ទេសចរទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែងក្នុងឆ្នាំ២០២០។ Post Staff
ភ្នំពេញៈ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ផ្តល់ជំនួយឥតសំណងបន្ថែមចំនួន៣លានដុល្លារ ដើម្បីដំណើរការគម្រោងអភិរក្ស និងថតចម្លងបណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដំណាក់កាលទី២ ដើម្បីដោះស្រាយបញ្ហាប្រឈមក្នុងការធានាបានគុណភាព និងលទ្ធភាពប្រើប្រាស់នៃបណ្ណសារទាំងនេះ។
កិច្ចព្រមព្រៀងផ្តល់ជំនួយនេះត្រូវបានចុះហត្ថលេខាដោយលោកស្រី Moonjung Choi តំណាងប្រចាំប្រទេសនៃទីភ្នាក់ងារ KOICA និងលោក សាដា អ៊ូម៉ា អាទ្បាម (Sardar Umar Alam) តំណាងប្រចាំប្រទេសនៃអង្គការយូណេស្កូ ខណៈកំណត់ហេតុនៃកិច្ចពិភាក្សាត្រូវបានចុះហត្ថលេខាដោយលោកស្រី Moonjung Choi និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅថ្ងៃទី៨ ខែសីហា នៅសារមន្ទីរប្រល័យពូជសាសន៍ទួលស្លែង ក្នុងរាជធានីភ្នំពេញ។
គម្រោងនេះមានគោលបំណងផ្សព្វផ្សាយតម្លៃនៃបូជនីយដ្ឋាននៃការចងចាំកម្ពុជាតាមរយៈការអភិរក្សកំណត់ត្រា និងវឌ្ឍនភាពនៃការថតចម្លងបណ្ណសារ និងលើកកម្ពស់លក្ខខណ្ឌអភិរក្ស និងបរិស្ថានអ្នកទស្សនាសម្រាប់ការអភិរក្ស និងការផ្សព្វផ្សាយតម្លៃ នៃបូជនីយដ្ឋាននៃការចងចាំកម្ពុជា។
គម្រោងនេះក៏មានគោលបំណងផ្សព្វផ្សាយការយល់ដឹងអំពីបូជនីយដ្ឋាននៃការចងចាំកម្ពុជា តាមរយៈការធ្វើឱ្យប្រសើរឡើងនៃការតាំងពិព័រណ៍ និងលើកកម្ពស់ការយល់ដឹងអំពីសន្តិភាព តាមរយៈការអប់រំសន្តិភាព។
លោកស្រី Moonjung Choi ថ្លែងក្នុងពិធីចុះហត្ថលេខានេះថា គម្រោងនេះ ជានិមិត្តរូបនៃការចែករំលែកការឈឺចាប់ និងបន្ទុករួមគ្នារវាងប្រជាជនកម្ពុជា និងប្រជាជនកូរ៉េ។
នាយកប្រចាំប្រទេសនៃKOICA លោកស្រី Moonjung Choi (កណ្តាលឆ្វេង), រដ្ឋមន្ត្រីក្រសួងវប្បធម៌ លោកស្រី ភឿង សកុណា (កណ្តាល), និងតំណាងប្រចាំប្រទេសនៃយូណេស្កូ លោក Alam Sardar Umar (កណ្តាលស្តាំ) បង្ហាញឯកសារផ្តល់ជំនួយក្នុងពិធីចុះហត្ថលេខានៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង នៅថ្ងៃទី៨ សីហា។ KOICA
លោកស្រីថ្លែងថា៖ «យើងមានគោលបំណងកាត់បន្ថយទុក្ខសោក និងការឈឺចាប់របស់កម្ពុជា តាមរយៈគម្រោងនេះ ដែលដើរតួជាមូលដ្ឋានគ្រឹះក្នុងការអប់រំមនុស្សជំនាន់ក្រោយអំពីអតីតកាលដ៏សោកសៅរបស់កម្ពុជា ដើម្បីទប់ស្កាត់សោកនាដកម្មស្រដៀងគ្នានេះមិនឱ្យកើតមាននៅប្រទេសកម្ពុជានាពេលអនាគត»។
