អូស្ត្រាលីចង់ឃើញតំបន់ឥណ្ឌូប៉ាស៊ីហ្វិក មានតុល្យភាព ហើយប្រទេសនីមួយៗអាចសម្រេចជោគវាសនារបស់របស់ខ្លួនដោយខ្លួនឯង។ ការលើកឡើងនេះធ្វើឡើងស្របពេលដែលនាវាកងទ័ពជើងទឹករបស់ខ្លួន HMAS Perth កំពុងចតនៅកំពង់ផែស្វយ័តក្រុងព្រះសីហនុដើម្បីពង្រឹងទំនាក់ទំនងជាមួយភាគីកម្ពុជា.
ស្ថានទូតអូស្រ្តាលីបានថ្លែងនៅលើទំព័រហ្វេសប៊ុករបស់ខ្លួននៅព្រឹកនេះថា អូស្ត្រាលីបន្តការចូលរួមវិស័យការពារជាតិរបស់យើងយ៉ាងជិតស្និទ្ធជាមួយប្រទេសកម្ពុជា ដើម្បីគាំទ្រដល់តំបន់ឥណ្ឌូប៉ាស៊ីហ្វិកឲ្យមានសន្តិភាព ស្ថិរភាព និងវិបុលភាព។
នាវា HMAS Perth បានចូលចតនៅខេត្តព្រះសីហនុកាលពីថ្ងៃទី២ និងត្រូវចាកចេញនៅថ្ងៃទី៤ ក្នុងបេសកកម្មដែលជាផ្នែកមួយនៃកិច្ចសហប្រតិបតិ្តការខិតខំប្រឹងប្រែងតំបន់ឥណ្ឌូប៉ាស៊ីហ្វិក (IPE 2024) ដែលត្រូវបានប្រកាសកាលពីពាក់កណ្ដាលខែមុន ដើម្បីពង្រឹងទំនាក់ទំនងជាមួយប្រទេសជាង១០ នៅក្នុងតំបន់នេះ។
នាវានេះដឹកនាវិកចំនួន ១៩០នាក់ បានចូលដល់ខេត្តព្រះសីហនុកាលពីម្សិលមិញ បន្ទាប់ពីបានចាកចេញពីប្រទេសឥណ្ឌូណេស៊ី។ ក្រុមនាវិកត្រូវបានស្វាគមន៍ដោយលោក យន់ មីន រដ្ឋលេខាធិការក្រសួងការពារជាតិ នៅថ្ងៃទី២ ខែកញ្ញា។
ស្ថានទូតអូស្ត្រាលីបន្តថា កិច្ចសហប្រតិបត្តិការខិតខំប្រឹងប្រែងតំបន់ឥណ្ឌូប៉ាស៊ីហ្វិក គឺជាការប្ដេជ្ញាចិត្តយូរអង្វែងណាស់មកហើយក្នុងការធ្វើការជាមួយបណ្តាដៃគូរបស់យើងនៅទូទាំងតំបន់អាស៊ីអាគ្នេយ៍ និងតំបន់ផ្សេងៗទៀត។
ស្ថានទូតបញ្ជាក់ថា៖ យើងចង់ធានាឲ្យបានថា តំបន់របស់យើងមានតុល្យភាព ដែលប្រទេសតូច និងមធ្យមមិនត្រូវបានគ្របដណ្តប់ដោយប្រទេសអំណាចធំៗនោះទេ ហើយជាកន្លែងដែលយើងទាំងអស់គ្នាអាចសម្រេចជោគវាសនារបស់យើងបានដោយខ្លួនឯង។
លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់ឲ្យដឹងថា នេះជាលើកទី១៦ ហើយដែលនាវាកងទ័ពជើងទឹកអូស្ត្រាលីបានចូលចតនៅកំពង់ផែខេត្តព្រះសីហនុ គិតចាប់ពីឆ្នាំ២០០៣មក។ លោកយល់ថា ដំណើរទស្សនកិច្ចនេះនឹងពង្រឹងទំនាក់ទំនងរវាងកងទ័ពជើងទឹកនៃប្រទេសទាំងពីរ។
លោក Michael John Harris ប្រធានគណៈប្រតិភូនៃនាវា HMAS Perth បានថ្លែងថា ការចូលចតនាវានេះគឺក្នុងគោលបំណងបង្កើនទំនាក់ទំនងទ្វេភាគី។
លោកត្រូវបានស្រង់សម្ដីដោយរដ្ឋបាលខេត្តព្រះសីហនុថា៖ «យើងបានមកដល់ប្រទេសកម្ពុជា បានចូលចតនៅកំពង់ផែស្វយ័តក្រុងព្រះសីហនុ នេះជាឱកាសដើម្បីឲ្យនាវិក និងពលនាវីរបស់យើងបានស្វែងយល់ពីគ្នាទៅវិញទៅមក»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា វាជាការល្អដែលនាវាអូស្ត្រាលីបានចូលចតនៅខេត្តព្រះសីហនុ និងបានឃើញទិដ្ឋភាពជាក់ស្ដែងរបស់កម្ពុជា ជាពិសេសពាក់ព័ន្ធនឹងការចោទប្រកាន់ថា មូលដ្ឋានទ័ពរាមមានជាប់ពាក់ព័ន្ធនឹងយោធាចិន។
យ៉ាងណាក៏ដោយ លោកថា ទស្សនកិច្ចនេះមិនអាចលុបបំបាត់ការសង្ស័យរបស់ប្រទេសលោកខាងលិចរឿងវត្តមានយោធាចិននៅមូលដ្ឋានទ័ពជើងទឹករាមនោះទេ ពីព្រោះវាជាការអះអាងដើម្បីផលប្រយោជន៍ភូមិសាស្ត្រនយោបាយ និងជាសារទៅប្រទេសចិនកុំឲ្យពង្រីកឥទ្ធិពលយោធារបស់ខ្លួននៅតំបន់អាស៊ាន។
យ៉ាងណាក៏ដោយ លោកថា ទំនាក់ទំនងរវាងកម្ពុជានិងអូស្ត្រាលីមានភាពរីកចម្រើនច្រើន នៅតែបញ្ហាមួយចំនួនពាក់ព័ន្ធនឹងការយល់ឃើញខុសគ្នាលើបញ្ហាសិទ្ធិមនុស្សនិងប្រជាធិបតេយ្យ និងរឿងនយោបាយ។
លោកថ្លែងដូច្នេះថា៖ «ដូច្នេះ ប្រទេសទាំងពីរត្រូវតែបន្តពង្រឹងនិងពង្រីកកិច្ចសហប្រតិបត្តិការរបស់ខ្លួនក្នុងក្របខណ្ឌទ្វេភាគីក្ដី ឬពហុភាគីក្ដី គឺត្រូវលើកកម្ពស់ទំនាក់ទំនងតាមវិស័យ ហើយមិនគួរឲ្យការមិនយល់គ្នានោះជាបញ្ហាប្រឈម ឬជាស្បៃពពកដែលបិទបាំងទិដ្ឋភាពរួមនៃទំនាក់ទំនងរវាងប្រទេសទាំងពីរនោះទេ»៕