ភ្នំពេញ៖ ក្នុងរយៈពេល ១ឆ្នាំនៃយុទ្ធនាការជំរុញ និងពន្លឿនការដោះស្រាយរឿងក្ដីនៅតាមតុលាការ តុលាការកម្ពុជា ទទួលសំណុំរឿង ២២៩២៧២ ទាំងសំណុំរឿងចាស់ ថ្មី ព្រហ្មទណ្ឌ និងរដ្ឋប្បវេណី។ នេះបើយោងតាមអ្នកនាំពាក្យក្រសួងយុត្ដិធម៌។
លោក កេង សុម៉ារិទ្ធ រដ្ឋលេខាធិការក្រសួងយុត្តិធម៌ និង ជាអនុប្រធានប្រចាំការគណៈបញ្ជាការដឹកនាំយុទ្ធនាការ បានថ្លែងក្នុងសន្នសីទសារព័ត៌មានថ្ងៃទី១៣ ខែមករានេះថា៖ «ក្នុងចំណោមសំណុំរឿងទាំងអស់នោះ តុលាការគ្រប់ជាន់ថ្នាក់បានចាត់ការបានចំនួន ១៨៨៩៤២ ករណី រួមមាន សំណុំរឿងចាស់ ថ្មី ព្រហ្មទណ្ឌ និងរដ្ឋប្បវេណី ស្មើនឹង ៨២,៤១ភាគរយ»។
លោកបានអះអាងថា វាជាអត្រាខ្ពស់បំផុតចំពោះការដោះស្រាយរបស់តុលាការគ្រប់ជាន់ថ្នាក់ ដោយនៅសល់តែ ១៧,៥៩ភាគរយប៉ុណ្ណោះ។
លោក សុម៉ារិទ្ធ បានបន្ដថា ចំណោមសំណុំរឿងដោះស្រាយរួចទាំង ១៨៨៩៤២ ករណី មាន ១១៧១២ ករណី ស្មើរនឹង ៨៤,១៤ភាគរយជាសំណុំរឿងព្រហ្មទណ្ឌ និងរដ្ឋប្បវេណី ៨៧២៣០ករណី ស្មើនឹង ៨០,៤៣ភាគរយ។
លោក ជិន ម៉ាលីន រដ្ឋលេខាធិការក្រសួងយុត្ដិធម៌ ដែលដឹកនាំសន្និសីទសារព័ត៌មាននេះបានថ្លែងថា យុទ្ធនាការពន្លឿនដោះស្រាយនឹងត្រូវបញ្ចប់តាមផែនការដោយចំណាយពេលវេលា ២ឆ្នាំកន្លះ ដែលនៅសល់ពេលវេលា ១ឆ្នាំកន្លះទៀត៕
