លោករដ្ឋមន្ដ្រី សុខ សូកេន និងមន្ដ្រីក្រសួងអធិការកិច្ច អំឡុងពេលគោរពព្រះវិញ្ញាណក្ខន្ធ ព្រះបរមរតនកោដ្ឋ។ រូបថត ក្រសួងអធិការកិច្ច
ភ្នំពេញ៖ រាជរដ្ឋាភិបាលកម្ពុជាបានចេញអនុក្រឹត្យថ្មីស្តីពី «ការរៀបចំ និងការប្រព្រឹត្តទៅរបស់ក្រសួងអធិការកិច្ច» ដោយផ្ដោតសំខាន់លើតួនាទី និងការទទួលខុសត្រូវដើម្បីធានាអភិបាលកិច្ច តម្លាភាព និងគណនេយ្យភាព តាមរយៈការធ្វើអធិការកិច្ចប្រកបដោយប្រសិទ្ធភាព ការដោះស្រាយបណ្តឹង និងការអនុវត្តច្បាប់នៅទូទាំងគ្រឹះស្ថានរដ្ឋបាលសាធារណៈ។
ក្រសួងអធិការកិច្ចត្រូវបានកំណត់ក្នុងអនុក្រឹត្យថ្មីជាមួយមុខងារ និងភារកិច្ចជាច្រើន រួមទាំងការរៀបចំ និងអនុវត្តគោលនយោបាយ ផែនការយុទ្ធសាស្ត្រ លិខិតបទដ្ឋានគតិយុត្ត និងផែនការសកម្មភាព ដើម្បីអភិវឌ្ឍនិងគ្រប់គ្រងវិស័យអធិការកិច្ច។
យោងតាមអនុក្រឹត្យដែលចុះហត្ថលេខាពីនាយករដ្ឋមន្ដ្រីកាលពីថ្ងៃទី១៣ ខែមករា ឆ្នាំ២០២៥ បានបង្ហាញថា៖ «[ក្រសួង]ធ្វើអធិការកិច្ចលើការអនុវត្តមុខងារ ភារកិច្ច និងការផ្តល់សេវាសាធារណៈរបស់ក្រសួង ស្ថាប័ន អង្គភាព សាធារណៈប្រហាក់ប្រហែល គ្រឹះស្ថានសាធារណៈរដ្ឋបាល សហគ្រាសសាធារណៈ និងរដ្ឋបាលថ្នាក់ ក្រោមជាតិ ដើម្បីពង្រឹងអភិបាលកិច្ច លើកកម្ពស់ប្រសិទ្ធភាព និងភាពស្អាតស្អំក្នុងរដ្ឋបាលសាធារណៈ លើកលែងតែមានការកំណត់ដោយលិខិតបទដ្ឋានគតិយុត្តដោយឡែក»។
ក្រសួងមានភារកិច្ចធ្វើអធិការកិច្ចតាមកាលៈទេសៈ ដែលមានសញ្ញារំលោភបំពានច្បាប់ និងមានវិធានការបង្ការ ទប់ស្កាត់ ចំពោះមន្ត្រីសាធារណៈដែលប្រព្រឹត្តអំពើអសកម្មធ្វើឱ្យប៉ះពាល់ដល់ការផ្តល់សេវាសាធារណៈ ការអភិវឌ្ឍជាតិ និងអភិបាលកិច្ចល្អ។
មុខងាររបស់ក្រសួងក៏ផ្ដោតលើការដាក់លើកសំណើដោយផ្អែកលើលទ្ធផលក្នុងវិស័យអធិការកិច្ច ជូនរដ្ឋមន្ត្រីក្រសួង ប្រធានស្ថាប័ន អង្គភាព សាធារណៈប្រហាក់ប្រហែល គ្រឹះស្ថានសាធារណៈរដ្ឋបាល សហគ្រាសសាធារណៈ អភិបាលនៃ គណៈអភិបាលរាជធានី ខេត្ត ដើម្បីចាត់វិធានការកែលម្អ និង/ឬដាក់ទណ្ឌកម្មខាងវិន័យចំពោះមន្ត្រី ក្រោមឱវាទ ដែលបានប្រព្រឹត្តកំហុស។
