លោក ប្រាក់ សុខុន (ឆ្វេង) រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Enrique A. Manalo រដ្ឋមន្ត្រីការបរទេស នៃសាធារណរដ្ឋហ្វីលីពីន កាលពីថ្ងៃទី១៥ ខែមករា។ ក្រសួងការបរទេស
រដ្ឋមន្ត្រីការបរទេសកម្ពុជានិងហ្វីលីពីនបញ្ជាក់ពីការប្តេជ្ញាចិត្តក្នុងការពង្រឹងកិច្ចខិតខំប្រឹងប្រែងរួមគ្នា ដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន ការជួញដូរមនុស្ស និងការបោកប្រាស់តាមប្រព័ន្ធអ៊ីនធឺណិត។
ការប្ដេជ្ញាចិត្តនេះធ្វើឡើងក្នុងកិច្ចសន្ទនាតាមទូរស័ព្ទ រវាងលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយ លោក Enrique A. Manalo រដ្ឋមន្ត្រីការបរទេស នៃសាធារណរដ្ឋហ្វីលីពីន កាលពីថ្ងៃទី១៥ ខែមករាកន្លងទៅ។
ក្រសួងការបរទេសបានថ្លែងនៅក្នុងសេចក្ដីប្រកាសព័ត៌មានថា៖ «លោកលោក Manalo បាន សម្តែងការដឹងគុណចំពោះកិច្ចសហប្រតិបត្តិការពេញលេញ និងកាយវិការដ៏ល្អរបស់កម្ពុជាក្នុងការដោះស្រាយករណីពពោះជំនួសដែលពាក់ព័ន្ធនឹងជនជាតិហ្វីលីពីននាពេលថ្មីៗនេះ»។
ភាគីទាំងពីរក៏បានកោតសរសើរអំពីទំនាក់ទំនងទ្វេភាគី និងកំពុងធ្វើកិច្ចការរៀបចំដំណើរទស្សនកិច្ចផ្លូវការរបស់លោកនាយករដ្ឋមន្ត្រី ហ៊ុន ម៉ាណែត ទៅកាន់ប្រទេសហ្វីលីពីននាខែកុម្ភៈខាងមុខនេះ ក៏ដូចជាជាការជួបគ្នាដោយផ្ទាល់រវាងរដ្ឋមន្ត្រីការបរទេសទាំងពីរ នៅក្នុងកិច្ចប្រជុំចង្អៀតរដ្ឋមន្ត្រី ការបរទេសអាស៊ាននៅប្រទេសម៉ាឡេស៊ីនាពេលខាងមុខ។
កាលពីចុងខែធ្នូ ឆ្នាំ២០២៤ ស្ត្រីជនជាតិហ្វីលីពីន ១៣រូបបានត្រឡប់ទៅដល់ប្រទេសហ្វីលីពីនវិញ ក្រោយពេលពួកគេត្រូវបានចាប់ខ្លួន និង កាត់ទោសដាក់ពន្ធនាគាររយៈពេល ៤ ឆ្នាំតែអនុវត្តទោស២ឆ្នាំនៅកម្ពុជា ពាក់ព័ន្ធនិងអំពើពពោះជំនួស ដែលច្បាប់កម្ពុជាចាត់ទុកជាទង្វើជួញដូរមនុស្ស។ ស្ត្រីទាំង១៣រូបត្រូវបានអន្តរាគមន៍ និងទទួលបានការលើកលែងទោសមុនពេលធ្វើមាតុភូមិនិវត្តន៍។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា ថ្លែងថា កិច្ចសហប្រតិបត្តិការរវាងប្រទេសទាំងពីរនឹងជំរុញដល់ទំនាក់ទំនងផ្នែកវិនិយោគនិងពាណិជ្ជកម្ម និងជាយុទ្ធសាស្ត្រមួយដើម្បីបង្កើនសមត្ថភាពរបស់កម្ពុជាក្នុងការទប់ស្កាត់ឧក្រិដ្ឋកម្មឆ្លងដែន ការឆបោកតាមអនឡាញ ការលេងល្បែងអនឡាញ និងការជួញដូរមនុស្ស។
លោកបន្តថា៖ «បទល្មើសបែបនេះ កម្ពុជាមិនអាចធ្វើការតែម្នាក់ឯងបានទេ ព្រោះវាជាបទល្មើសឆ្លងដែន។ ដូច្នេះ ការបង្កើនកិច្ចសហប្រតិបត្តិការជាមួយប្រទេសហ្វីលីពីន និងប្រទេសផ្សេងទៀត គឺជារឿងចាំបាច់ដើម្បីឲ្យអន្តរាគមន៍ទប់ស្កាត់បទល្មើសឆ្លងដែនមានប្រសិទ្ធភាពខ្ពស់»៕
