ត្រី ៤ម៉ឺនក្បាលត្រូវបានប្រលែង និងហាមឃាត់ការនេសាទនៅក្នុងបឹងបង្កោងស្ថិតនៅភូមិបង្កោង ឃុំអំពិល ស្រុកប្រាសាទបាគង។ រូបថត ក្រសួងកសិកម្ម
សៀមរាបៈ ពិធីបុណ្យចាប់ត្រីបុរាណក្នុងខេត្តសៀមរាបនាឆ្នាំក្រោយសង្ឃឹមថា នឹងមានត្រីកាន់តែច្រើនដើម្បីឱ្យពលរដ្ឋចាប់ ក្រោយពីត្រី ៤ម៉ឺនក្បាលត្រូវបានប្រលែង និងហាមឃាត់ការនេសាទនៅក្នុងបឹងបង្កោងស្ថិតនៅភូមិបង្កោង ឃុំអំពិល ស្រុកប្រាសាទបាគង ខណៈពិធីនេះមានការទាក់ទាញកាន់តែច្រើន។
ក្រោយពីមានការផ្សព្វផ្សាយព័ត៌មានពីការប្រារព្ធពិធីចាប់ត្រីបុរាណក្នុងបឹងបង្កោងជាបន្តបន្ទាប់មក ពលរដ្ឋនៅតំបន់ផ្សេងមានការចាប់អារម្មណ៍ និងបានចូលរួមក្នុងពិធីនោះដែរ។ ដើម្បីឱ្យមានត្រីកាន់តែសម្បូរសម្រាប់ប្រជាពលរដ្ឋចាប់ ដោយក្តីសប្បាយរីករាយ ពេលប្រារព្ធពិធីចាប់ត្រីសាមគ្គីនៅឆ្នាំក្រោយៗទៀតនោះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានយកត្រីមេពូជនិងកូនត្រីចំនួន ៤ម៉ឺនក្បាលទៅលែងចូលក្នុងបឹងនោះបន្ថែម។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាបបានឱ្យដឹងនាថ្ងៃទី៦ ខែសីហាថា៖«បឹងហ្នឹងពលរដ្ឋធ្វើការអភិរក្សរួម ហើយដល់ពេលរដូវសែនអ្នកតា នាំគ្នាធ្វើបុណ្យទៅចាប់តាមបែបបុរាណអញ្ជឹងទៅ។ ក្រោយពីមានការផ្សព្វផ្សាយព័ត៌មាន អ្នកផ្សេងៗទៀតក៏បានចូលរួមទៅចាប់ ចង់មើល ចង់ឃើញអញ្ជឹងទៅ។ នេះជាប្រពៃណីអ្នកស្រុកហ្នឹងផង ដែលធ្វើជាយូរយាណាស់មកហើយជារៀងរាល់ឆ្នាំ»។
ត្រីដែលត្រូវប្រលែងក្នុងបឹងបង្កោងនោះរួមមាន៖ កូនត្រីប្រាចំនួន១៥ ០០០កូន កូនត្រីឆ្ពិនចំនួន១២ ០០០កូន កូនត្រីអណ្តែងទន់ចំនួន៨ ០០០កូន ត្រីក្រាញ់ និងត្រីព្រួលចំនួន ៥ ០០០ក្បាល។
បឹងបង្កោងមានទទឹង ១៥០ម៉ែត្រ និងបណ្ដោយ ៣០០ម៉ែត្រ។ ជារៀងរាល់ឆ្នាំនៅថ្ងៃទី១២ ខែកុម្ភៈ សហគមន៍នៅក្នុងតំបន់តែងរៀបចំពិធីចាប់ត្រីសាមគ្គីក្នុងបឹងបង្កោង។ នេះបើយោងតាមក្រសួងកសិកម្ម។
អ្នកភូមិតែងតែធ្វើការអភិរក្សត្រីទុក ដែលមិនអនុញ្ញាតឱ្យមានការនេសាទយកត្រីចាប់ពីខែមិថុនា ដើម្បីរក្សាត្រីទុកសម្រាប់ប្រារព្ធពិធីឡើងអ្នកតានេះ។ ការប្រារព្ធពិធីក៏វាអាស្រ័យលើស្ថានភាពទឹកក្នុងបឹងផងដែរ។ ប្រសិនបើទឹកបឹងនៅមានច្រើន ពិធីនោះនឹងត្រូវពន្យាពេល រហូតដល់ពេលទឹកបឹងរីងសមល្មមអាចចាប់ត្រីបាន ដោយប្រើប្រាស់ឧបករណ៍នេសាទបុរាណដូចជា៖សំណាញ់ ឈ្នាង និងអង្រុតជាដើម។
លោក ទា គឹមសុទ្ធ ក៏បានឱ្យដឹងផងដែរថា ក្រោយពីលែងមេពូជ និងកូនត្រីរួច ឧបករណ៍នេសាទខុសច្បាប់សរុបចំនួន២៩៥គ្រឿង ក៏ត្រូវបានដុតកំទេចចោលនៅបឹងបង្កោងនោះផងដែរ។
ឧបករណ៍នេសាទខុសច្បាប់ទាំងនោះត្រូវបានធ្វើការរឹបអូសពីបទល្មើសនេសាទ និងប្រគល់ឱ្យនាពេលកន្លងមកក្នុងឆ្នាំ២០២៤នេះ។
លោកបញ្ជាក់ថា៖«នៅពេលចាប់បានបញ្ជូនសំណុំរឿងទៅតុលាការហើយ មិនត្រឹមតែរឹបអូសនោះទេ។ អ្នកខ្លះឃើញយើងចាប់ ក៏យកមកប្រគល់ឱ្យខ្លះៗអញ្ជឹងទៅ។ បើយកប្រគល់ឱ្យ យើងមិនចាប់ទោសកំហុសអីទេ។ តែបើប្រើប្រាស់ដើម្បីនេសាទ យើងនឹងអនុវត្តតាមច្បាប់ហើយ»។
លោកក៏បានបន្ថែមផងដែរថា មន្រ្តីជំនាញជលផលក៏កំពុងតែបន្តធ្វើការផ្សព្វផ្សាយ អប់រំ ណែនាំ និងធ្វើកិច្ចសន្យាបញ្ឈប់ការទិញ លក់ ផលិត រក្សាទុក និងដឹកជញ្ជូនឧបករណ៍នេសាទល្មើសច្បាប់ផងដែរ៕