អនុក្រឹត្យថ្មីនេះបានបន្ដថា៖ «ក្រសួងអធិការកិច្ចទទួលពិនិត្យ និងដោះស្រាយបណ្តឹងតវ៉ា និងបណ្តឹងបរិហារអំពីនីតិបុគ្គលនិងរូបវន្តបុគ្គលសាធារណៈ ក្នុងក្របខ័ណ្ឌដែនសមត្ថកិច្ចរបស់រាជរដ្ឋាភិបាលពីគ្រប់មជ្ឈដ្ឋានទាំងអស់ លើកលែងតែមានការ កំណត់ដោយលិខិតបទដ្ឋានគតិយុត្តដោយឡែក»។
ក្រសួងក៏ធ្វើការអង្កេតស្រាវជ្រាវ និងដោះស្រាយបណ្តឹងតាមបញ្ជារបស់ប្រមុខរាជរដ្ឋាភិបាល ក៏ដូចជាតាមដានការដោះស្រាយបណ្តឹងនិងតឿនទារលទ្ធផលនៃការដោះស្រាយបណ្ដឹងដែលបានបញ្ជូនឱ្យសមត្ថកិច្ចពាក់ព័ន្ធពិនិត្យ និងដោះស្រាយ។
អ្វីដែលសំខាន់ ក្រសួងអធិការកិច្ចអាចផ្សព្វផ្សាយជាសាធារណៈនូវលទ្ធផលនៃការធ្វើអធិការកិច្ច តាមដានការអនុវត្តច្បាប់ និងដោះស្រាយ បណ្ដឹងដែលរាជរដ្ឋាភិបាលបានសម្រេចរួចហើយ។
ទន្ទឹមនឹងនេះ លោករដ្ឋមន្ដ្រីអធិការកិច្ច សុខ សូកេន បានដាក់ចេញនូវយុទ្ធសាស្ដ្រ ៨ ចំណុចក្នុងការចូលរួមអនុវត្តកំណែទម្រង់របស់រាជរដ្ឋាភិបាល។
លោក សូកេន បានឱ្យដឹងថា ក្រសួងផ្ដោតលើការពង្រឹងសមត្ថភាពស្ថាប័ន ការកសាង និងអភិវឌ្ឍន៍មូលធនមនុស្ស ការរៀបចំច្បាប់ និងលិខិតបទដ្ឋានគតិយុត្ត នៅក្នុងសមត្ថកិច្ចក្រសួងដែលរាជរដ្ឋាភិបាលប្រគល់ជូន ការពង្រឹងប្រសិទ្ធភាព នៃការតាមដានការអនុវត្តច្បាប់ និងអនុសាសន៍របស់ប្រមុខរាជរដ្ឋាភិបាល និងការង្រឹងសមត្ថភាពអធិការកិច្ចរបស់ស្ថាប័ន។
លោកបានឱ្យដឹងនៅក្នុងសេចក្ដីថ្លែងការណ៍ថា៖ «ក្រសួងអប់រំផ្សព្វផ្សាយច្បាប់ និងដោះស្រាយពាក្យបណ្ដឹង ជំរុញកិច្ចសហការ និងភាពដៃគូជាមួយស្ថាប័នរដ្ឋ ឯកជន និងដៃគូសំខាន់ៗនានា ក្នុងគោលបំណង ផ្លាស់ប្តូរព័ត៌មាន និងបទពិសោធន៍ ដើម្បីប្រសិទ្ធភាព នៃការអនុវត្តច្បាប់»។
ចំណុចសំខានចុងក្រោយ ក្រសួងប្រើប្រាស់បច្ចេកវិទ្យាឌីជីថល ដើម្បីពង្រឹងប្រសិទ្ធភាព នៃប្រតិបត្តិការអធិការកិច្ច និងការទទួលពាក្យបណ្ដឹង ក៏ដូចជាដោះស្រាយបណ្តឹង។
