បុរសម្នាក់កំពុងបាញ់ថ្នាំកម្ចាត់មូសនៅក្នុងរាជធានីភ្នំពេញ កាលពីថ្ងៃទី១២ ខែមករា ឆ្នាំ២០២៥។ មន្ទីរសុខាភិបាលរាជធានីភ្នំពេញ
កិច្ចប្រឹងប្រែងទប់ស្កាត់បែបបុរេសកម្មរបស់អាជ្ញាធរពាក់ព័ន្ធបានធ្វើឲ្យករណីជំងឺគ្រុនឈាមដែលត្រូវបានប៉ាន់ប្រមាណពីដំបូងថានឹងអាចមានរហូតដល់ ៧៥០០០ករណី បានធ្លាក់ចុះមកនៅជិត ១៩០០០ករណីប៉ុណ្ណោះនៅឆ្នាំ២០២៤។ ប៉ុន្តែមានអ្នកស្លាប់ ៤៦នាក់។
យោងតាមការព្យាកររបស់ក្រសួងសុខាភិបាល ករណីជំងឺគ្រុនឈាមនៅឆ្នាំ២០២៤ អាចកើតឡើងក្នុងចំនួនប្រមាណ ៧ម៉ឺន៥ពាន់ករណីផ្អែកលើវដ្ដនៃការផ្ទុះឡើងនៃជំងឺគ្រុនឈាម ដែលកើតឡើងរៀងរាល់៥ឆ្នាំម្ដង។ ប៉ុន្តែករណីជាក់ស្ដែងបានធ្លាក់ចុះចំនួនជាង ៥ម៉ឺន៦ពាន់ករណីមកនៅត្រឹមតែ១៨ ៩៨៧ នាក់ប៉ុណ្ណោះ គឺធ្លាក់ចុះជិត ៤ ដង។ នេះបើតាមនាយកដ្ឋានប្រយុទ្ធនឹងជំងឺឆ្លង (CDC)។
កាលពីឆ្នាំ២០២៣ អ្នកជំងឺគ្រុនឈាមមានចំនួន ៣៥ ៣៩០ នាក់ និងចំនួនអ្នកស្លាប់ចំនួន ៩៩នាក់ ខណៈដែលឆ្នាំ២០២៤កន្លងទៅ ករណីជំងឺគ្រុនឈាមបានធ្លាក់ចុះ ១៦៤០៣ករណី មកនៅត្រឹម ១៨៩៨៧នាក់ គិតជាភាគរយនៃការធ្លាក់ចុះស្មើនឹង ៤៦ភាគរយ រីឯចំនួនអ្នកស្លាប់បានថយមកនៅ ៤៦នាក់ ធ្លាក់ចុះ ៥៦ ភាគរយ។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង បានចាត់ទុកការធ្លាក់ចុះនេះជាលទ្ធផលល្អប្រសើរមួយក្នុងការទប់ស្កាត់ជំងឺគ្រុនឈាមនៅឆ្នាំ២០២៤។
លោកប្រាប់ភ្នំពេញប៉ុស្តិ៍ថា៖ «ការធ្វើបុរេសកម្មក្នុងការទប់ស្កាត់ការរីករាលដាលការចម្លងជំងឺគ្រុនឈាម ជាបទពិសោធន៍ចម្បងដែលចូលរួមចំណែកធ្វើឱ្យទទួលបានជោគជ័យដ៏ធំ ក្នុងការកាត់បន្ថយបន្ទុកជំងឺគ្រុនឈាមក្នុងឆ្នាំ២០២៤ នេះ ក្រោមការដឹកនាំរបស់សម្តេចធិបតីនាយករដ្ឋមន្ត្រី នាដើមអាណត្តិទី៧នេះ»។
លោកបន្តថា៖ «យ៉ាងណាក៏ដោយ ឆ្នាំទៅមុខៗទៀតយើងត្រូវតែប្រុងប្រយ័ត្នជានិច្ច ដោយត្រូវនាំគ្នាបំបាត់នូវជម្រកដង្កូវទឹក ឬ មូស ដូចជាបំផ្លាញសំបកដូង កង់ឡានចាស់ៗ សំបកកំប៉ុង និងសម្អាតអនាម័យជុំវិញផ្ទះ ដូចជាបើកបង្អួចឲ្យផ្ទះនីមួយៗមានពន្លឺចូលគ្រប់គ្រាន់។ យើងបន្តរួមគ្នាធ្វើនៅឆ្នាំក្រោយៗទៀត»។
ជំងឺគ្រុនឈាមតែងផ្ទុះឡើងរៀងរាល់៥ឆ្នាំម្ដង។ នៅកម្ពុជា ជំងឺនេះផ្ទុះឡើងនៅឆ្នាំ២០០៧ ដែលមានចំនួន ៣៩៦១៨ករណី និងមានអ្នកស្លាប់៣៩៦នាក់។ ជំងឺនេះផ្ទុះឡើងម្ដងទៀតនៅឆ្នាំ២០១២ ដែលមានចំនួន៤២៣៦២ករណី និងមានអ្នកស្លាប់ ១៨៩នាក់។ នៅឆ្នាំ ២០១៩ ជំងឺគ្រុនឈាមបានផ្ទុះខ្លាំងរហូតដល់ជិត ៧ម៉ឺនករណី និងចំនួនអ្នកស្លាប់មានចំនួន ៤៨នាក់។
លោក លី សូវ៉ាន់បញ្ជាក់ថា៖ «យើងរំពឹងថា ឆ្នាំ២០២៤ នឹងមានការផ្ទុះជំងឺគ្រុនឈាមច្រើនរហូតដល់ ៧ម៉ឺន ប៉ុន្តែ ដោយសារការទប់ស្កាត់របស់ក្រសួងសុខាភិបាល អាជ្ញាធរប្រយុទ្ធនឹងជំងឺឆ្លង ប្រជាពលរដ្ឋនិងអាជ្ញាធរ ធ្វើឲ្យកាត់បន្ថយបានច្រើន»។
លោកសង្ឃឹមថា នៅឆ្នាំក្រោយៗទៀត នឹងករណីគ្រុនឈាមនឹងបន្តធ្លាក់ចុះ តាមរយៈការចូលរួមពីប្រជាពលរដ្ឋ ក្នុងការបំផ្លាញជម្រកដង្កូវទឹកដែលវិវត្តទៅជាមូសខ្លាបង្កជំងឺគ្រុនឈាម៕
