![](https://pppkhmer.sgp1.digitaloceanspaces.com/image/main/20248/30_8_2024_frozen_meats.jpg)
សមត្ថកិច្ចត្រៀមដុតកម្ទេចទំនិញហាមឃាត់នាំចូល ជាបំណែកសាច់មាន់និងសាច់ទាបង្កកនៅខេត្តបាត់ដំបង។ រូបថត អគ្គនាយកដ្ឋានគយនិងរដ្ឋាករកម្ពុជា
ភ្នំពេញៈ សាច់បង្កកចម្រុះជាង ៦តោនត្រូវបានមន្រ្តីជំនាញធ្វើការបង្ក្រាប និង ដកហូតយកទៅកម្ទេចចោល បន្ទាប់ពីត្រូវបានលួចលាក់នាំចូលកម្ពុជា ពីប្រទេសចំនួន៣ ដោយបំពានទៅនឹងបម្រាមរយៈពេល ៦ខែរបស់រាជរដ្ឋាភិបាល។
អង្គភាពគយ និងរដ្ឋាករនៃអគ្គនាយកដ្ឋានគយនិងរដ្ឋាករកម្ពុជា បានសហការជាមួយសមត្ថកិច្ចពាក់ព័ន្ធធ្វើការបង្ក្រាបនិង ដកហូតយកទៅដុតកម្ទេចចោល នូវទំនិញហាមឃាត់នាំចូល ដែលជាបំណែកសាច់មាន់ និង សាច់ទាបង្កកចំនួន៣ ករណី ស្មើរនឹង ៤ ២៣៩ គីឡូក្រាម ចាប់ថ្ងៃទី២៨ ដល់ថ្ងៃទី២៩ ខែសីហានេះ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជានៅថ្ងៃសុក្រ ទី៣០ សីហានេះ។
ប្រភពដដែលបានឱ្យដឹងថា ចុងស្លាបមាន់ និង គ្រឿងក្នុងមាន់បង្កក ២៣៩ គីឡូក្រាម ត្រូវបានបង្ក្រាបដោយមន្ត្រីការិយាល័យគយនិងរដ្ឋាករដូង នៃសាខាគយនិងរដ្ឋាករខេត្តបាត់ដំបង ដោយសហការជាមួយមន្ត្រីនគរបាលនៅពេលដែលឈ្មួញលួចលាក់បង្កប់ក្នុងទំនិញដទៃ ដើម្បីលួចនាំចូលពីប្រទេសថៃ តាមផែស្ងួតដូង។
ក្រៅពីនោះ ជើងទាបង្កកចំនួន ១ ៦០០ គីឡូក្រាម ក៏ត្រូវបានបង្ក្រាបដោយមន្ត្រីការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ នៃនាយកដ្ឋានបង្ការនិងបង្ក្រាបបទល្មើស ដោយសហការជាមួយមន្ត្រីការិយាល័យផលិតកម្ម និងបសុព្យាបាល និងមន្ត្រីនគរបាលខេត្តបន្ទាយមានជ័យ នៅពេលឈ្មួញលួចលាក់ដឹកជញ្ជូនតាមរថយន្តនាំចូលពីប្រទេសថៃ តាមច្រករបៀងក្នុងស្រុកស្វាយចេក ខេត្តបន្ទាយមានជ័យ។
ចំពោះករណីចុងក្រោយ រួមមានចុងស្លាបមាន់បង្កកចំនួន ២ ៤០០ គីឡូក្រាម ដែលត្រូវបានបង្ក្រាបក្នុងខេត្តបន្ទាយមានជ័យផងដែរ ដោយកម្លាំងនគរបាលដដែលនេះ នៅពេលឈ្មួញលួចលាក់ដឹកជញ្ជូនតាមរថយន្តនាំចូលពីប្រទេសថៃ តាមច្រករបៀងក្នុងភូមិសាស្ត្រស្រុកស្វាយចេក ខេត្តបន្ទាយមានជ័យ។
ដោយឡែក បំណែកសាច់បង្កកចម្រុះចំនួន ២ ០៥០ គីឡូក្រាមផ្សេងទៀតត្រូវបានមន្រ្តីនៃអគ្គនាយកដ្ឋានគយនិងរដ្ឋាករកម្ពុជា មន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) និងមន្ត្រីកងរាជអាវុធហត្ថលើផ្ទៃប្រទេស ធ្វើការដកហូត និងដុតកម្ទេច។ នេះបើយោងតាមអគ្គនាយកដ្ឋានគយនិងរដ្ឋាករកម្ពុជានាថ្ងៃទី១៧ ខែសីហា។
សាច់ទំាងនោះត្រូវបានមន្ត្រីជំនាញឃាត់ និងដកហូតពីឃ្លាំងមួយកន្លែងក្នុងរាជធានីភ្នំពេញ ដែលសរុបមានចំនួន ២០៥កេស។ ក្នុងនោះរួមមាន គូទមាន់ ផលិតនៅប្រទេសថៃ, ចុងស្លាបមាន់បង្កក ផលិតនៅប្រទេសថៃ, កោះមាន់ ផលិតនៅប្រទេសប្រេស៊ីល, ឆ្អឹងមាន់ ផលិតនៅប្រទេសថៃ និងស្លឹកត្រចៀកជ្រូក ផលិតនៅប្រទេសហូឡង់ផងដែរ។
ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទបានហាមឃាត់ការនាំចូលជាបណ្តោះអាសន្ន នូវគ្រឿងក្នុង និងបំណែកសាច់បង្កករយៈពេល ៦ខែ ចាប់ពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤នេះ៕