លោកស្រី ឃួន សុដារី ចាប់ដៃជាមួយឯកអគ្គរដ្ឋទូតចិនប្រចាំកម្ពុជា Wang Wenbin នៅពេលត្រឡប់មកកម្ពុជាពីប្រទេសចិន កាលពីថ្ងៃទី២៦ ខែកញ្ញា។ រដ្ឋសភាកម្ពុជា
ទំនាក់ទំនងរវាងកម្ពុជានិងចិនកម្រិតសភា ត្រូវបានពង្រឹងមួយកម្រិតទៀតតាមរយៈការចុះហត្ថលេខាលើឯកសារពង្រឹងទំនាក់ទំនងចំនួនពីរដោយដោយថ្នាក់ដឹកនាំសភានៃប្រទេស ដែលត្រូវបានចាត់ទុកថាជា «សមិទ្ធិផលជាប្រវត្តិសាស្ត្រ»។
ឯកសារទាំងពីររួមមានកិច្ចព្រមព្រៀងស្តីពីកិច្ចសហប្រតិបត្តិការរវាងរដ្ឋសភាប្រទេសទំាងពីរ ដែលត្រូវបានចុះហត្ថលេខាដោយ លោកស្រី ឃួន សុដារី ប្រធានរដ្ឋសភាកម្ពុជា និងលោក ចាវ ឡឺជី ប្រធានគណៈកម្មាធិការអចិន្រ្តៃយ៍នៃសភាតំណាងប្រជាជនចិន និងនិងអនុស្សរណៈនៃការយោគយល់គ្នា ចុះហត្ថលេខាដោយលោក ឡេង ប៉េងឡុង អគ្គលេខាធិការរដ្ឋសភាកម្ពុជា និងលោក លីវ ឈី អគ្គលេខាធិការគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេស។
ពិធីចុះហត្ថលេខានេះធ្វើឡើងក្នុងអំឡុងទស្សនកិច្ចរបស់លោកស្រី ឃួន សុដារី ទៅប្រទេសចិនរយៈពេល ៥ថ្ងៃ ដែលបានបញ្ចប់កាលពីថ្ងៃទី២៦ ខែកញ្ញា ដោយលោកស្រីបានជួបជាមួយថ្នាក់ដឹកនាំសភាចិនមួយចំនួនរួមទាំងវិស័យឯកជនផងដែរ។ នេះបើតាមរដ្ឋសភាកម្ពុជា។
សេចក្ដីប្រកាសព័ត៌មានរបស់រដ្ឋសភាបញ្ជាក់ថា៖ «ឯកសារទំាងពីរដែលបានចុះហត្ថលេខានេះ ជាសមិទ្ធផលប្រវត្តិសាស្រ្តថ្មីមួយទៀតនៃទំនាក់ទំនងសភាប្រទេសទំាងពីរ ដែលជាមូលដ្ឋានគ្រឹះ ក្នុងការពង្រឹង ពង្រីកបន្ថែមទៀតនូវកិច្ចសហប្រតិបត្តិការទ្វេភាគីឱ្យកាន់តែទូលំទូលាយ ស៊ីជម្រៅ និងសម្រេចបានលទ្ធផលជាក់ស្តែង»។
រដ្ឋសភាកម្ពុជា ក៏បានលើកឡើងដែរថា លោកស្រី ឃួន សុដារី និងថ្នាក់ដឹកនាំសភាប្រជាជនចិន បានសន្យារួមគ្នាថា នឹងជំរុញបន្ថែមទៀតនូវការបន្ស៊ីនៅក្នុងកិច្ចសហប្រតិបត្តិការត្បូងពេជ្ររវាងគំនិតផ្តួមផ្តើមនានារបស់ភាគីចិន ដូចជាគម្រោងខ្សែក្រវាត់និងផ្លូវ ជាមួយយុទ្ធសាស្រ្តបញ្ចកោណដំណាក់កាលទី១ របស់កម្ពុជា។ ដើម្បីបម្រើផលប្រយោជន៍នៃប្រទេសទំាងពីរក្នុងការកសាងសហគមន៍ជោគវាសនារួមកម្ពុជា-ចិន ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានថ្លែងថា ទំនាក់ទំនងកម្រិតសភានៃប្រទេសទាំងពីរគឺស្ថិតនៅក្រោមកិច្ចសហប្រតិបត្តិការត្បូងពេជ្រ និងមិត្តភាពដែកថែប រវាងប្រទេសទាំងពីរ ដើម្បីឲ្យទំនាក់ទំនងនៃប្រទេសទាំងពីររឹងមាំលើគ្រប់ទិដ្ឋភាព ស្របពេលឆ្នាំ២០២៤នេះគឺជាឆ្នាំនៃទំនាក់ទំនងរវាងប្រជាជាននិងប្រជាជននៃប្រទេសទាំងពីរ។
លោកថ្លែងថា មិត្តភាពដែកថែបគឺត្រូវរឹងមាំលើគ្រប់ទិដ្ឋភាពនិងគ្រប់វិស័យ និងអំណាចទាំងបី គឺនីតិប្បញ្ញតិ នីតិប្រតិបត្តិ វិស័យយុត្តិធម៌ វិស័យការពារជាតិ អប់រំ បច្ចេកវិទ្យា ជាដើម។ កិច្ចសហប្រតិបត្តិការនេះនឹងជួយធ្វើឲ្យកម្ពុជាកាន់តែរឹងមាំ ដោយហេតុថា ចិនជាប្រទេសមហាអំណាចមិនអាចរឹងមាំតែម្នាក់ឯង ដរាបណាដៃគូរបស់ខ្លួនក្នុងតំបន់នៅទន់ខ្សោយ។
លោកថ្លែងថា៖ «ចិនអាចរឹងមាំនៅក្នុងតំនប់តាមរយៈកម្ពុជា រីឯកម្ពុជាទទួលបានប្រយោជន៍ពីកិច្ចសហប្រតិបត្តិការជាមួយចិនលើគ្រប់វិស័យ ធ្វើឲ្យកម្ពុជារីកចម្រើន និងរឹងមាំខ្លួនឯងដែរ»៕
