វេទិកាផ្នែកច្បាប់អន្ដរជាតិសម្រាប់មន្ដ្រីនគរបាលយុត្តិធម៌ មានគោលបំណងគាំទ្រនគរបាលដោះស្រាយបញ្ហាឧក្រិដ្ឋកម្មលើអ៊ីនធឺណិតលើកុមារ ដោយមានជំនួយពីបច្ចេកវិទ្យាទំនើប។ រូបភាព សហការី
ភ្នំពេញ៖ ប្រទសកម្ពុជាកំពុងរៀបចំវេទិកាផ្នែកច្បាប់អន្ដរជាតិសម្រាប់មន្ដ្រីនគរបាលយុត្តិធម៌ ដែលមានការចូលរួមពីសំណាក់មន្ត្រីនគរបាលយុត្តិធម៌ កងរាជអាវុធហត្ថកម្ពុជា និងអ្នកជំនាញអន្តរជាតិ ដើម្បីដោះស្រាយបញ្ហាឧក្រិដ្ឋកម្មលើអនឡាញចំពោះកុមារដោយមានជំនួយពីបច្ចេកវិទ្យាទំនើប។
វេទិកានេះរៀបចំដោយអង្គភាពការពារកុមារ (CPU) បានបើកនៅថ្ងៃទី ២៥ ខែកញ្ញា នៅសណ្ឋាគារកាំបូឌីយ៉ាណា។
មន្ត្រីនគរបាលជាង ៦០ នាក់ មកពីរាជធានីភ្នំពេញ និងខេត្តកណ្តាលបានចូលរួមវេទិការយៈពេលបីថ្ងៃ ដែលមានគោលបំណងលើកកម្ពស់ជំនាញនិងចំណេះដឹងនៃការអនុវត្តច្បាប់ក្នុងការប្រយុទ្ធប្រឆាំងនឹងឧក្រិដ្ឋកម្មតាមប្រព័ន្ធអ៊ីនធឺណិតលើកុមារ។
លោក James McCabe នាយកប្រតិបត្តិនៃ CPU បានថ្លែងថា៖ «ការរំលោភបំពានផ្លូវភេទលើកុមារតាមអ៊ីនធឺណិតគឺជាបញ្ហាសកល ហើយប្រទេសកម្ពុជាគឺជាផ្នែកនៃសហគមន៍ប៉ូលិសពិភពលោកដែលកំពុងប្រយុទ្ធប្រឆាំងនឹងឧក្រិដ្ឋកម្មទាំងនេះ»។
លោកបានបន្ដថា៖ «វេទិកានេះមានគោលបំណងពង្រឹងជំនាញដល់មន្ដ្រីនគរបាល និងធ្វើឱ្យពួកគេយល់ដឹងអំពីបច្ចេកវិទ្យាដែលអាចជួយក្នុងវិស័យប្រឈមនៃការប្រយុទ្ធប្រឆាំងនឹងឧក្រិដ្ឋកម្មលើអ៊ីនធឺណិតលើកុមារ»។
ការកើនឡើងនៃឧក្រិដ្ឋកម្មទាក់ទងនឹងអ៊ីនធឺណិត ជាពិសេសពាក់ព័ន្ធការកេងប្រវ័ញ្ចលើកុមារបានក្លាយជាបញ្ហាសកលហើយប្រទេសកម្ពុជាក៏មិនមានករណីលើកលែងដែរ។
លោក Nick Rose នាយករងនៃ CPU និងជាអតីតមន្ត្រីប៉ូលិសសហព័ន្ធអូស្ត្រាលី ជាប្រធានក្រុម ICAC។ រូបភាព សហការី
ការផ្តោតអារម្មណ៍របស់វេទិកាលើបច្ចេកវិទ្យាគឺមានសារៈសំខាន់ដោយសារការកើនឡើងនៃភាពស្មុគស្មាញនៃឧក្រិដ្ឋកម្មដែលជារឿយៗកើតឡើងតាមប្រព័ន្ធឌីជីថលនិងឆ្លងដែន។
