![](https://pppkhmer.sgp1.digitaloceanspaces.com/image/main/20248/30_8_2024_police.jpg)
បុណ្យសពមន្ដ្រីនគរបាលដែលត្រូវជនសង្ស័យពាក់ព័ន្ធនឹងគ្រឿងញៀនចាក់ស្លាប់នៅកន្លែងនាថ្ងៃទី២៩ ខែសីហា ឆ្នាំ២០២៤ វេលាប្រមាណម៉ោង ៤ រសៀល។ រូបថត ស្នងការរាជធានីភ្នំពេញ
ភ្នំពេញ៖ ការសម្លាប់មន្ដ្រីនគរបាលពីរនាក់ក្នុងរយៈពេល ៣ ថ្ងៃចុងក្រោយនេះ ជាករណីដ៏កម្របំផុត ដែលបានកើតឡើងចៀសមិនផុត និងស្ថិតក្នុងស្ថានភាពគ្រប់គ្រងបាន។
វីដេអូឃ្លីបឃាតកម្មដ៏រន្ធត់មួយត្រូវបានចែកចាយជាបន្ដបន្ទាប់លើបណ្ដាញសង្គម ដែលបង្ហាញពីការចាក់សម្លាប់របស់ជនសង្ស័យពាក់ព័ន្ធនឹងគ្រឿងញៀនទៅលើមន្ដ្រីនរគបាល ហើយជនសង្ស័យត្រូវបានសមត្ថកិច្ចបាញ់សម្លាប់នៅកន្លែងវិញផងដែរ។
លោក សៅ រក្សា ត្រូវបានជនល្មើសចាក់ស្លាប់នៅកន្លែងនាថ្ងៃទី២៩ ខែសីហា ឆ្នាំ២០២៤ វេលាប្រមាណម៉ោង ៤ រសៀល។
ការស្លាប់របស់អនុសេនីយ៍ត្រី សៅ រក្សា មន្ត្រីប៉ុស្តិ៍នគរបាលរដ្ឋបាលបឹងកេងកងទី២ អធិការដ្ឋាននគរបាលខណ្ឌបឹងកេងកង នៃស្នងការដ្ឋាននគរបាលរាជធានីភ្នំពេញ ជាករណីទីពីរដែលនរគបាលកម្ពុជាត្រូវបានសម្លាប់ក្នុងរយៈពេលមួយសប្ដាហ៍ចុងក្រោយនៃខែសីហានេះ។
កាលពីម៉ោង ១០យប់ ថ្ងៃទី២៧ ខែសីហាកន្លងទៅ មន្ត្រីនគរបាលម្នាក់បានស្លាប់ និង ជនបរទេសម្នាក់រងរបួសធ្ងន់ បន្ទាប់ពីរថយន្តរបស់ពួកគេត្រូវរថយន្តមួយគ្រឿងទៀត បើកបុក និងធ្វើការបាញ់ប្រហារ។
ហេតុការណ៍ដែលបានកើតឡើងនៅសង្កាត់រលួស ខណ្ឌដង្កោ រាជធានីភ្នំពេញ បានធ្វើឱ្យមន្ត្រីនគរបាលគង់ វុទ្ធី អាយុ ៣៦ឆ្នាំ បម្រើការនៅអង្គភាពអន្តរាគមន៍នៃអគ្គស្នងការនគរបាលជាតិបានបាត់បង់ជីវិត។
លោកនាយករដ្ឋមន្ដ្រី ហ៊ុន ម៉ាណែត បានចេញសារលិខិតរំលែកមរណៈទុក្ខដល់គ្រួសារសពជាមន្ដ្រីនគរបាលឋានៈ អនុសេនីយ៍ត្រី សៅ រក្សា ដែលបានពលីជីវិតក្នុងពេលបំពេញប្រតិបត្តិការបង្ក្រាបបទល្មើសហិង្សា។
លោកនាយករដ្ឋមន្ដ្រី បានសរសេរថា៖ «ក្នុងវេលាប្រកបដោយសមានទុក្ខដ៏ក្រៀមក្រំនេះ ខ្ញុំ និងភរិយា សូមចូលរួមរំលែកទុក្ខជាមួយ លោក និង លោកស្រី ព្រមទាំងក្រុមគ្រួសារ ក៏ដូចជាថ្នាក់ដឹកនាំ មន្ត្រីនគរបាលជាតិទាំងអស់ និងសូមសម្តែងសេចក្តីសង្វេគ ប្រកបដោយអនិច្ចលក្ខណធម៌យ៉ាងជ្រាលជ្រៅ ព្រោះការបាត់បង់......»។
នៅព្រឹកថ្ងៃទី ៣០ នេះ លោក ស សុខា រដ្ឋមន្ដ្រីក្រសួងមហាផ្ទៃបានដឹកនាំប្រតិភូទៅគោរពវិញ្ញាណក្ខន្ធសពរបស់មន្ដ្រីនគរបាលដោយផ្ទាល់។
![](https://pppkhmer.sgp1.cdn.digitaloceanspaces.com/image/main/20248/30_8_2024_457611950_1066379644847733_5864918257404302528_n.jpg)
