ការហ្វឹកហាត់នៅក្នុងព្រឹត្តិការណ៍សមយុទ្ធយោធា «ឆ្មាំអង្គរ» កាលពីខែមីនា ឆ្នាំ២០១៦។ USARPAC PAO
ការពិភាក្សាអំពីការចាប់ផ្ដើមសមយុទ្ធយោធា «ឆ្មាំអង្គរ» (Angkor Sanitel) ឡើងវិញរវាងសហរដ្ឋអាមេរិក និងកម្ពុជា អាចនឹងត្រូវធ្វើឡើងនៅខែកុម្ភៈខាងមុខនេះ ក្នុងអំឡុងដំណើរទស្សនកិច្ចរបស់ មេបញ្ជាការកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក មកកាន់កម្ពុជា។
ការលើកឡើងបែបនេះធ្វើឡើងដោយវរសេនីយ៍ទោ ខាល សលមែន (Kyle Saltzman) ប្រធានការិយាល័យអនុព័ន្ធយោធាសហរដ្ឋអាមេរិកថ្មីប្រចាំកម្ពុជា ក្នុងជំនួបជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅព្រឹកថ្ងៃទី១៣ ខែមករា នេះ។
ក្នុងជំនួបនេះ លោក វង្ស ពិសេន បានស្នើដល់ភាគីសហរដ្ឋអាមេរិក បន្តកិច្ចសហប្រតិបត្តិការឲ្យកាន់តែទូលំទូលាយ ដើម្បីជាប្រយោជន៍កងទ័ពប្រទេសទាំងពីរ តាមរយៈការបណ្តុះបណ្តាល ការផ្លាស់ប្តូរទស្សនកិច្ចគ្រប់កម្រិត ការផ្លាស់ប្តូរព័ត៌មាន ការទប់ស្កាត់អំពើភេរវកម្ម ឧក្រិដ្ឋកម្មឆ្លងដែន ការបន្តរុករកអដ្ឋិធាតុជនជាតិអាមេរិក និងការពិនិត្យលទ្ធភាពធ្វើលំហាត់ហ្វឹកហ្វឺនរួមឡើងវិញជាដើម។
លោក សលមែន កោតសរសេរទំនាក់ទំនងនៃប្រទេសទាំងពីរ និងថ្លែងអំណរគុណដល់កម្ពុជាចំពោះខិតខំប្រឹងប្រែងបន្តរុករកអដ្ឋិធាតុជនជាតិអាមេរិកបាត់ខ្លួននៅកម្ពុជា។ លោកក៏បានបង្ហើបអំពីការពង្រីកកិច្ចចរចាលើការធ្វើសមយុទ្ធរួមឈ្មោះថា សមយុទ្ធយោធា «ឆ្មាំអង្គរ»។
គេហទំព័ររបស់អគ្គបញ្ជាការដ្ឋានកងយោធពលខេមរភូមិន្ទបានសរសេរថា៖ «លោក វរសេនីយ៍ទោ បានគូសបញ្ជាក់ថា នៅខែកុម្ភៈខាងមុខនេះ មេបញ្ជាការកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក នឹងមកបំពេញទស្សនកិច្ចនៅកម្ពុជា ហើយតាមរយៈទស្សនកិច្ចនេះ លោកមេបញ្ជាការឥណ្ឌូប៉ាស៊ីហ្វិក នឹងពិភាក្សាពីកិច្ចសហប្រតិបត្តិការទៅថ្ងៃខាងមុខ ក៏ដូចជាឱកាសនៃការចាប់ផ្ដើមឡើងវិញនូវលំហាត់ឆ្មាំអង្គរផងដែរ»។
លោក Steve Koehler (Stephen T. "Web" Koehler) គឺជាមេបញ្ជាការកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក។ លោកបានកាន់តំណែងជាមេបញ្ជាការកងទ័ពជើងទឹកសហរដ្ឋអាមេរិកនៅតំបន់នេះចាប់ពីខែមេសា ឆ្នាំ២០២៤។
សមយុទ្ធយោធា «ឆ្មាំអង្គរ» ត្រូវបានធ្វើឡើងលើកចុងក្រោយនៅឆ្នាំ២០១៦ បន្ទាប់មកក៏ត្រូវបានផ្អាករហូតមកទល់ពេលបច្ចុប្បន្ន។
លោក Kyle Saltzman ប្រធានការិយាល័យអនុព័ន្ធយោធាសហរដ្ឋអាមេរិកថ្មីប្រចាំកម្ពុជា ជួបជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅព្រឹកថ្ងៃទី១៣ ខែមករា។ ខ.ភ.ម.
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងថា ការលើកឡើងពីការវិលត្រឡប់នៃសមយុទ្ធយោធា«ឆ្នាំអង្គរ»នេះជាសញ្ញាវិជ្ជមាន នៃទំនងទំនាក់រវាងប្រទេសទាំងពីរ ដែលជាទូទៅរាំងខ្ទប់ដោយការមិនយល់គ្នារឿងប្រជាធិបតេយ្យ និងទំនាក់ទំនងជិតស្និទ្ធរវាងកម្ពុជានិងចិន។
លោកថ្លែងថា៖ «មានចំណុចជាច្រើនដែលភាគីសហរដ្ឋអាមេរិកនិងកម្ពុជាអាចធ្វើការជាមួយគ្នាបាន ប៉ុន្តែ មានចំណុចមួយចំនួនដែលត្រូវតែស្វែងយល់ពីគ្នាទៅវិញទៅមក ជាពិសេសដំណើរការប្រជាធិបតេយ្យ សិទ្ធិមនុស្ស លំហនយោបាយ និងនីតិរដ្ឋ។ បញ្ហាទាំងនេះ សហរដ្ឋអាមេរិកមិនទាន់ផ្ដល់ភាពយុត្តិធម៌ដល់កម្ពុជា ហើយរដ្ឋាភិបាលកម្ពុជាយល់ថា ការលើកឡើងរបស់សហរដ្ឋអាមេរិកលើបញ្ហាទាំងនេះគឺជាការជ្រៀតជ្រែកលើកិច្ចការផ្ទៃក្នុងកម្ពុជា»។
លោកបន្តថា ទំនាក់ទំនងស្អិតល្មួតរបស់កម្ពុជាជាមួយចិន ក៏ត្រូវបានសហរដ្ឋអាមេរិកមើលឃើញថា កម្ពុជាស្ថិតក្រោមឥទ្ធិពលរបស់ចិនផងដែរ។
សម្រាប់ការវិលត្រឡប់នៃលំហាត់យោធារួមគ្ន «ឆ្មាំអង្គរ» លោក គិន ភា យល់ថា វាជារឿងល្អ ក្នុងកម្រិតផ្លាស់ប្ដូរបទពិសោធន៍ក្នុងកិច្ចការសង្គ្រោះក្នុងគ្រោះមហន្តរាយធម្មជាតិ វិស័យការពារជាត។លោកថា កម្ពុជាត្រូវធ្វើពិពិធកម្មការទទូតរបស់ខ្លួនជាមួយប្រទេសទាំងអស់ ដោយឈរលើគោលការណ៍គោរពអធិបតេយ្យ ឯករាជ្យ បូរណភាពទឹកដី និងការមិនជ្រៀតជ្រែកកិច្ចការផ្ទៃក្នុងគ្នាទៅវិញទៅមក»៕