តាមរយៈការធ្វើបទបង្ហាញ ការពិភាក្សា និងវគ្គបណ្តុះបណ្តាល អ្នកចូលរួមបានស្វែងយល់ពីការប្រើប្រាស់នូវឧបករណ៍បច្ចេកវិទ្យានិងវិធីសាស្ត្រចុងក្រោយបំផុតដែលមានដើម្បីដោះស្រាយបទល្មើសទាំងនេះប្រកបដោយប្រសិទ្ធភាព។
លោក Nick Rose នាយករងនៃ CPU និងជាអតីតមន្ត្រីប៉ូលិសសហព័ន្ធអូស្ត្រាលី ជាប្រធានក្រុម ICAC បានឱ្យដឹងថា៖ «វេទិកានេះនឹងបង្ហាញពីវិធីសាស្ត្រស៊ើបអង្កេតថ្មីៗដែលភ្នាក់ងារអនុវត្តច្បាប់កម្ពុជាអាចប្រើប្រាស់ ដើម្បីឲ្យស្របជាមួយនឹងកិច្ចខិតខំប្រឹងប្រែងអន្តរជាតិ ដែលបានបណ្តុះបណ្ដាលសមត្ថភាពនៅក្នុងស្រុក»។
អង្គភាព CPU ដែលមានវិធីសាស្ត្រពហុភាគីដោយមានក្រុមអ្នកឯកទេស និងកិច្ចសហប្រតិបត្តិការអន្តរជាតិ គឺបានបង្ហាញពីស្តង់ដាថ្មីមួយក្នុងការការពារកុមារ។
ការងាររបស់ CPU ក្នុងរយៈពេលមួយទសវត្សរ៍កន្លងមកនេះ រួមជាមួយនឹងចំណេះដឹងដែលបានចែករំលែកនៅក្នុងវេទិកាបែបនេះ ធានាថា កម្ពុជានឹងបន្តពង្រឹងសមត្ថភាពរបស់ខ្លួនដើម្បីការពារកុមារពីអំពើរំលោភបំពានតាមអ៊ីនធឺណិត។
ជាក់ស្តែង ការងាររបស់ពួកគេបាននាំទៅដល់ការស៊ើបអង្កេត និងការដោះស្រាយករណីឧក្រិដ្ឋកម្មធំៗជាង ២៦១៧ ករណី រួមទាំងឃាតកម្មច្រើនជាង ៣០០ ករណី ចាប់តាំងពីដំណើរការមក។
នៅក្នុងករណីចុងក្រោយបំផុតតាមអ៊ីនធឺណិត កុមារបីនាក់ត្រូវបានជួយសង្គ្រោះ និងជនជាតិស្វ៊ីសម្នាក់ត្រូវបានចាប់ខ្លួនបន្ទាប់ពីការស៊ើបអង្កេតរយៈពេលពីរខែជាមួយប៉ូលិសសហព័ន្ធស្វីសលើការរំលោភបំពានផ្លូវភេទលើកុមារនៅក្នុងរាជធានីភ្នំពេញ។
នៅចន្លោះថ្ងៃទី ២៦ និង ២៨ ខែកញ្ញា ឆ្នាំ ២០២៣ អ្នកស៊ើបអង្កេតបានអនុវត្តដីកាស្វែងរកនៅទីតាំងជាច្រើន ដោយរកឃើញភស្តុតាងសំខាន់ៗ ដូចជា ទូរសព្ទដៃ កាមេរ៉ា កុំព្យូទ័រយួរដៃ ភ្លើងហ្វីល សារធាតុរំអិល និងថ្នាំប៉ូវថាមពលផ្លូវភេទ។
អគ្គស្នងការរងនគរបាលជាតិកម្ពុជា លោក មួង សុធា ថ្លែងទៅកាន់មន្ដ្រីនគរបាលអំឡុងពេលវេទិកាផ្នែកច្បាប់អន្ដរជាតិសម្រាប់មន្ដ្រីនគរបាលយុត្តិធម៌នៅសណ្ឋាគារកាំបូឌីយ៉ាណាថ្ងៃនេះ។ រូបភាព ហុង រស្មី
