្ទះមកដល់កន្លែងរង់ចាំសាឡាងមិនច្រើនទេ តែការរង់ចាំសាឡាងនិងជិះលើសាឡាង ត្រូវការចំណាយពេលច្រើន។ ចំពោះរឿងសុវត្ថិភាព ប្រាកដណាស់នៅពេលមានស្ពានយើងអាចមកធ្វើការនៅភ្នំពេញ ឬនាំកូនចូលមករៀននៅសាលាក្នុងទីក្រុងភ្នំពេញ ដោយសុវត្ថិភាព មិនបារម្ភដូចការជិះសាឡាងពេលមានភ្លៀងឬខ្យល់»។
លោករំពឹងថា សេដ្ឋកិច្ច ហេដ្ឋារចនាសម្ព័ន្ធ នៅក្រុងអរិយក្សត្រនឹងមានភាពរីកចម្រើន ហើយពលរដ្ឋនឹងចូលទៅរស់នៅទីនោះកាន់តែច្រើន។
លោក ហុង វណ្ណៈ អ្នកស្រាវជ្រាវផ្នែកសេដ្ឋកិច្ចនៅរាជបណ្ឌិត្យសភាកម្ពុជា បានថ្លែងថា ស្ពាននេះនឹងផ្ដល់ផលប្រយោជន៍ច្រើនសម្រាប់កម្ពុជា ពោលគឺបង្រួមការធ្វើដំណើរទៅនិងមកទីក្រុងភ្នំពេញកាន់តែតូច។
លោកថា អចលនទ្រព្យនៅតំបន់អរិយក្សត្រនឹងមានឡើងថ្លៃ សូម្បីតែពេលកន្លងទៅគ្រាន់តែឮថាគម្រោងធ្វើស្ពាន បានហក់ឡើងរួចទៅហើយ។ លោករំពឹងថា ស្ពាននេះនឹងជួយឲ្យមានកំណើនខុនដូរ សណ្ឋាគារ ភោជនីយដ្ឋាន និងទីតាំងពាណិជ្ជកម្ម ជាច្រើន ប
លោកថា៖ «សកម្មភាពទាំងអស់នេះហើយដែលរួមចំណែកដល់សេដ្ឋកិច្ចសង្គមមួយផ្នែកធំ រួមចំណែកក្នុងការអភិវឌ្ឍសេដ្ឋកិច្ចជាតិរបស់យើងជាបន្តបន្ទាប់ ដែលធ្វើឲ្យសេដ្ឋកិច្ចកម្ពុជាមានភាពធន់មួយកម្រិតថែមទៀត»៕