រូបថត១៖ ព័ត៌មានក្លែងក្លាយដែលផ្សព្វផ្សាយថា រដ្ឋមន្ត្រីក្រសួងមហាផ្ទៃ ស សុខា ត្រូវបានឋានៈជាសម្ដេចក្រុមព្រះ។ ហ្វេសប៊ុក លោក ស សុខា
ក្រសួងស្ថាប័នជាច្រើនហាក់មានភាពមមាញឹកក្នុងការឆ្លើយតបនឹងព័ត៌មានក្លែងក្លាយ ដែលត្រូវបានបង្ហោះនៅលើបណ្ដាញសង្គមស្ទើររៀងរាល់សប្ដាហ៍ ជាពិសេសព័ត៌មានក្លែងក្លាយដែលផលិតនៅក្រៅប្រទេស។
ព័ត៌មានក្លែងក្លាយចុងក្រោយកើតឡើងនៅថ្ងៃទី៣ ខែកញ្ញានេះ ដោយអ្នកក្លែងបន្លំបានផ្សព្វផ្សាយព្រះរាជក្រឹត្យក្លែងក្លាយថា លោក ស សុខា រដ្ឋមន្ត្រីក្រសួងមហាផ្ទៃត្រូវបានដំឡើងឋានៈជាសម្ដេចក្រុមព្រះ។ ព័ត៌មានក្លែងក្លាយនេះ ត្រូវបានលោក ស សុខា បដិសេធភ្លាម និងស្នើឲ្យសមត្ថកិច្ចនាំខ្លួនជនល្មើសមកផ្ដន្ទាទោសតាមច្បាប់។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានថ្លែងថា ព័ត៌មានក្លែងក្លាយបានមានសន្ទុះខ្លាំងក្លាឡើង នៅពេលពិភពលោកមានមធ្យោបាយទំនើបសម្រាប់ប្រើប្រាស់ក្នុងការប្រាស្រ័យទាក់ទងគ្នា ផ្តល់និងទទួលព័ត៌មាន ដែលរួមចំណែកដោយការប្រើប្រាស់បច្ចេកវិទ្យា Ai។
លោកបន្តថា ការប្រឆាំងព័ត៌មានក្លែងក្លាយទាមទារឱ្យមានការចូលរួមពីគ្រប់ភាគីក្នុងសង្គម ក្នុងនោះប្រជាពលរដ្ឋដែលជាអ្នកទទួល ចែកចាយ និងប្រើប្រាស់ព័ត៌មាន ជាពិសេសលើបណ្ដាញទំនាក់ទំនងសង្គមគ្រប់ប្រភេទ មានតួនាទីសំខាន់ក្នុងការរួមចំណែកទប់ស្កាត់ និងកាត់បន្ថយព័ត៌មានក្លែងក្លាយពីក្នុងលំហព័ត៌មានក្នុងសង្គមរស់នៅរបស់យើង។
លោកថ្លែងថា ក្រសួងព័ត៌មាននឹងរៀបចំយុទ្ធនាការ«និយាយថាទេចំពោះព័ត៌មានក្លែងក្លាយ Say No to Fake News!» នៅចុងឆ្នាំ២០២៤ ក្នុងគោលបំណងកាត់បន្ថយជាអប្បបរិមានូវព័ត៌មានក្លែងក្លាយពីលំហព័ត៌មានក្នុងសង្គមដើម្បីធានាសន្តិសុខព័ត៌មាន។
លោកថ្លែងថា៖ «គោលដៅនៃយុទ្ធនាការនេះផ្តោតលើការផ្លាស់ប្តូរឥរិយាបថរបស់ប្រជាជន ដែលជាអ្នកប្រើប្រាស់បណ្ដាញទំនាក់ទំនងសង្គម និងប្រព័ន្ធផ្សព្វផ្សាយទំនើប ដើម្បីទប់ស្កាត់ការរីកសាយភាយនូវព័ត៌មានក្លែងក្លាយក្នុងសង្គមកម្ពុជា»។
លោកបន្តថា៖ «នៅពេលប្រជាពលរដ្ឋ និងអ្នកប្រើប្រាស់ម្នាក់ៗយល់ដឹងអំពីផលវិបាកនៃព័ត៌មានក្លែងក្លាយ និងចេះបង្កើនការប្រុងប្រយ័ត្នក្នុងការប្រើប្រាស់ ប្រកបដោយការទទួលខុសត្រូវ ជាពិសេសមុនការចែកចាយព័ត៌មានណាមួយ ត្រូវផ្ទៀងផ្ទាត់ព័ត៌មានទាំងនោះជាមុនៗនឹងចែកចាយព័ត៌មាន ពេលនោះយើងម្នាក់ៗនឹងអាចរួមចំណែកដល់ការកាត់បន្ថយព័ត៌មានក្លែងក្លាយ ព័ត៌មានបែបបំពុល ចេញពីក្នុងលំហព័ត៌មានរបស់យើងបានជាមិនខាន»។