តួនាទីបច្ចេកវិទ្យាក្នុងការប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត
ប្រធានបទសំខាន់មួយនៃវេទិកានេះគឺការប្រើប្រាស់កោសល្យវិច្ច័យឌីជីថលដើម្បីកំណត់អត្តសញ្ញាណ និងចាប់ខ្លួនជនល្មើស។
ការធ្វើកោសល្យវិច្ច័យឌីជីថល ជាឧបករណ៍ទំនើបមួយ អនុញ្ញាតឱ្យអ្នកស៊ើបអង្កេតប្រមូល និងវិភាគភស្តុតាងតាមអ៊ីនធឺណិតប្រកបដោយប្រសិទ្ធភាព។
Cyacomb ជាក្រុមហ៊ុនដែលបង្កើតដោយចក្រភពអង់គ្លេសមានឯកទេសខាងកោសល្យវិច្ច័យបានបង្ហាញឧបករណ៍របស់ខ្លួនដែលអនុញ្ញាតឱ្យការអនុវត្តច្បាប់ស្វែងរកភ័ស្តុតាងឌីជីថលដ៏ច្រើនសន្ធឹកសន្ធាប់លឿនជាងវិធីសាស្ត្រប្រពៃណី។
ឧបករណ៍ទាំងនេះបានបង្ហាញថាមានប្រសិទ្ធភាពក្នុងការកំណត់អត្តសញ្ញាណសម្ភារកេងប្រវ័ញ្ចកុមារនៅលើឧបករណ៍ បង្កើនល្បឿនដំណើរការស៊ើបអង្កេត។
លោក Nick Rose បន្តថា៖ «វេទិកានេះផងដែរ មានគោលបំណងការលើកកម្ពស់ការយល់ដឹង និងការបង្កើនសមត្ថភាពនៃការអនុវត្តច្បាប់កម្ពុជាក្នុងការធ្វើកោសល្យវិច្ច័យឌីជីថល និងការស៊ើបអង្កេត។ ចំណេះដឹងដែលបានចែករំលែកនៅទីនេះនឹងមានសារៈសំខាន់ក្នុងការប្រយុទ្ធប្រឆាំងមិនគ្រាន់តែការកេងប្រវ័ញ្ចលើកុមារប៉ុណ្ណោះទេ ប៉ុន្តែឧក្រិដ្ឋកម្មដែលប្រើអ៊ីនធឺណិតគ្រប់ប្រភេទ»។
វេទិកាផ្នែកច្បាប់អន្ដរជាតិសម្រាប់មន្ដ្រីនគរបាលយុត្តិធម៌ មានគោលបំណងគាំទ្រនគរបាលដោះស្រាយបញ្ហាឧក្រិដ្ឋកម្មលើអ៊ីនធឺណិតលើកុមារដោយមានជំនួយពីបច្ចេកវិទ្យាទំនើប។ រូបភាព ហុង រស្មី
កិច្ចសហប្រតិបត្តិការអន្តរជាតិ និងជំនាញ
បញ្ហាលើបណ្ដាញអ៊ីនធឺណិតទាមទារឱ្យមានកិច្ចសហប្រតិបត្តិការឆ្លងព្រំដែន។ អ្នកជំនាញមកពីប្រទេសរួមមាន អូស្ត្រាលី ចក្រភពអង់គ្លេស និងសហរដ្ឋអាមេរិក កំពុងចូលរួម ដោយចែករំលែកបទពិសោធន៍ និងបច្ចេកវិទ្យាទំនើបរបស់ពួកគេជាមួយមន្ត្រីអនុវត្តច្បាប់កម្ពុជា។
អតីតចៅក្រមនៃតុលាការសហព័ន្ធសហព័ន្ធអូស្ត្រាលី លោក John Pascoe និងអ្នកតំណាងមកពី US Homeland Security និងមូលនិធិឃ្លាំមើលអ៊ីនធឺណិត (IWF) ស្ថិតក្នុងចំណោមវាគ្មិនសំខាន់ៗ។