លោក ស សុខា រដ្ឋមន្ដ្រីក្រសួងមហាផ្ទៃបានដឹកនាំប្រតិភូទៅគោរពវិញ្ញាណក្ខន្ធសពរបស់មន្ដ្រីនគរបាលដោយផ្ទាល់នៅព្រឹកថ្ងៃទី ៣០ នេះ ។ រូបថត ក្រសួងមហាផ្ទៃ
លោក ទូច សុឃៈ (សុខៈ) អ្នកនាំពាក្យរងក្រសួងមហារផ្ទៃ បានឱ្យដឹងថា ចំពោះករណីកើតឡើងនេះ លោកសម្ដែងការសោកស្ដែង ដែលគ្មាននរណាចង់ឱ្យកើតមាននោះទេ តែវាជាធម្មជាតិរបស់មនុស្ស និងសង្គមតែងតែកើតមានចៀសមិនផុត។
លោកបាននិយាយថា៖ «ប៉ុន្ដែអ្វីដែលសំខាន់ វាមិនកើតដោយអណាធិបតេយ្យ និងស្ថិតក្នុងស្ថានការណ៍អាចគ្រប់គ្រងបាន។ ករណីបែបនេះ វាមិនមានច្រើនគួរឱ្យកត់សម្គាល់នោះទេ តែក៏មិនមែនព្រងើយកណ្ដើយនោះទេ»។
លោក សុឃៈ បានបញ្ជាក់ថា ការជ្រើសរើសនគរបាលតាមរយៈការប្រឡង និងបន្ដទៅសិក្សាវគ្គវិជ្ជាជីវៈរយៈពេល ៣-៤ខែនៅតាមភូមិភាគក្រោមដំបូលរបស់បណ្ឌិត្យសភានគរបាលកម្ពុជា។
លោកបានប្រាប់ភ្នំពេញប៉ុស្ដិ៍ថា៖ «ការថ្លោះធ្លោយប្រកាសណានោះ វាមានកត្ដារួមផ្សំច្រើន ដែលមិនអាចវាយតម្លៃមួយជ្រុងណាមួយនោះទេ។ បុគ្គលខ្លះឆាប់ស្លុតភ័យខ្លាច បុគ្គលខ្លះមានក្រម [សីលធម៌] ដោយមិនហ៊ានធ្វើអ្វីលើគេមុន ដូចករណីមន្ដ្រីនគរបាលរូបនេះមិនបាញ់លើជនសង្ស័យបែកថ្នាំនោះទេ ទោះបីជាមានកាំភ្លើងក្នុងដៃក៏ដោយ»។
លោក សុឃៈ យល់ថា វាមកពីព្រហ្មវិហារធម៌របស់សាម៉ីខ្លួនដែលមិនចង់ប៉ះពាល់គេ ហើយមន្ដ្រីនគរបាលយល់ឃើញថា ជនបែកថ្នាំនោះបាត់បង់សតិ មិនអាចគ្រប់គ្រងសតិ ដែលមិនដល់ថ្នាក់ប្រព្រឹត្ដិបទឧក្រិដ្ឋ។
អ្នកនាំពាក្យក្រសួងមហាផ្ទៃ លោក សុឃៈ បញ្ជាក់ថា ក្នុងនាមកងកម្លាងនគរបាលតែងតែទទួលបានការបណ្ដុះបណ្ដាលជំនាញការបង្ក្រាបបទល្មើស ការបង្ការ ការអន្ដរាគមន៍ កិច្ចការពារជាដើមដើម្បីសុវត្ថិភាពខ្លួន ពលរដ្ឋ និងសង្គមទាំងមូល។
ដោយសារតែវាជាករណីកម្រ លោក សុឃៈ បានឱ្យដឹងថា ករណីនេះមិនត្រូវបានកត់ត្រាថា តើមន្ដ្រីសមត្ថកិច្ចទទួលរងគ្រោះប៉ុន្មាននោះទេ ដោយលើកឡើងថា ប្រជាពលរដ្ឋនឹងយល់អំពីបញ្ហារបស់មន្ដ្រីសមត្ថកិច្ចដែលប្រឈមនឹងចុងកាំបិត ចុងអាវុធពីសំណាក់ជនសង្ស័យ និងជនល្មើសគ្រប់ពេលគ្រប់វេលា។
ករណីស្រដៀងនេះដែរ កាលពីថ្ងៃទី៧ ខែមេសា ឆ្នាំ២០២១ មន្ដ្រីនគរបាលដែលយាមនៅធនាគារមួយក្រោមស្ពានអាកាសផ្សារដីហុយ ស្ថិតក្នុងខណ្ឌសែនសុខ បានបាញ់ជនបែកថ្នាំកាន់កាំបិតដេញចាក់ខ្លួន បណ្ដាលឲ្យស្លាប់។
នៅថ្ងៃទី០៨ ខែមេសា ជនសង្ស័យត្រូវបានបញ្ជូនទៅកាន់សាលាដំបូងរាជធានីភ្នំពេញ។ ប៉ុន្ដែដោយមានប្រតិកម្មនិងការការពារក្ដីពីសំណាក់មេធាវីរហូតដល់ ៩ រូប សន្ដិសុខ ភឿន ភិរៈ ត្រូវបានដោះលែង និងថែមទាំងទទួលបានជំនួយជាថវិកាពីលោកស្រី ប៊ុន រ៉ានី ហ៊ុនសែន ទាំងទៀត៕