![](https://pppkhmer.sgp1.digitaloceanspaces.com/image/main/20249/10_9_2024_aba_bank_supports_cambodian_children_s_fund_s_primary_education_program.jpg)
ធនាគារ ABA បានប្រកាសបរិច្ចាគថវិកាសរុបចំនួន ៦0 000 ដុល្លារអាមេរិកសម្រាប់រយៈពេល ៣ឆ្នាំ ជូនដល់អង្គការមូលនិធិកុមារកម្ពុជា (CCF)។ ការគាំទ្រនេះមានគោលបំណងជួយទ្រទ្រង់ការអប់រំប្រកបដោយគុណភាពប្រសើរសម្រាប់កុមារក្រីក្រកម្ពុជា។
ភាគីទាំងសងខាងបានចុះហត្ថលេខាលើភាពជាដៃគូចលនូបត្ថម្ភជាផ្លូវការនៅថ្ងៃទី០៤ ខែកញ្ញា ឆ្នាំ២០២៤ ក្រោមវត្តមានរបស់លោក Scott Neeson ស្ថាបនិក និងនាយកប្រតិបត្តិអង្គការមូលនិធិកុមារកម្ពុជានិងលោក Igor Zimarev នាយកទីផ្សារនិងកិច្ចការទំនួលខុសត្រូវសង្គមនៃធនាគារ ABA រួមទាំងតំណាងរបស់គ្រឹះស្ថានទាំងពីរ។
កិច្ចព្រមព្រៀងនេះបានបង្ហាញពីគម្រោងរយៈពេល ៣ឆ្នាំដែល ABA នឹងផ្តល់ថវិកាចំនួន ២0 000 ដុល្លារអាមេរិកក្នុងមួយឆ្នាំដល់កម្មវិធីអប់រំកម្រិតបឋមសិក្សារបស់អង្គការមូលនិធិកុមារកម្ពុជា។
![](https://pppkhmer.sgp1.cdn.digitaloceanspaces.com/image/main/20249/10_9_2024_aba_bank_supports_cambodian_children_s_fund_s_primary_education_program1.jpg)
ការរួមចំណែកនេះនឹងធានាផ្តល់នូវការអប់រំពេញលេញដល់សិស្សានុសិស្សជាច្រើនរូប។ រហូតមកដល់ពេលនេះ សិស្សានុសិស្សកម្រិតមូលដ្ឋានចំនួនប្រហែលជាង ៧៤០នាក់ បានទទួលបានការអប់រំនៅសាលារៀន Satellite ចំនួន ៦ របស់អង្គការមូលនិធិកុមារកម្ពុជា។
បន្ថែមពីជំនួយថវិកា ABA ក៏បានបរិច្ចាគឈុតកុំព្យូទ័រលើតុ រ៉ោតទ័រ និងស្វ៊ីច សម្រាប់ថ្នាក់កុំព្យូទ័ររបស់សាលារៀនមួយរបស់អង្គការផងដែរ។ ការបរិច្ចាគនេះ បញ្ជាក់ពីការប្តេជ្ញាចិត្តរបស់ធនាគារក្នុងការជួយគាំទ្រសិស្សានុសិស្សទៅលើចំណេះដឹងផ្នែកឌីជីថលនៅក្នុងសង្គមដែលជំរុញដោយបច្ចេកវិទ្យា។
![](https://pppkhmer.sgp1.cdn.digitaloceanspaces.com/image/main/20249/10_9_2024_fb3_2x_3_.jpg)
លោក Igor Zimarev នាយកទីផ្សារ និងកិច្ចការទំនួលខុសត្រូវសង្គមនៃធនាគារ ABA មានប្រសាសន៍ថា «យើងខ្ញុំ មានកិត្តិយសដែលបានរួមចំណែកដល់អង្គការមូលនិធិកុមារកម្ពុជា ដើម្បីផ្តល់នូវការផ្លាស់ប្តូរដល់កុមារក្រីក្រជាថ្មីម្ដងទៀត។ នៅធនាគារ ABA យើងខ្ញុំជឿជាក់ថាការអប់រំគឺជាមូលដ្ឋានគ្រឹះនៃសង្គមមួយដែលមានវឌ្ឍនភាព និងសមភាព។ យើងខ្ញុំបានបង្ហាញពីការប្តេជ្ញាចិត្តក្នុងការជំរុញការរីកចម្រើនឱកាសល្អៗ និងការផ្លាស់ប្តូរក្នុងសង្គមយើង តាមរយៈការវិនិយោគលើអនាគតរបស់កុមារទាំងនេះ»។
កាលពីឆ្នាំ២០២៣ ធនាគារក៏បានចុះហត្ថលេខាលើអនុស្សរណៈយោគយល់ (MoU) ជាមួយអង្គការមូលនិធិកុមារកម្ពុជាដើម្បីបង្កើតកម្មវិធីអភិវឌ្ឍសម្រាប់ទាំងអស់គ្នា ក្នុងគោលដៅជួយដល់កុមារខ្វះខាត តាមរយៈការផ្តល់ឱកាសហាត់ការនិងឱកាសការងារ អាហារូបករណ៍ កម្មវិធីស្ម័គ្រចិត្ត កិច្ចសហការ ផ្សព្វផ្សាយឆ្លងស្ថាប័ន និងការគាំទ្រផ្នែកហិរញ្ញវត្ថុ។
ABA នៅតែបន្តពង្រឹងកុមារជំនាន់ក្រោយៗ ឲ្យមានអនាគតភ្លឺស្វាង ដើម្បីធានាថា កុមារគ្រប់រូបមានឱកាសអភិវឌ្ឍសក្ដានុពលរបស់ខ្លួនបានពេញលេញនិងបន្តបង្ហាញពីការប្តេជ្ញាចិត្តឥតងាករេរទៅ លើទំនួលខុសត្រូវសង្គមនិងការអភិវឌ្ឍសហគមន៍របស់ធនាគារ។
![](https://pppkhmer.sgp1.cdn.digitaloceanspaces.com/image/main/20249/10_9_2024_fb4_2x_2_.jpg)
អំពីធនាគារ ABA
ABA គឺជាធនាគារពាណិជ្ជធំជាងគេនៅកម្ពុជា គិតលើទ្រព្យសកម្មសរុប ប្រាក់បញ្ញើ និងប្រាក់កម្ចី យោងតាមរបាយការណ៍ត្រួតពិនិត្យរបស់ធនាគារជាតិនៃកម្ពុជាឆ្នាំ ២០២១-២០២៣។ ធនាគារ ABA មាន ៩៥សាខា, ទីតាំងស្វ័យសេវា ABA 24/7 ចំនួន ៤៥កន្លែង, ម៉ាស៊ីនស្វ័យសេវាជាង ១៦00 នៅទូទាំងប្រទេស, សេវាធនាគារអនឡាញ និងកម្មវិធីធនាគារតាមទូរស័ព្ទដ៏ទំនើប បានធ្វើឲ្យធនាគារ ABA មានអតិថិជនជាង ៣.៥ លាននាក់ដែលកំពុងប្រើប្រាស់សេវាហិរញ្ញវត្ថុដ៏ទំនើបសម្បូរបែបនេះ។
![](https://pppkhmer.sgp1.cdn.digitaloceanspaces.com/image/main/20249/10_9_2024_fb5_2x.jpg)