អាកាសយានដ្ឋានអន្តរជាតិតារាសាគរ ក្នុងខេត្តកោះកុង កាលពីថ្ងៃទី២៩ ខែកញ្ញា។ រូបថត SSCA
អាកាសយានដ្ឋានអន្តរជាតិតារាសាគរ ក្នុងខេត្តកោះកុង នឹងបើកដំណើរការហោះហើរសម្រាប់យន្តហោះខ្នាតតូចក្នុងស្រុក នៅចុងខែវិច្ឆិកាខាងមុខនេះ បន្ទាប់ពីបានសាងសង់រួចរាល់ ១០០ភាគរយ និងឆ្លងកាត់ការហោះហើយសាកល្បងដោយជោគជ័យនៅថ្ងៃទី២៩ និង៣០ ខែកញ្ញានេះ។
រដ្ឋលេខាធិការដ្ឋានអាកាសចរស៊ីវិលបានឲ្យដឹងថា អាកាសយានដ្ឋានអន្តរជាតិតារាសាគរ បានធ្វើការហោះហើរសាកល្បងនៅថ្ងៃទី២៩ និងថ្ងៃទី៣០ ដោយមានការចូលរួមពីលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងតំណាងក្រុមហ៊ុនវិនិយោគអាកាសយានដ្ឋានអន្តរជាតិតារាសាគរ Union Development Group ( Costal Airport Investment Co. Ltd)។
ការហោះហើរសាកល្បងនេះបានធ្វើឡើងដើម្បីឆែកឧបករណ៍បច្ចេកទេសនាំផ្លូវអាកាស វិទ្យុទាក់ទងជាមួយអាកាសយាននិក និងកង្វះខាតនានាដែលត្រូវដោះស្រាយបន្ថែមទៀត។
លោក ស៊ីន ចាន់សិរីវុត្ថា រដ្ឋលេខាធិការនិងជាអ្នកនាំពាក្យអាកាសចរស៊ីវិល បានប្រាប់ភ្នំពេញប៉ុស្តិ៍នៅថ្ងៃនេះថា៖ «បើគ្មានអ្វីប្រែប្រួលទេនោះ ការបើកឲ្យប្រតិបត្តការសម្រាប់ការហោះហើរយន្តហោះប្រភេទស្រាលខ្នាតតូចក្នុងស្រុក និងការហោះហើរហ្វឹកហ្វឺន នៅអាកាសយានដ្ឋានអន្តរជាតិតារាសាគរ អាចនឹងធ្វើឡើងនៅចុងខែវិច្ឆិកាខាងមុខនេះ»។
អាកាសយានដ្ឋានអន្តរជាតិតារាសាគរ មានទីតាំងក្នុងស្រុកបុទមសាគរ ខេត្តកោះកុង ដែលវិនិយោគដោយក្រុមហ៊ុនចិន Union Development Group និងគ្រប់គ្រងដោយក្រុមហ៊ុន Costal Airport Investment Co. Ltd ក្នុងទំហំទឹកប្រាក់២០០លានដុល្លារ ក្នុងដំណាក់កាលទី១។ ការវិនិយោគនេះ គាំទ្រដល់ពហុបំណងវិស័យទេសចរណ៍។ នេះបើតាមរដ្ឋលេខាធិការដ្ឋានអាកាសចរស៊ីវិល។
ព្រលានយន្តហោះនេះសាងសង់លើផ្ទៃដី ២១៨ហិចតា និងបានត្រៀមដីបម្រុងទុកជិត ១០០០ហិចតាសម្រាប់អភិវឌ្ឍនគម្រោងគាំទ្រផ្សេងៗ។
បើតាមរដ្ឋលេខាធិការដ្ឋានអាកាសចរស៊ីវិល ផែនការដំបូងនៃការបើកដំណើរការអាកាសយានដ្ឋាននេះ គ្រោងធ្វើឡើងនៅឆ្នាំ២០២២ ប៉ុន្តែត្រូវបានពន្យារដោយសារតែវិបត្តិផ្សេងៗ រួមមានទំាំងកូវីដ១៩ផង ដែលធ្វើឲ្យតម្រូវការធ្លាក់ចុះ។ ហេតុដូច្នេះហើយ បានជាការបើកដំណើរការនាពេលនេះ ដំបូងគឺសម្រាប់យន្តហោះខ្នាតតូចក្នុងស្រុក រីឯការហោះហើរជាអន្តរជាតិនឹងបើកដំណើរការនៅពេលណាមានតម្រូវការ «មិនមានអ្វីជាឧបសគ្គទៀតទេ»៕