KOICAបញ្ជាក់ក្នុងសេចក្តីប្រកាសព័ត៌មាននាថ្ងៃទី៨ សីហា ថា គម្រោងនេះក្នុងដំណាក់កាលទី១ទទួលបានសមិទ្ធផលសំខាន់ៗ រួមមាន បណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែងចំនួន ៧៤៥ ៤៩៤ទំព័រត្រូវបានរក្សាទុក ហើយជិតកន្លះលានបណ្ណសារត្រូវបានបំប្លែងជាឌីជីថល (digital) ដើម្បីលើកកម្ពស់ការចូលប្រើប្រាស់ជាសកលនូវបេតិកភណ្ឌឯកសារ។
KOICAបញ្ជាក់ថា ឥឡូវនេះ បណ្ណសារទាំងនេះអាចចូលប្រើបានតាមរយៈគេហទំព័រពីរភាសា គឺភាសាខ្មែរ និងភាសាអង់គ្លេស។ គម្រោងនេះបានផ្តល់ជំនួយបច្ចេកទេសសំខាន់ៗដល់បុគ្គលិកសារមន្ទីរ រួមចំណែកដល់ការទទួលស្គាល់របស់សារមន្ទីរ ហើយកាលពីខែកញ្ញា ឆ្នាំ២០២០ សារមន្ទីរទួលស្លែងក៏បានទទួលជ័យលាភី Jikji UNESCO Memory of the World prize របស់រដ្ឋាភិបាលកូរ៉េ។
KOICAលើកឡើងថា៖ «ដោយផ្អែកលើភាពជោគជ័យនៃដំណាក់កាលទី១ KOICA បានប្តេជ្ញាផ្តល់ជំនួយបន្ថែមចំនួន ៣លានដុល្លារអាមេរិកសម្រាប់អនុវត្តគម្រោងរយៈពេល៥ឆ្នាំ ដោយចាប់ផ្តើមពីឆ្នាំ២០២៤ រហូតដល់ឆ្នាំ២០២៨»។
គម្រោងនេះមានគោលបំណងលើកកម្ពស់សង្គមប្រកបដោយសន្តិភាព តាមរយៈការអប់រំវប្បធម៌ និងបេតិកភណ្ឌ និងការពង្រឹងសមត្ថភាពយុវជន ស្របតាមយុទ្ធសាស្ត្រជាតិរបស់កម្ពុជា គឺយុទ្ធសាស្ត្របញ្ចកោណ ដំណាក់កាលទី១។
KOICAកត់សម្គាល់ថា វិស័យទេសចរណ៍ ដែលជាសសរស្ដម្ភដ៏សំខាន់នៃសេដ្ឋកិច្ចរបស់កម្ពុជា បានបង្ហាញសក្ដានុពលរបស់ខ្លួនរួចហើយ តាមរយៈការបង្កើតប្រាក់ចំណូលរាប់ពាន់លានដុល្លារ និងបង្កើតការងារជាច្រើន។ នៅក្នុងឆ្នាំ២០១៩ វិស័យនេះបានផ្តល់ការងារដោយផ្ទាល់ដល់មនុស្សចំនួន ៦៣០ ០០០ នាក់ ជាមួយនឹងចំណូលពីវិស័យទេសចរណ៍រហូតដល់ ៤,៩ ពាន់លានដុល្លារ ដែលបានបង្កើតផលិតផលក្នុងស្រុកសរុប (GDP) របស់កម្ពុជាចំនួន១៨,២ភាគរយ ដែលជាសេដ្ឋកិច្ចខ្ពស់បំផុតក្នុងចំណោមប្រទេសអាស៊ាន បូក៣។
KOICA លើកឡើងថា គម្រោងនេះមានគោលបំណងទាក់ទាញភ្ញៀវទេសចរកាន់តែច្រើន, បង្កើនចំណូលពីទេសចរណ៍, បង្កើតការងារក្នុងផ្នែកអភិរក្ស ឌីជីថល និងការអប់រំ, ពង្រឹងការអភិវឌ្ឍជំនាញ ជាពិសេសក្នុងការគ្រប់គ្រងបណ្ណសារ និងការអប់រំសន្តិភាព, បង្កើនលទ្ធភាពការងារ, និងធានាបាននូវកំណើនសេដ្ឋកិច្ចប្រកបដោយចីរភាពសម្រាប់កម្ពុជា។
KOICA បញ្ជាក់ក្នុងសេចក្តីប្រកាសព័ត៌មានថា៖ «តាមរយៈការធានានូវការអភិរក្ស និងភាពងាយស្រួលនៃបណ្ណសារប្រវត្តិសាស្ត្រ គម្រោងនេះជួយសម្រួលដល់ការស្រាវជ្រាវផ្នែកសិក្សា និងជំរុញការយល់ដឹងយ៉ាងស៊ីជម្រៅអំពីអតីតកាល ដោយលើកទឹកចិត្តឱ្យមានការទទួលខុសត្រូវរួមក្នុងការទប់ស្កាត់អំពើឃោរឃៅនាពេលអនាគត»៕
