រដ្ឋមន្ត្រីក្រសួងព័ត៌មាន នេត្រ ភក្ត្រា ដឹកនាំក្រុមការងារពិនិត្យបង្គោលព្រំដែននៅថ្ងៃទី៣០ ខែសីហា។ នេត្រ ភក្ត្រា
មន្ត្រីរាជរដ្ឋាភិបាលបានចុះទៅមើលទីតាំងនៅតាមព្រំដែន និងបានរៀបចំប្រព័ន្ធអនឡាញសម្រាប់ការចុះឈ្មោះចូលរួមដំណើរកម្សាន្ត ដែលនឹងត្រូវប្រកាសនាពេលឆាប់នេះ។ អ្នកវិភាគស្នើឲ្យមានការពន្យល់ដល់អ្នកចូលរួមក្នុងវិធីមួយដែលងាយយល់ដើម្បីឲ្យដំណើរកម្សាន្តនេះមានសារៈសំខាន់។
លោក ប៉ែន បូណា អ្នកនាំពាក្យរាជរដ្ឋាភិបាល និងក្រុមការងារមកពីក្រសួងព័ត៌មាន និងអាជ្ញាធរជាតិកិច្ចការព្រំដែន នៅថ្ងៃសុក្រទី៣០នេះ បានចុះទៅតំបន់ព្រំដែនមុននឹងរៀបចំដំណើរទស្សនកិច្ចរបស់ប្រជាពលរដ្ឋទៅតំបន់ភូមិភាគឦសាន ជាប់ជាមួយឡាវ និងវៀតណាម ឬខេត្តនៃគម្រោង CLV-DTA។
លោកប្រាប់ភ្នំពេញប៉ុស្តិ៍ថា នៅចុងសប្ដាហ៍នេះ ឬយ៉ាងយូរដើមសប្ដាហ៍ក្រោយ រាជរដ្ឋាភិបាលនឹងប្រកាសពីរបៀបចុះឈ្មោះដើម្បីចូលរួមដំណើរកម្សាន្តនេះ ដែលអាចធ្វើឡើងតាមរយៈ QR code។
កាលពីពេលថ្មីៗនេះ លោកនាយករដ្ឋមន្ត្រី ហ៊ុន ម៉ាណែត បានសម្រេចឲ្យក្រសួងព័ត៌មានរៀបចំដំណើរកម្សាន្តនេះដោយរដ្ឋាភិបាលនឹងរៀបចំការមធ្យោបាយធ្វើដំណើរ និងអាហារសម្រាប់អ្នកចូលរួម ដែលនឹងប្រព្រឹត្តទៅរៀងរាល់ចុងសប្ដាហ៍ចាប់ពីសប្ដាហ៍ក្រោយ រហូតដល់ដាច់ឆ្នាំ២០២៤។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានថ្លែងថា ដំណើរកម្សាន្តនេះធ្វើឡើងដើម្បីឲ្យអ្នកចូលរួមជាពិសេសយុវជនទទួលបានចំណេះដឹងបន្ថែមពាក់ព័ន្ធនឹងភូមិសាស្ត្ររបស់ប្រទេសកម្ពុជា និងសកម្មភាពអភិវឌ្ឍសង្គមសេដ្ឋកិច្ច និងសកម្មភាពរបស់រដ្ឋាភិបាលនៅក្នុងតំបន់នោះ។
លើសពីនេះទៀត ដំណើរកម្សាន្តនេះក៏ដើម្បីឲ្យពលរដ្ឋបានដឹងការពិតអំពីការការពារទឹកដី និងអធិបតេយ្យភាពរបស់ខ្លួន និងដើម្បីឲ្យពួកគេបានរីករាយ និងបានឃើញពីសក្ដានុពលនៃតំបន់នោះសម្រាប់វិស័យទេសចរណ៍ ក៏ដូចជាភាពរីកចម្រើននៅតាមសហគមន៍។
លោកបន្តថា៖ «មួយទៀត ការរៀបចំដំណើរទស្សនកិច្ចនេះ នឹងចូលរួមលើកទឹកចិត្តបំផុសមនសិការស្នេហាស្រឡាញ់ទឹកដី ភូមិឋាន ស្រឡាញ់ប្រទេសកម្ពុជា ជាពិសេសឲ្យយុវជនចូលរួមយ៉ាងសកម្មក្នុងការការពារបូរណភាពទឹកដី ការពារអធិបតេយ្យជាតិឲ្យនៅស្ថិតស្ថេរជារៀងដរាប និងចូលរួមអភិវឌ្ឍប្រកបដោយនិរន្តរភាព»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាថ្លែងថា ដំណើរកម្សាន្តនេះជាការល្អហើយ ព្រោះសកម្មភាពបែបនេះប្រទេសជិតខាងក៏គេបានធ្វើយូរហើយដែរ។ យ៉ាងណាក៏ដោយលោកថា ដំណើរកម្សាន្តនេះត្រូវការការបង្ហាញពីគ្រូបង្គោលក្នុងរបៀបមួយដែលងាយយល់ ដូចជាការពន្យល់អំពីការបោះបង្គោលព្រំដែន និងការគូសផែនទីជាដើម។ គ្រូបង្គោលនោះត្រូវមានការបណ្ដុះបណ្ដាល និងមានចំណេះដឹងច្បាស់លាស់។
លោកយល់ថា សម្រាប់ពេលអនាគត រាជរដ្ឋាភិបាលមិនអាចរៀបចំដំណើរកម្សាន្តបែបនេះរហូតទេ ព្រោះត្រូវការការចំណាយច្រើន។ ហេតុដូច្នេះហើយ លោកលើកទឹកចិត្តឲ្យសាលារៀន និងគ្រឹះស្ថាននានា គិតគូរអំពីដំណើរកម្សាន្តបែបនេះសម្រាប់សិស្សរបស់ពួកគេ។
ស្របពេលជាមួយគ្នានេះ ស្មារតីចូលរួមបរិច្ចាគថវិកាសម្រាប់«មូលនិធិកសាងហេដ្ឋារចនាសម្ព័ន្ធតាមព្រំដែន» មានភាពផុសផុល ដោយក្នុងរយៈពេល ៤ ថ្ងៃគិតត្រឹមថ្ងៃទី២៩ ខែសីហានេះ មានអ្នកចូលរួមបរិច្ចាគជាង ២៥ម៉ឺននាក់ និងទឹកប្រាក់សរុបជាង ១១លានដុល្លារ។
ចំពោះការចូលរួមនេះ លោក យង់ ពៅ យល់ថាជាស្មារតីមួយបង្ហាញពីការជឿជាក់ និងការស្រឡាញ់ទឹកដី និងមានជំនឿលើរដ្ឋាភិបាលអំពីកិច្ចការពារព្រំដែន៕
