មន្រ្តីបរិស្ថាន ចុះពិនិត្យ ទីតាំង ដែលធ្វើសកម្មភាពបូមរ៉ែមាសខុសច្បាប់ ស្ថិតនៅក្នុងតំបន់ដែនជម្រកសត្វព្រៃ ព្រៃឡង់។ រូបថត ក្រសួងបរិស្ថាន
ភ្នំពេញៈ មន្ទីរបរិស្ថានខេត្តកំពង់ធំបានបដិសេធថា ការបូមរ៉ែមាសខុសច្បាប់ ដែលត្រូវបានសារព័ត៌មានផ្សព្វផ្សាយនា ពេលថ្មីៗនេះ គឺកើតឡើង នៅក្នុងដែនជម្រកសត្វព្រៃ ព្រៃឡង់ ស្ថិតក្នុងភូមិសាស្រ្តខេត្តក្រចេះ ហើយមន្រ្តីបរិស្ថាន ក៏មិនដែលបានទទួលប្រាក់៨លានរៀល ជាថ្នូរទៅនឹងការមិនបង្រ្កាបបទល្មើសខុសច្បាប់នេះដែរ។
ការបដិសេធរបស់ លោកតុប កក្កដា ប្រធានមន្ទីរបរិស្ថានខេត្តកំពង់ធំនេះ ធ្វើឡើង នៅក្នុងលិខិតជំរាបជូន រដ្ឋមន្ត្រីក្រសួងបរិស្ថាន លោកអ៊ាង សុផល្លែតចុះថ្ងៃទី ១៦ ខែមករា ដើម្បីបំភ្លឺ ទៅនឹងអត្ថបទសារព័ត៌មានចុះផ្សាយ ដោយចោទប្រកាន់ពីការស៊ូកប៉ាន់ទឹកប្រាក់រាប់លានរៀល ជាថ្នូរទៅនឹងការមិនបង្រ្កាបសកម្មភាព បូមរ៉ែមាសខុសច្បាប់។
ក្រុមការងារ នៃមន្ទីរបរិស្ថានខេត្តកំពង់ធំ បានចុះទៅពិនិត្យទីតាំង ដែលបានចុះផ្សាយនេះនៅដើមសប្តាហ៍នេះ ក្រោយពីមានការផ្សព្វផ្សាយនោះមក។
លិខិតបំភ្លឺ ដែលក្រសួងបរិស្ថាន បានបង្ហោះជាសាធារណៈ នៅថ្ងៃសុក្រ ទី១៧ ខែមករានេះ បានលើកឡើងថា ការចុះពិនិត្យ សកម្មភាពម៉ាស៊ីនបូមរ៉ែមាសនោះ គឺស្ថិតនៅតំបន់បែកចាន ក្នុងដែនជម្រកសត្វព្រៃព្រៃឡង់ ភូមិសាស្ត្រខេត្តក្រចេះ។ ទីតាំងនោះ មានចំងាយ ជាង២គីឡូម៉ែត្រ ពីព្រំប្រទល់ខេត្តកំពង់ធំ និងខេត្តក្រចេះ។
លោកកក្កដាបានបញ្ជាក់ថា៖«ចំពោះអ្នកធ្វើសកម្មភាពល្មើសទាំងនោះ សុទ្ធតែជាប្រជាពលរដ្ឋមក ពីខាងខេត្តក្រចេះ(តាមការសាកសួរអ្នកដកដំឡូងមីនៅក្បែរនោះ)។ ដោយឡែកប្រាក់ចំនួន៨លានរៀល ដែល ជាថ្នូរមិនបង្ក្រាបការបូមរ៉ែមាស យើងខ្ញុំមិនដែលបានទទួលទេ និងមិនដែលបានបង្គាប់ឱ្យមន្ត្រីក្រោមឱវាទ ដើរទារលុយ ឬប្រាក់ពីអ្នកបូមរ៉ែមាសនោះទេ»។
លោកបានអះអាងថា ចំពោះសកម្មភាពបូមរ៉ែមាស ខុសច្បាប់ ក្នុងភូមិសាស្ត្រខេត្តកំពង់ធំ មន្ទីរបរិស្ថានខេត្ត បានធ្វើការផ្សព្វផ្សាយ និងធ្វើការបង្ក្រាបជាបន្តបន្ទាប់ៗ កន្លងមក ដោយមិនមានយោគយល់នោះឡើយ។
ប្រធានមន្ទីរបរិស្ថានខេត្តក្រចេះ លោកឆាយ ឌួងសាវុធជាប់ប្រជុំមិនអាចមានប្រសាសន៍បានទេ ទាក់ទងទៅនឹងករណីនេះ នៅថ្ងៃទី ១៧ ខែមករានេះ៕