លោក ទេព អស្នារិទ្ធ អ្នកនាំពាក្យក្រសួងព័ត៌មាន។ រូបថត សហការី
ដើម្បីទប់ស្កាត់ព័ត៌មានក្លែងក្លាយ លោកស្នើឲ្យពលរដ្ឋម្នាក់ៗ បោះបង់ចោលទម្លាប់ចែកចាយព័ត៌មានលឿនពេក ឬចែកចាយដោយមិនទាន់បានអាន និងផ្ទៀងផ្ទាត់ព័ត៌មាននោះ និង កុំទាន់ជឿលើប្រភពព័ត៌មានពីបណ្តាញទំនាក់ទំនងសង្គមទាំងស្រុងតែមួយមុខ។ នៅពេលឃើញព័ត៌មានចម្លែក លោកស្នើឲ្យមានទម្លាប់ផ្ទៀងផ្ទាត់ជាមួយប្រភពព័ត៌មានផ្សេងទៀតដូចជាប្រព័ន្ធផ្សព្វផ្សាយប្រពៃណីមានកាសែត ទូរទស្សន៍ វិទ្យុ គេហទំព័រព័ត៌មាន និងប្រភពផ្សព្វផ្សាយព័ត៌មានអាជីពដែលមានក្រមសីលធម៌វិជ្ជាជីវៈ។
លោកស្នើថាឲ្យពលរដ្ឋ «ចែករំលែក ឬផ្សព្វផ្សាយតែព័ត៌មានពិត វិជ្ជមាន ដើម្បីរួមចំណែកថែរក្សាសុវត្ថិភាព សណ្ដាប់ធ្នាប់ និងសន្តិសុខក្នុងសង្គមរស់នៅប្រចាំថ្ងៃសម្រាប់ជាប្រយោជន៍គ្រួសារ អ្នកនៅជុំវិញខ្លួនយើង និងខ្លួនឯងផ្ទាល់»។
លោក ណុប វី ប្រធានសមាគមសម្ព័ន្ធអ្នកសារព័ត៌មានកម្ពុជា បានថ្លែងថា ដើម្បីទប់ស្កាត់ព័ត៌មានក្លែងក្លាយ ជាដំបូង ចាំបាច់ត្រូវមានការកំណត់ថា អ្វីជាព័ត៌មានក្លែងក្លាយ ហើយព័ត៌មានក្លែងក្លាយគួរតែត្រូវបានវែកញែកឲ្យដាច់ពីការរិះគន់ទៅលើភាពអសកម្មរបស់រាជរដ្ឋាភិបាល។
លោកថា៖ «ដូច្នេះហើយត្រូវមានតម្លាភាពក្នុងការកំណត់ថាអ្វីជាព័ត៌មានក្លែងក្លាយ។ ហើយមួយទៀត ការចាត់វិធានការទៅលើព័ត៌មានក្លែងក្លាយជាវិធានការមួយហើយ ប៉ុន្តែ អ្វីដែលសំខាន់គឺដោះស្រាយនូវឫសគល់នៃព័ត៌មានក្លែងក្លាយនោះ គឺការឆ្លើយតបតាមរយៈការពន្យល់ ការផ្សព្វផ្សាយដល់ប្រជាពលរដ្ឋឲ្យបានយល់ថាអ្វីជាព័ត៌មានក្លែងក្លាយ អ្វីជាព័ត៌មានពិតដែលពលរដ្ឋគួរចែករំលែក និងរបៀបកំណត់ព័ត៌មានក្លែងក្លាយ»។
លោកបន្តថា៖ «ខ្ញុំយល់ឃើញថា កិច្ចសហប្រតិបត្តិការ និងការជំរុញលើកកម្ពស់ការចូលរួមដើម្បីផ្សព្វផ្សាយ អប់រំ ដែលមានការចូលរួមពីស្ថាប័នមិនមែនរដ្ឋាភិបាលផ្សេងទៀត គឺមានភាពចាំបាច់។ លើសពីនេះទៀតគឺការធានាថា សេរីភាពជាមូលដ្ឋានរបស់ប្រជាពលរដ្ឋមិនត្រូវបានប៉ះពាល់ពីការទប់ស្កាត់ព័ត៌មានក្លែងក្លាយទាំងនោះ»៕