លោកបានបន្ដថា គេហទំព័រក្រសួងអធិការកិច្ច នឹងក្លាយជាយន្តូបករណ៍អេឡិចត្រូនិក ដែលបម្រើដល់សាធារណរជន ក្នុងការងារសិក្សាស្រាវជ្រាវ វេទិកាជូនដំណឹង ព័ត៌មាន ឆ្លើយតបនូវសំណូមពរ ការទទួលពាក្យបណ្តឹង និងមតិយោបល់របស់សាធារណជនទូទៅ រួមទាំងការអនុវត្តតួនាទីភារកិច្ចរបស់ក្រសួង សំដៅពង្រឹងប្រសិទ្ធភាពក្នុងវិស័យអធិការកិច្ចនៅកម្ពុជា។
លើសពីនេះ ក្រសួងចូលរួមរៀបចំវេទិកាសាធារណៈ កម្មវិធីអប់រំ និងផ្សព្វផ្សាយច្បាប់ គោលនយោបាយ និងលិខិតបទដ្ឋាន គតិយុត្តពាក់ព័ន្ធជូនប្រជាពលរដ្ឋ។
ចែងនៅក្នុងមាត្រទី ៣ ក្រសួងអធិការកិច្ច មានភារកិច្ចធ្វើអធិការកិច្ចនិងចូលរួមតាមដានការអនុវត្ត ច្បាប់លើគ្រប់វិស័យ ដោយផ្អែកលើអភិក្រមមួយចំនួន។
ក្រសួងតាមបណ្ដឹងតវ៉ា និងបណ្តឹងបរិហារពីនីតិបុគ្គល រូបវន្តបុគ្គល និងគ្រប់មជ្ឈដ្ឋាន ជាពិសេសភាពមិនប្រក្រតីលើរបាយការណ៍ស្តីពីលទ្ធផលអធិការកិច្ចរបស់អង្គភាពអធិការកិច្ចតាមក្រសួង ស្ថាប័ន ក៏ដូចជាតាមដានរាល់វិធានការដែលអធិការកិច្ចបានដាក់ចេញដល់ស្ថាប័នរងអធិការកិច្ច។
អង្គភាពថ្នាក់ជាតិរបស់ក្រសួង រួមមាន ខុទ្ទកាល័យរដ្ឋមន្ត្រី អគ្គនាយកដ្ឋានរដ្ឋបាលនិងហិរញ្ញវត្ថុ អគ្គនាយកដ្ឋានអធិការកិច្ច អគ្គនាយកដ្ឋានដោះស្រាយបណ្តឹង វិទ្យាស្ថានជាតិអធិការកិច្ច នាយកដ្ឋានសវនកម្មផ្ទៃក្នុង ខណៈអង្គភាពថ្នាក់ក្រោមជាតិ មានមន្ទីរអធិការកិច្ចរាជធានី និងខេត្ត។
យោងតាមមាត្រា ៣៣ នៃអន្តរប្បញ្ញត្តិ បានឱ្យដឹងថា លិខិតបទដ្ឋានគតិយុត្តពាក់ព័ន្ធនឹងការបង្កើត ការរៀបចំ និងការប្រព្រឹត្តទៅនៃអង្គភាពក្រោមឱវាទ ក្រសួង និងការតែងតាំងមន្ត្រីរាជការនៃក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ត្រូវបន្តមានសុពលភាពអនុវត្តរហូតដល់មានលិខិតបទដ្ឋានគតិយុត្តថ្មីមកជំនួស ស្របតាមបទប្បញ្ញត្តិនៃអនុក្រឹត្យនេះ។
អនុក្រឹត្យ បានបន្ដថា៖ «មន្ត្រីរាជការស៊ីវិលនៃក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ច ដែលត្រូវបានប៉ះពាល់ ដោយការរៀបចំនិងការកែសម្រួលរចនាសម្ព័ន្ធថ្មី ស្របតាមបទប្បញ្ញត្តិនៃអនុក្រឹត្យនេះ ត្រូវរក្សាទុកអត្ថប្រយោជន៍ ផ្នែកបៀវត្សរ៍យ៉ាងហោចក្នុងកម្រិតដដែល»៕
