ភ្ញៀវទេសចរឥណ្ឌាបួងសួងនៅពេលទស្សនាក្បាលស្បាន នៅខេត្តសៀមរាប នៅខែមករា ឆ្នាំ២០២២៥។ ហ្វេសប៊ុក ញឹម ស៊ីដេត
ខុសពីភ្ញៀវទេសចរមកពីប្រទេស ឬ តំបន់ផ្សេងៗ ភ្ញៀវទេសចរមកពីឥណ្ឌាជាច្រើនទស្សនាប្រាង្គប្រាសាទនានានៅកម្ពុជាដោយភ្ជាប់ជាមួយនឹងការប្រតិបត្តិសាសនាសាសនាហិណ្ឌូ ឬ ព្រហ្មញ្ញសាសនា ដែលជាសាសនាមានប្រភពមកពីប្រទេសឥណ្ឌា។
ប្រាសាទបុរាណខ្មែរជាច្រើនត្រូវបានកសាងឡើងដើម្បីឧទ្ទិសដល់ព្រហ្មញ្ញសាសនា ឬមានទំនាក់ទំនងជាមួយសាសនាហិណ្ឌូ ខណៈដែលប្រាសាទខ្លះមានទំនាក់ទំនងជាមួយសាសនាព្រះពុទ្ធ ដែលសាសនាទាំងពីរនេះសុទ្ធតែមានប្រភពមកពីប្រទេសឥណ្ឌា។ កត្តាទំនាក់ទំនងផ្នែកសាសនានេះហើយដែលធ្វើឲ្យទេសចរឥណ្ឌាមកទស្សនាកម្ពុជា ចាប់អារម្មណ៍និងបង្ហាញក្ដីគោរពជាខ្លាំងដល់ចម្លាក់ និងវត្ថុទេវរាជនានា។
លោក ញឹម ស៊ីដេត គឺជាមគ្គុទ្ទេសក៍ទេសចរណ៍នៅខេត្តសៀមរាប ដែលបាននាំភ្ញៀវឥណ្ឌាជាច្រើនក្រុមទស្សនាប្រាសាទនានានៅខេត្តនេះ។ លោករៀបរាប់ថា ភ្ញៀវទេសចរឥណ្ឌាមានចំណាប់អារម្មណ៍យ៉ាងខ្លាំងទៅលើប្រវត្តិនៃប្រាសាទដែលទាក់ទិននិងសាសនហិណ្ឌូ ព្រះសិវៈ និងវប្បធម៌ប្រពៃណីដែលស្រដៀងគ្នា ដូចជា ប្រាសាទអង្គរវត្ត ភ្នំគូលែន និងក្បាលស្ពាន ជាដើម។
លោកថ្លែងថា៖ «ដោយសារតែគាត់ក៏កាន់សាសនាហិណ្ឌូដែរ គាត់យល់ច្បាស់ពីសាសនានេះ ដូចជារឿងព្រេង និងចម្លាក់នានា ដែលឆ្លាក់ឡើងនៅតាមហោរជាង តាមរោងទោងនៅប្រាសាទអង្គរវត្តជាដើម ដែលសុទ្ធសឹងតែទាក់ទងនឹងទេវកថារបស់ឥណ្ឌា។ ប្រាសាទនៅកម្ពុជាយើងមានទំនាក់ទំនងនឹងព្រហ្មញ្ញសាសនា ក៏ដូជាពុទ្ធសាសនា ហើយនៅឥណ្ឌា វប្បធម៌ ប្រពៃណីរបស់គេក៏ស្រដៀងយើងដែរ»។
លោកបន្តថា៖ «គម្ពីរពាក់ព័ន្ធនឹងព្រហ្មញ្ញសាសនា យើងបាត់បង់ច្រើន នៅតែខាងព្រះពុទ្ធសាសនា។ សម្រាប់ភ្ញៀវទេសចរឥណ្ឌាដែលខ្ញុំបានជូនផ្ទាល់ ខ្ញុំសង្កេតឃើញថា គាត់នៅចាំ គាត់នៅមានក្បួនខ្នាត គម្ពីរនមស្សការព្រះសិវៈ នមស្សការព្រះវិស្ណុ ជាដើម។ ដូចនៅក្បាលស្ពានជាដើម គាត់គោរពយ៉ាងខ្ជាប់ខ្ជួន។ ពេលគាត់ទៅដល់ គាត់មិនមែនត្រឹមតែទស្សនាទេ គឺគាត់មកថ្វាយបង្គំ គោរពបូជា សូត្រធម៌ គឺមិនមែនគ្រាន់តែមកទស្សនាធម្មតាៗនោះទេ»។
