មនុស្សជាង ៧០០នាក់ហើយ បានចុះឈ្មោះដើម្បីចូលរួមដំណើរកម្សាន្តដោយឥតគិតថ្លៃ ទៅកាន់ព្រំដែនក្នុងខេត្តភាគឦសាន (ខេត្តស្ថិតក្នុងគម្រោង CLV-DTA) និងខេត្តត្បូងឃ្មុំ បន្ទាប់ពីក្រសួងព័ត៌មានប្រកាសទទួលចុះឈ្មោះ កាលពីថ្ងៃទី៣០ ខែសីហាកន្លងទៅ។ នេះបើតាមក្រសួងព័ត៌មាន។
កាលពីល្ងាចថ្ងៃទី៣០ ខែសីហា ក្រសួងព័ត៌មានបានប្រកាសពីការចុះឈ្មោះទៅកម្សាន្តនៅខេត្តភាគឦសានរបស់កម្ពុជា ដោយគោលការណ៍មកមុនបានមុន និងមាន ៣ជម្រើស។ ជម្រើសទី១គឺដំណើរកម្សាន្តតែមួយថ្ងៃវិលល្ងាចទៅខេត្តត្បូងឃ្មុំ ក្រចេះ និងមណ្ឌលគិរី។ ជម្រើសទី២ គឺខេត្តក្រចេះនិងមណ្ឌលគិរី ដែលត្រូវសម្រាកមួយយប់ ហើយជម្រើសទី៣ គឺខេត្តស្ទឹងត្រែង និងរតនគិរី ដែលត្រូវសម្រាកមួយយប់ដែរ។
ការចុះឈ្មោះចូលរួមដំណើរកម្សាន្តអាចធ្វើឡើងតាមអនឡាញ ដោយស្កែន QR code ហើយបំពេញព័ត៌មានដែលតម្រូវ។
ដំណើរកម្សាន្តបែបនេះត្រូវបានលោកនាយករដ្ឋមន្ត្រី ហ៊ុន ម៉ាណែត ប្រកាសកាលពីថ្ងៃទី២២ ខែសីហា មុនពេលលោកប្រកាសបើក «មូលនិធិកសាងហេដ្ឋារចនាសម្ព័ន្ធតាមព្រំដែន» ដែលមានអ្នកចូលរួមបរិច្ចាគយ៉ាងច្រើន។
យ៉ាងណាក៏ដោយ ក្រសួងព័ត៌មានបានបញ្ជាក់ថា ថវិកាសម្រាប់ចំណាយលើដំណើរកម្សាន្តនេះ គឺជាការចំណាយផ្ទាល់របស់លោកនាយករដ្ឋមន្ត្រី ហ៊ុន ម៉ាណែត និងភរិយា និងបានពីការឧបត្ថម្ភរបស់សប្បុរសជន ដោយមិនប្រើប្រាស់ថវិការដ្ឋ ឬថវិកាសាងហេដ្ឋារចនាសម្ព័ន្ធតាមព្រំដែននោះទេ។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានថ្លែងនៅថ្ងៃនេះថា ដំណើរកម្សាន្តនេះគឺដើម្បីផ្ដល់ឱកាសឲ្យប្រជាពលរដ្ឋ និងយុវជនបានទៅឃើញជាក់ស្ដែងនូវស្ថានភាពនៅតាមព្រំដែន និងនិងការរីកចម្រើននៅតំបន់នោះ។ ដំណើរកម្សាន្តនេះនឹងត្រូវរៀបចំឡើងយ៉ាងច្បាស់លាស់ដោយផ្ដោតសំខាន់លើសុវត្ថិភាពសម្រាប់អ្នកចូលរួម ដើម្បីឲ្យពួកគេបានរីករាយនិងទទួលបានចំណេះដឹង។
លោកថ្លែងដូច្នេះថា៖ «សន្ទុះនៃការចុះឈ្មោះទៅកម្សាន្តតំបន់ភាគឦសាននេះគឺជាសក្ខីភាពយ៉ាងសំខាន់ដែលនឹងបង្ហាញពីតថភាពជាក់ស្ដែង។ ខ្ញុំសូមអំពាវនាវដល់ប្រជាពលរដ្ឋ និង យុវជនបន្តគាំទ្រនិងតាមដានព័ត៌មានពិតជាក់ស្ដែង»៕