គម្រោងជំរុញការផ្គត់ផ្គង់ទឹកស្អាត និងអនាម័យតម្លៃជាង១៨៤លានដុល្លារ ត្រូវបានប្រកាសដាក់ឱ្យដំណើរការជាផ្លូវការ នាថ្ងៃទី២៦ ខែកញ្ញានេះ។ រូបថត សហការី
ភ្នំពេញៈ គម្រោងជំរុញការផ្គត់ផ្គង់ទឹកស្អាត និងអនាម័យតម្លៃជាង១៨៤លានដុល្លារ ត្រូវបានប្រកាសដាក់ឱ្យដំណើរការជាផ្លូវការ នាថ្ងៃទី២៦ ខែកញ្ញានេះ ដើម្បីឆ្លើយតបទៅនឹងកំណើននៃតម្រូវការ ព្រមទាំងពន្លឿនវឌ្ឍនភាពឆ្ពោះទៅការសម្រេចគោលដៅអភិវឌ្ឍន៍ប្រកបដោយចីរភាពរបស់កម្ពុជា ស្តីពីទឹកស្អាត និងអនាម័យត្រឹមឆ្នាំ២០៣០។
គម្រោងជំរុញការផ្គត់ផ្គង់ទឹកស្អាត និងអនាម័យ (Water Supply and Sanitation Acceleration Project-WASAC) មានរយៈពេល៥ឆ្នាំ ក្នុងគម្រោងថវិកាប្រមាណ ១៨៤,៩ លានដុល្លារអាមេរិក។ ក្នុងនោះ ១៦៣លានដុល្លារជាហិរញ្ញប្បទានសម្បទានរបស់ធនាគារពិភពលោក ៤,៣លានដុល្លារជាថវិកាបដិភាគរបស់រាជរដ្ឋាភិបាល និងប្រមាណ១៧,៦លានដុល្លារជាការវិនិយោគពីវិស័យឯកជន។
គម្រោងនេះត្រូវបានអនុវត្តរួមគ្នាដោយ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងក្រសួងសាធារណការ និងដឹកជញ្ជូន។
រដ្ឋមន្រ្តីក្រសួងឧស្សាហកម្ម លោកហែម វណ្ណឌី បានលើកឡើងក្នុងសុន្ទរកថាបើកសិក្ខាសាលាប្រកាសដាក់ឱ្យអនុវត្តគម្រោងនេះថា ក្រសួងកំពុងចាត់ចែងអនុវត្តសកម្មភាពការងារជាយុទ្ធសាស្ត្រមួយចំនួន។ ក្នុងនោះរួមមាន ការធ្វើបច្ចុប្បន្នភាពគោលនយោបាយទឹកស្អាត និងអនាម័យ, ការសិក្សារៀបចំផែនការយុទ្ធសាស្ត្រ និងផែនការអភិវឌ្ឍន៍វិស័យទឹកស្អាតតាមបណ្តាខេត្ត, ការពង្រឹងសមត្ថភាពរបស់ប្រតិបត្តិករទឹកស្អាត ពិសេសរដ្ឋាករទឹកសាធារណៈ, ការពង្រឹងការអនុវត្តច្បាប់ ក៏ដូចជាការរៀបចំយន្តការហិរញ្ញវត្ថុ និងស្ថាប័ន ដើម្បីពន្លឿនកំណើននៃវិស័យនេះ។
លោករដ្ឋមន្រ្តីបញ្ជាក់ថា៖«គោលដៅចម្បង គឺអង្គភាពរដ្ឋាករទឹកទាំងអស់ត្រូវមានសមត្ថភាពរឹងមាំក្នុងរយៈពេល៣ ទៅ ៤ឆ្នាំខាងមុខ និងមានលទ្ធភាពគ្រប់គ្រាន់ក្នុងការចូលអន្តរាគមន៍ផ្គត់ផ្គង់ទឹកស្អាតតាមគ្រប់រូបភាពនៅតាមតំបន់នានា និងឆ្លើយតបបានតាមតម្រូវការរីកចម្រើននៃវិស័យឧស្សាហកម្ម ធុរកិច្ច និងទីផ្សារ ក៏ដូចជាវឌ្ឍនភាពសង្គម-សេដ្ឋកិច្ចកម្ពុជាជារួម ខណៈដែលយើងកំពុងវិវត្តឆ្ពោះទៅជាប្រទេសចំណូលមធ្យមកម្រិតខ្ពស់ ដែលពឹងផ្អែកលើឧស្សាហកម្មដែលមានតម្លៃបន្ថែមខ្ពស់»។
