ពិធីប្រគល់វិញ្ញាបនបត្រជូនសិស្សមេធាវី និងសិក្ខាកាមមេធាវីនៃគណៈមេធាវីនៃព្រះរាជាណាចក្រកម្ពុជា កាលពីថ្ងៃទី៦ កញ្ញា។ រូបថត BAKC
ភ្នំពេញៈ ការឃោសនាបោះឆ្នោតជ្រើសតាំងប្រធានគណៈមេធាវីអាណត្តិទី១៥ (២០២៤-២០២៦) នៃគណៈមេធាវីកម្ពុជា នឹងចាប់ផ្តើមនៅថ្ងៃសៅរ៍ចុងសប្តាហ៍នេះ ហើយការបោះឆ្នោតជ្រើសតាំងប្រធាននឹងប្រព្រឹត្តទៅនាថ្ងៃទី១៦ ខែតុលាខាងមុខដែលមានបេក្ខជនឈរឈ្មោះជាប្រធានចំនួន ៥រូប។
ការឃោសនាបោះឆ្នោតជ្រើសតាំងប្រធាននិងជ្រើសតាំងជាសមាជិកក្រុមប្រឹក្សាគណៈមេធាវី អាណត្តិទី១១ (២០២៤-២០២៧) មានរយៈពេលមួយខែ ដែលគិតចាប់ពីថ្ងៃទី១៤ ខែកញ្ញានេះ រហូតដល់ម៉ោង ២៤:០០នាទី ថ្ងៃទី១៤ ខែតុលា ឆ្នាំ២០២៤។ នេះបើយោងតាមសេចក្តីប្រកាសរបស់គណៈមេធាវី ដែលជូនដំណឹងដល់បេក្ខជនឈរឈ្មោះជាប្រធាន និងជាសមាជិកក្រុមប្រឹក្សា ក៏ដូចជាសមាជិករបស់ខ្លួនទាំង ២ ៨០០នាក់ផងដែរ។
សេចក្តីប្រកាសដែលផ្សព្វផ្សាយជាសាធារណៈនាថ្ងៃទី១០ ខែកញ្ញានេះបានសរសេរថា៖ «មិនអនុញ្ញាតឱ្យធ្វើសកម្មភាពឃោសនាអ្វីទាំងអស់ក្នុងរយៈពេល ២៤ម៉ោង មុនថ្ងៃបោះឆ្នោត និងថ្ងៃបោះឆ្នោត លើកលែងតែក្នុងថ្ងៃមហាសន្និបាតដែលបេក្ខជនឈរឈ្មោះជាប្រធានគណៈមេធាវី ត្រូវបានអនុញ្ញាតឱ្យមានមតិឃោសនានៅចំពោះមុខអង្គមហាសន្និបាតក្នុងម្នាក់ ៥នាទី តាមការអញ្ជើញរបស់ប្រធានគណៈកម្មការបោះឆ្នោត និងការអានឈ្មោះបេក្ខជនឈរឈ្មោះបោះឆ្នោតជា សមាជិកក្រុមប្រឹក្សាគណៈមេធាវី ដោយប្រធានគណៈកម្មការបោះឆ្នោតទៅតាមលំដាប់លេខរៀងក្នុងសន្លឹកឆ្នោត»។
ចំពោះសម្ភារ និងសកម្មភាពសម្រាប់ធ្វើការឃោសនា និង សកម្មភាពដែលត្រូវហាមឃាត់ មានកំណត់ក្នុងសេចក្តីសម្រេចលេខ៦០៩ ចុះថ្ងៃទី២២ ខែសីហា ឆ្នាំ២០២៤។