បើតាមលោក ស៊ីដេត ភ្ញៀវទេសចរឥណ្ឌានៅឆ្នាំ ២០២៤ មានចំនួនកើនឡើងប្រៀបនឹងឆ្នាំ២០២៣ ហើយនៅឆ្នាំ ២០២៥ លោករំពឹងថានឹងមានចំនួនច្រើនជាងនៅឆ្នាំ២០២៤ ដោយសារតែមានជើងហោះហើរត្រង់កាន់តែច្រើនរវាងកម្ពុជានិងឥណ្ឌា។
កម្ពុជា និង ឥណ្ឌា បានបង្កើតរៀបចំឆ្នាំទស្សនាកម្ពុជា-ឥណ្ឌា លើកដំបូងនៅឆ្នាំ២០២៤ ដើម្បីជំរុញការទស្សនាប្រទេសទាំងពីរ។ បច្ចុប្បន្ននេះ ប្រទេសទាំងពីរមានជើងហោះហើរត្រង់រវាងទីក្រុងភ្នំពេញនិងទីក្រុងញូវដែលី ដែលដំណើរការដោយក្រុមហ៊ុន Air Cambodia ដែលបើកប្រតិបត្តិការកាលពីខែមិថុនា ឆ្នាំ២០២៤។
នៅខែកុម្ភៈឆ្នាំ២០២៥នេះ ជើងហោះហើរត្រង់ថ្មីនឹងត្រូវបានបន្ថែមរវាងទីក្រុងញូវដែលី និង ភ្នំពេញ និងរវាងទីក្រុង កុលកាតា (Kolkata) និងខេត្តសៀមរាប។
ស្ត្រីទេសចរឥណ្ឌា កំពុងសូត្របួងសួងនៅក្បាលស្ពាន ក្នុងខេត្តសៀមរាប នៅខែមករា ឆ្នាំ២០២៥។ ហ្វេសប៊ុក ញឹម ស៊ីដេត
ទិន្នន័យរបស់ក្រសួងទេសចរណ៍ដែលទើបចេញផ្សាយ បានបង្ហាញថា ក្នុងរយៈពេល១១ខែនៃឆ្នាំ ២០២៤ ភ្ញៀវបរទេសដែលចូលមកប្រទេសកម្ពុជា មានចំនួនសរុប ៦ លាននាក់ កើនឡើង ២២ ភាគរយបើធៀបនឹងរយៈពេលដូចគ្នាឆ្នាំ ២០២៣ ដែលមាន ៤, ៩២ លាននាក់។
ក្នុងចំនួនខាងលើ ភ្ញៀវមកពីប្រទេសឥណ្ឌា មានចំនួនសរុប ៦៩ ០៦៣នាក់ កើនឡើង ១៣,២ ភាគរយធៀបនឹងរយៈពេលដូចគ្នាក្នុងឆ្នាំ២០២៣។ យ៉ាងណាក៏ដោយ ភ្ញៀវទេសចរឥណ្ឌាមិនទាន់ឡើងដល់កម្រិតជាប់ចំណាត់ថ្នាក់កំពូលទាំង១០នោះទេ។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរ បានថ្លែងថា តាមបទពិសោធន៍ជាក់ស្ដែង ដែលលោកធ្លាប់បាន លោកសង្កេតឃើញថា ភ្ញៀវទេសចរឥណ្ឌាហាក់មានមោទនាភាពចំពោះវប្បធម៌ និងសាសនាពីឥណ្ឌាដែលកំពុងមានវត្តមាននៅអាស៊ីអាគ្នេយ៍ ជាពិសេសនៅកម្ពុជា។
លោកថ្លែងថា៖ «ពួកគាត់មានមោទនភាពដោយសារតែខ្មែរយើងមានទំនាក់ទំនងជាមួយឥណ្ឌាតាំងពីបុរាណកាលមក ហើយចំនួនទេសចរឥណ្ឌាមកចេះតែច្រើនឡើងៗ។ គាត់គោរពណាស់នៅពេលឃើញចម្លាក់ព្រះវិស្ណុ ចម្លាក់សិវលិង្គ គាត់គោរពឱនលំទោន និងថ្វាយបង្គំ និងប្រោះទឹកមន្ត និងខ្លាចបុណ្យបាប»។
យ៉ាងណាក៏ដោយ លោកក្រើនរំឭកថា ការធ្វើបដិសណ្ឋារកិច្ចសម្រាប់ភ្ញៀវទេសចរឥណ្ឌាត្រូវការភាពអត់ធ្មត់ខ្ពស់ គឺត្រូវមានចិត្តធ្ងន់ ពីព្រោះភ្ញៀវទេសចរឥណ្ឌាជាទូទៅទាមទារសេវាកម្មខ្ពស់ ដូចជាម៉ាស៊ីនត្រជាក់ខ្លាំង និងមិនសូវគោរពពេលវេលា៕