IWF ជាអង្គការសប្បុរសធម៌ដែលមានមូលដ្ឋាននៅចក្រភពអង់គ្លេស ដើរតួនាទីយ៉ាងសំខាន់ក្នុងការត្រួតពិនិត្យ និងរាយការណ៍អំពីសម្ភារៈរំលោភបំពានផ្លូវភេទលើកុមារនៅលើអ៊ីនធឺណិតទូទាំងពិភពលោក។
អគ្គស្នងការរងនគរបាលជាតិកម្ពុជា លោក មួង សុធា បានថ្លែងថា វេទិកានេះធ្វើឡើងដើម្បីចែករំលែកបទពិសោធន៍ និងចំណេះដឹងថ្មីៗស្តីពីបច្ចេកទេសស៊ើបអង្កេត និងភ័ស្តុតាងកោសល្យវិច្ច័យដល់មន្ត្រីនគរបាលយុត្តិធម៌កម្ពុជា។
លោកបានឱ្យដឹងថា បទបង្ហាញនោះ រួមមាន ភ័ស្ដុតាងឌីជីថល DNA, ចម្លើយបំភ្លឺ ការគាំពារកុមារក្នុងប្រព័ន្ធច្បាប់ ករណីសិក្សាអនាគតនៃការការពារក្ដី មូលហេតុនៃការស្លាប់ សីលធម៌ក្នុងប្រព័ន្ធច្បាប់ ប្រភពនៃភ័ស្ដុតាង កោសល្យវិច្ឆ័យសាកសព និងច្បាប់ក្នុងការផ្សព្វផ្សាយ។
លោកបានថ្លែងថា៖ «នេះគឺជាការចែករំលែកបទពិសោធពីគ្នាទៅវិញទៅមកអំពីបច្ចេកទេសស៊ើបអង្កេតជាមួយច្បាប់កម្ពុជា និងច្បាប់អន្ដរជាតិ។ អស់លោកគឺជាអ្នកស៊ើបអង្កេត ហើយភ្ញៀវមកពីអូស្ដ្រាលីក៏ជាអ្នកស៊ើបអង្កេត ដែលនឹងបង្ហាញពីបច្ចេកទេសពិសេស។ យើងអាចចែករំលែកជំនាញស្រាវជ្រាវល្អិតល្អន់ផ្ទាល់នៅកន្លែងកើតហេតុ បូកបន្ថែមជាមួយបច្ចេកទេសទំនើប»។
លោក Stephan Werner សញ្ជាតិស្វ៊ីស ត្រូវបានចាប់ខ្លួនចំពោះការផ្សាយបន្តផ្ទាល់ពីការរំលោភផ្លូវភេទលើកុមារ បន្ទាប់ពីមានការស៊ើបអង្កេតរយៈពេលពីរខែនៅក្នុងទីក្រុងភ្នំពេញ។ រូបភាព សហការី
វេទិកានេះក៏បានគូសបញ្ជាក់ពីកិច្ចខិតខំប្រឹងប្រែងរបស់កម្ពុជាក្នុងការលើកកម្ពស់សមត្ថភាពរបស់ខ្លួនក្នុងវិស័យឧក្រិដ្ឋកម្មអនឡាញ។
ចាប់តាំងពីការបង្កើតឡើងក្នុងឆ្នាំ ២០១៣ មក អង្គភាព CPU សហការជាមួយមូលនិធិកុមារកម្ពុជា (CCF) និងអគ្គស្នងការនគរបាលជាតិកម្ពុជា បានធ្វើការដើម្បីនាំជនល្មើសមកកាត់ទោស និងការពារកុមារងាយរងគ្រោះ។