យោងតាមសេចក្តីសម្រេចបានឱ្យដឹងថា សកម្មភាពឃោសនាដែលត្រូវហាមឃាត់មានដូចជា ការវាយប្រហារអំពីសកម្មភាពការងារ ឬជីវភាពឯកជនរបស់បេក្ខជន ឬមេធាវីដែលមិនមែនជាបេក្ខជន ទោះបីតាមរយៈរូបភាព គំនូរ លិខិតស្នាម ពាក្យសម្តី កាយវិការ ឬតាមមធ្យោបាយណាមួយក្តី, ការដឹកជញ្ជូនអ្នកបោះឆ្នោតជាទ្រង់ទ្រាយធំ ទៅកាន់ការិយាល័យបោះឆ្នោតនៅថ្ងៃបោះឆ្នោត, ការស្លៀកពាក់មានរូបបេក្ខជន ការបង្ហាញសញ្ញា ឬសម្ភារផ្សេងៗដែលសម្គាល់បេក្ខជននិងការផ្សព្វផ្សាយសារ ឬខិត្តប័ណ្ណរបស់បេក្ខជនក្នុងរយៈពេល ២៤ម៉ោង មុនថ្ងៃបោះឆ្នោត និងក្នុងថ្ងៃមហាសន្និបាត។
ការហាមឃាត់ផ្សេងទៀតរួមមាន ការបង្គាប់បញ្ជាឱ្យអ្នកគាំទ្ររបស់ខ្លួន ទៅហែកចោលនូវក្រដាសផ្សាយរបស់បេក្ខជនដទៃទៀត, ការជំរុញឱ្យមានការប្រព្រឹត្តអំពើហិង្សាប្រឆាំងនឹងបេក្ខជនណាម្នាក់ឬការបំភិតបំភ័យក្នុងអំឡុងពេល យុទ្ធនាការឃោសនាបោះឆ្នោត, ការផ្តល់ជាប្រាក់កាសឬជាសម្ភារ ទោះបីតាមមធ្យោបាយណាក៏ដោយដល់អ្នកបោះឆ្នោត ដើម្បីឱ្យគេបោះឆ្នោតឱ្យខ្លួន និងការគំរាមកំហែង ឬការបំភិតបំភ័យដោយផ្ទាល់ឬដោយប្រយោលដល់បុគ្គលណាម្នាក់ ឬក្រុមគាំទ្រណាមួយ ដើម្បីឱ្យគេគាំទ្របេក្ខជនណាមួយ ឬបំបាក់ទឹកចិត្តបុគ្គលនោះឱ្យឈប់គាំទ្រដល់បេក្ខជនណាមួយ។
ប្រធានគណៈមេធាវី លោក លី ច័ន្ទតុលាបា នឱ្យដឹងថា ការបោះឆ្នោតនេះនឹងត្រូវធ្វើឡើងនៅថ្ងៃទី១៦ ខែតុលាខាងមុខ។ បេក្ខជនឈរឈ្មោះជាប្រធានមានចំនួន ៥រូប ដែលក្នុងនោះមានស្រ្តីម្នាក់ផងដែរ ហើយបេក្ខជនឈរឈ្មោះជាសមាជិកក្រុមប្រឹក្សាគណៈមេធាវីមានចំនួន ៩០រូប ប៉ុន្តែត្រូវបោះឆ្នោតជ្រើសរើសជាសមាជិកក្រុមប្រឹក្សាតែ ៣៣រូបប៉ុណ្ណោះ។
លោកបានបញ្ជាក់ថា៖ «គណៈមេធាវីមានបទពិសោធន៍នៃការរៀបចំការបោះឆ្នោតជ្រើសតាំងប្រធានបាន ១៤ដងហើយ និងក្រុមប្រឹក្សា ១០ហើយ ដែលសរុប ២៤ដងហើយ។ អញ្ជឹងយើងមានបទពិសោធន៍ក្នុងការរៀបចំ ដែលយើងនឹងធ្វើឱ្យមានតម្លាភាព និងសុក្រឹត្យត្រឹមត្រូវ។ អញ្ជឹងសង្ឃឹមថា យើងនឹងដំណើរការបោះឆ្នោតដោយរលូនហើយ សមាជិក សមាជិកាមេធាវីនឹងចូលរួមក្នុងការបោះឆ្នោតឱ្យបានច្រើនកុះករ»៕
