លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងក្នុងពិធីប្រកាសដាក់ឱ្យអនុវត្តកម្មវិធីពង្រឹងការអប់រំគ្រូបង្រៀនដំណាក់កាលទី២ នាថ្ងៃទី៧ សីហា នៅភ្នំពេញ។ ក្រសួងអប់រំ
ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់សារជាថ្មីថា គ្រូបង្រៀនគឺជាឆ្អឹងខ្នងនៃប្រព័ន្ធអប់រំកម្ពុជា ហើយកំណែទម្រង់ការអប់រំគ្រូបង្រៀនគឺជាអាទិភាពចម្បងមួយនៃកំណែទម្រង់វិស័យអប់រំ។
ក្នុងពិធីប្រកាសដាក់ឱ្យអនុវត្តជាផ្លូវការកម្មវិធីពង្រឹងការអប់រំគ្រូបង្រៀននៅកម្ពុជា (STEPCam) ដំណាក់កាលទី២ នាថ្ងៃទី៧ ខែសីហា នៅរាជធានីភ្នំពេញ លោកថ្លែងថា៖ «កំណែទម្រង់គ្រូបង្រៀននៅតែជាអាទិភាពសំខាន់សម្រាប់កម្ពុជា។ កំណែទម្រង់ការអប់រំគ្រូបង្រៀន និងការអនុវត្តគោលនយោបាយគ្រូបង្រៀន គឺជាអាទិភាពចម្បងមួយនៃកំណែទម្រង់វិស័យអប់រំ ព្រោះគ្រូបង្រៀនគឺជាឆ្អឹងខ្នងនៃប្រព័ន្ធអប់រំកម្ពុជា»។
លោករដ្ឋមន្ត្រីបានថ្លែងអំណរគុណដល់អង្គការយូណេស្កូ (UNESCO) ដែលជាភ្នាក់ងារអនុវត្តកម្មវិធី និងមន្ត្រីនៃក្រសួងអប់រំ ដែលបានប្រឹងប្រែង «យកអស់កម្លាំងកាយចិត្ត» អនុវត្តកម្មវិធី ដើម្បីលើកកម្ពស់សមត្ថភាពគ្រូបង្រៀន និងឆ្លើយតបនឹងអាទិភាពក្រសួង។
លោក ហង់ជួន ណារ៉ុន ដែលជាឧបនាយករដ្ឋមន្ត្រី លើកឡើងថា រាជរដ្ឋាភិបាលកម្ពុជាបានកំណត់ពីសារៈសំខាន់នៃគ្រូបង្រៀនជាកត្តាសំខាន់ចាំបាច់សម្រាប់លទ្ធផលសិក្សារបស់សិស្ស។
លោក Sardar Umar Alam តំណាងអង្គការយូណេស្កូប្រចាំនៅកម្ពុជាបានថ្លែងក្នុងពិធីនេះថា យូណេស្កូនឹងបន្តជាដៃគូឈានមុខជាមួយក្រសួងអប់រំ ក្នុងការគាំទ្រចក្ខុវិស័យរួមដើម្បីលើកកម្ពស់ការអភិវឌ្ឍ បណ្ដុះបណ្ដាលគ្រូបង្រៀន ការលើកកម្ពស់ការបង្រៀនប្រកបដោយភាពច្នៃប្រឌិត ការអភិវឌ្ឍវិជ្ជាជីវៈគ្រូបង្រៀន វឌ្ឍនភាពការបង្រៀន និងរៀននៅក្នុងថ្នាក់។
លោកបន្តថា យូណេស្កូនឹងបន្តជំរុញបរិវត្តន៍កម្មឌីជីថល និងកសាងប្រព័ន្ធអប់រំប្រកបដោយបរិយាបន្ន និងសមធម៌ ដោយមានគោលដៅធានាឱ្យបានថាកុមារគ្រប់រូបទទួលបានការអប់រំប្រកបដោយគុណភាព និងមានឱកាសអភិវឌ្ឍសក្ដានុពលពេញលេញរបស់ពួកគេ។
STEPCam ដំណាក់កាលទី២នេះត្រូវបានរៀបចំឡើង បន្ទាប់ពីការអនុវត្តដំណាក់កាលទី១នៃកម្មវិធីនេះ ដែលមានរយៈពេល៥ឆ្នាំ ពីឆ្នាំ២០១៨ដល់ឆ្នាំ២០២២ បានបញ្ចប់។
ក្រសួងអប់រំបញ្ជាក់ថា ដំណាក់កាលទី១នេះត្រូវបានអនុវត្តដោយជោគជ័យ និងមានកិច្ចសហការគ្នាយ៉ាងល្អរវាងក្រសួងអប់រំ និងអង្គការយូណេស្កូ។
ក្រសួងបញ្ជាក់ថា៖ «សមិទ្ធផលចម្បងគួរឱ្យកត់សម្គាល់នៅដំណាក់កាលទី១ រួមមាន ការអនុម័តក្របខ័ណ្ឌនិងប្រព័ន្ធអភិវឌ្ឍវិជ្ជាជីវៈជាប្រចាំ, ការបណ្ដុះបណ្ដាលគ្រូបង្រៀននិងមន្ត្រីជំនាញអំពីកញ្ចប់អំណានថ្នាក់ដំបូងជាង ៤ ០០០ នាក់ និងគណិតវិទ្យាថ្នាក់ដំបូងជាង ៣០០០ នាក់, និងសាលាគរុកោសល្យខេត្តចំនួន១១ បានជួសជុលកែលម្អ និងបំពាក់សម្ភារៈបរិក្ខារ»។
STEPCam ដំណាក់កាលទី២នេះមានសមាសភាគ៤ រួមមាន ការអប់រំគ្រូបង្រៀន, ការអភិវឌ្ឍវិជ្ជាជីវៈជាប្រចាំសម្រាប់គ្រូបង្រៀន, ការបណ្ដុះបណ្ដាលកញ្ចប់អំណាននិងគណិតវិទ្យាថ្នាក់ដំបូង រួមទាំងការវាយតម្លៃ និងការពង្រីកប្រព័ន្ធកត់ត្រាទិន្នន័យសិស្ស, និងបរិវត្តន៍កម្មឌីជីថលសម្រាប់ការអប់រំគ្រូបង្រៀន។
ក្រសួងបញ្ជាក់ថា សមាសភាគទាំង៤នេះ ពិតជាមានសារៈសំខាន់ ដើម្បីបន្តគាំទ្រដល់ការអប់រំគ្រូបង្រៀន ហើយថា STEPCam ដំណាក់កាលទី២នេះនឹងរួមចំណែកជួយគាំទ្រដល់ចក្ខុវិស័យកម្ពុជាក្លាយជាប្រទេសមានចំណូលខ្ពស់នៅឆ្នាំ២០៥០។
ក្រសួងបន្តថា រាជរដ្ឋាភិបាលក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បានផ្ដល់អាទិភាពទៅលើការអប់រំ ដោយបានដាក់បញ្ចូលការពង្រឹងគុណភាពអប់រំ កីឡា វិទ្យាសាស្ត្រ និងបច្ចេកវិទ្យា នៅក្នុងមុំទី១ នៃបញ្ចកោណទី១ នៃយុទ្ធសាស្ត្របញ្ចកោណដំណាក់កាលទី១ ដែលសំដៅដល់ការអភិវឌ្ឍធនធានមនុស្សដើម្បីកំណើន ការងារ សមធម៌ ប្រសិទ្ធភាព និងចីរភាព៕