ធនាគារពិភពលោកក៏បានឱ្យដឹងផងដែរថា គម្រោងនេះ ត្រូវបានអនុម័តដោយក្រុមប្រឹក្សាភិបាលធនាគារពិភពលោកកាលពីចុងឆ្នាំកន្លងទៅ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការពង្រឹងសេវាផ្គត់ផ្គង់ទឹកស្អាត និងអនាម័យនៅក្នុងខេត្តទាំងបួន ដែលនឹងផ្តល់អត្ថប្រយោជន៍ដល់ប្រជាជនជាង ១៧៥ ០០០នាក់ រួមទាំងសហគមន៍ជនជាតិដើមភាគតិចផងដែរ។ គម្រោងដែលមានតម្លៃ១៦៣លានដុល្លារអាមេរិក គឺជាគម្រោងផ្គត់ផ្គង់ទឹកស្អាត និងអនាម័យទី២នៅកម្ពុជា ដែលត្រូវបានគាំទ្រដោយធនាគារពិភពលោក បន្ថែមពីលើគម្រោង ដែលកំពុងដំណើរការ ដែលមានទឹកប្រាក់ចំនួន ៥៥លានដុល្លារអាមេរិក។
សមាសធាតុទី១ នៃគម្រោងគឺ ផ្តោតលើការកសាងប្រព័ន្ធផ្គត់ផ្គង់ទឹកស្អាតថ្មីសម្រាប់រដ្ឋាករទឹក នៅក្រុងសែនមនោរម្យ ខេត្តមណ្ឌលគិរី ក្រុងពោធិ៍សាត់ ក្នុងខេត្តពោធិ៍សាត់ និងក្រុងបាត់ដំបង និងស្រុកភ្នំព្រឹក ក្នុងខេត្តបាត់ដំបង ដោយពង្រីកសេវាផ្គត់ផ្គង់ទឹកស្អាតនៅក្នុងតំបន់ទាំងនោះ។
ក្រៅពីនោះ ប្រតិបត្តិករទឹកស្អាតឯកជនក្នុងខេត្តប៉ៃលិន និងខេត្តកណ្តាល ក៏អាចទទួល ជំនួយបច្ចេកទេស និងជំនួយហិរញ្ញវត្ថុពីគម្រោងនេះផងដែរ។
លោករដ្ឋមន្រ្តីក៏បានឱ្យដឹងផងដែរថា ក្រសួងក៏បាននិងកំពុងសហការជាមួយក្រសួងធនធានទឹក និងឧតុនិយម ដៃគូអភិវឌ្ឍន៍ និងប្រតិបត្តិករទឹកស្អាត ដើម្បីដោះស្រាយបញ្ហានៃការបាត់បង់ប្រភពទឹក ដែលបណ្តាលមកពីការប្រែប្រួលអាកាសធាតុ។ លើសពីនោះ ក្រសួងក៏កំពុងសហការជាមួយក្រសួងសាធារណការ និងដឹកជញ្ជូន ដើម្បីកាត់បន្ថយផលប៉ះពាល់នៃគម្រោងសាងសង់ហេដ្ឋារចនាសម្ព័ន្ធមកលើបណ្តាញទឹកស្អាតផងដែរ។
យោងតាមក្រសួងសាធារណការបានឱ្យដឹងថា គម្រោងជំរុញការផ្គត់ផ្គង់ទឹកស្អាត និងអនាម័យ ក្រោមក្របខ័ណ្ឌឥណទានហិរញ្ញប្បទានពីធនាគារពិភពលោកនេះ គឺធ្វើឡើងតាមរយៈកិច្ចព្រមព្រៀងហិរញ្ញប្បទានចុះថ្ងៃទី១៤ ខែធ្នូ ឆ្នាំ២០២៣ និងមានសុពលភាពអនុវត្តចាប់ពីថ្ងៃទី២២ ខែកុម្ភៈ ឆ្នាំ២០២៤ និងអនុវត្តក្នុងខេត្តគោលដៅចំនួន៣ គឺក្រុងតាខ្មៅ ក្រុងបាត់ដំបង និងក្រុងពោធិ៍សាត់ សម្រាប់ផ្នែកអនាម័យ។
គម្រោងនឹងរួមចំណែកលើចំនុចសំខាន់ៗលើវិស័យអនាម័យមួយចំនួន។ ក្នុងនោះរួមមានគាំទ្រដល់ក្រុងបាត់ដំបង ពោធិ៍សាត់ និងខេត្តកណ្តាល ជាមួយនឹងការវិនិយោគលើប្រព័ន្ធអនាម័យ រួមមានបណ្តាញប្រមូលទឹកកខ្វក់ ស្ថានីយប្រព្រឹត្តកម្មទឹកកខ្វក់ ស្ថានីយបូមទឹកកខ្វក់ និងការតភ្ជាប់តាមផ្ទះ និងបង្កើតផែនការអនាម័យទូទាំងទីក្រុងសម្រាប់ក្រុងទាំង៣។ ក្រៅពីនោះ មានការអភិវឌ្ឍស្ថាប័ន និងសមត្ថភាពសម្រាប់ការគ្រប់គ្រងប្រតិបត្តិការនៃប្រព័ន្ធទឹកកខ្វក់ ការអនុវត្តក្របខ័ណ្ឌសេវាទឹកកខ្វក់ ដើម្បីនិរន្តភាព នៃការវិនិយោគ និងការលើកកម្ពស់កម្មវិធីអនាម័យដែលនឹងជួយជំរុញឱ្យគ្រួសារតភ្ជាប់ទៅបណ្តាញលូ ដោយផ្តល់អាទិភាពដល់គ្រួសារជាស្ត្រី និងជនពិការ និងរួមបញ្ចូលមធ្យោបាយផ្សេងទៀតដើម្បីបង្កើនការតភ្ជាប់ជាដើម៕