នៅឆ្នាំ ២០១៩ CPU បានបង្កើតអង្គភាពដែលខិតខំប្រឹងប្រែងដំបូងបង្អស់របស់កម្ពុជាដើម្បីដោះស្រាយឧក្រិដ្ឋកម្មអ៊ីនធឺណិតប្រឆាំងនឹងកុមារ ដែលចាប់តាំងពីពេលនោះមកបានធ្វើការស៊ើបអង្កេតជាង ១០០ករណី។
ការគំរាមកំហែងកាន់តែខ្លាំងឡើងនៅកម្ពុជា និងទូទាំងពិភពលោក
ប្រទេសកម្ពុជាបានជួបប្រទះនឹងការកើនឡើងយ៉ាងខ្លាំងនៃឧក្រិដ្ឋកម្មតាមអ៊ីនធឺណិតលើកុមារក្នុងរយៈពេលប៉ុន្មានឆ្នាំចុងក្រោយនេះ។
យោងតាម CPU ការកេងប្រវ័ញ្ចតាមអ៊ីនធឺណែតលើកុមារគឺជាការគំរាមកំហែងដែលកំពុងកើតមាននៅក្នុងប្រទេស។
លោក James McCabe (អាវយឺតពណ៌ខ្មៅនៅកណ្តាល) បានដឹកនាំការស៊ើបអង្កេតដើម្បីចាប់ខ្លួន Stephan Werner ។ រូបភាព សហការី
ក្រុម CPU's Internet Crimes Against Children (ICAC) ដែលដឹកនាំដោយលោក Nick Rose បានឈានមុខគេក្នុងកិច្ចខិតខំប្រឹងប្រែងដើម្បីប្រយុទ្ធប្រឆាំងនឹងបទល្មើសទាំងនេះ។
ក្រុមការងារ ICAC បានស៊ើបអង្កេតករណីរំលោភបំពានលើកុមារតាមអ៊ីនធឺណិតចំនួន ១១៨ ករណីចាប់តាំងពីការបង្កើតរបស់ខ្លួន ដោយដើរតួនាទីយ៉ាងសំខាន់ក្នុងការការពារកុមារ និងនាំជនល្មើសមកប្រឈមនឹងយុត្តិធម៌។
លោក McCabe បាននិយាយថា៖ «ឧក្រិដ្ឋកម្មកេងប្រវ័ញ្ចលើអ៊ីនធឺណិត រួមទាំងកុមារអាចជាបញ្ហាស្មុគស្មាញ ហើយអាចកើតឡើងគ្រប់ទីកន្លែងក្នុងពិភពលោក។ ការទទួលបានចំណេះដឹងអំពីរបៀបស៊ើបអង្កេតឧក្រិដ្ឋកម្មបែបនេះ និងការទទួលបានការយល់ដឹងអំពីវិសាលភាពនៃឧក្រិដ្ឋកម្មទាំងនេះ អាចជួយក្នុងការរកឃើញនិងការចាប់ខ្លួនជនដែលប្រព្រឹត្តឧក្រិដ្ឋកម្មបែបនេះ»។
លោកបានសង្កត់ធ្ងន់លើតម្រូវការសម្រាប់ការសម្របខ្លួននៅក្នុងពិភពលោកដែលផ្លាស់ប្តូរជានិច្ចជាកាល ដោយគូសបញ្ជាក់ថា វេទិកាផ្នែកច្បាប់អន្ដរជាតិសម្រាប់មន្ដ្រីនគរបាលយុត្តិធម៌ផ្តល់ឱកាសមួយដើម្បីបង្កើតមូលដ្ឋានគ្រឹះសំខាន់ៗ។
លោកបានកត់សម្គាល់ថា នេះរួមបញ្ចូលទាំងការផ្តល់ចំណេះដឹង និងជំនាញចាំបាច់ដល់មន្ត្រីនរគបាលដើម្បីចាប់ជនល្មើស និងធានាថា ជនរងគ្រោះទទួលបានការគាំទ្រគ្រប់គ្រាន់ក្នុងប្រព័ន្ធតុលាការ៕
