លោក Alam Sardar Umar (ឆ្វេង) តំណាងអង្គការយូណេស្កូប្រចាំនៅកម្ពុជា ប្រគល់អាវកាក់អ្នកសារព័ត៌មានជូនដល់លោក នេត្រ ភក្ត្រា រដ្ឋមន្ត្រីក្រសួងព័ត៌មាន នាថ្ងៃទី៦ ខែឧសភា ឆ្នាំ២០២៤។ ក្រសួងព័ត៌មាន
ក្រសួងព័ត៌មាននឹងបន្តធានាបរិយាកាសការងារប្រកបដោយសុវត្ថិភាពសម្រាប់កាប្រកបវិជា្ជជីវៈសារព័ត៌មាននៅកម្ពុជា អភិវឌ្ឍមូលធនមនុស្ស ធានាសន្តិសុខព័ត៌មាន បន្តលើកកម្ពស់ការគោរពសិទ្ធិសេរីភាពសារព័ត៌មាន។ នេះជាការលើកឡើងរបស់លោក ទេព អស្នារិទ្ធ អ្នកនាំពាក្យក្រសួងព័ត៌មាន។
លោកបានថ្លែងនៅក្នុងសំណេរអំពីស្ថានភាពសារព័ត៌មាននៅកម្ពុជា នៅឆ្នាំ២០២៤ ថា ការលើកកម្ពស់វិស័យសារព័ត៌មាននេះ ឈរលើមូលដ្ឋានសមភាព គ្មានការរើសអើង គ្មានការគំរាមកំហែង និងមិនប្រកាន់និន្នាការនយោបាយឡើយ។
លោកថ្លែងថា៖ «សូមអំពាវនាវដល់អ្នកសារព័ត៌មានទាំងអស់ ក្នុងការអនុវត្តការងារ សូមប្រកាន់ជំហរស្មោះត្រង់ សុចរិត មិនលម្អៀង រក្សាភាពថ្លៃថ្នូរ សណ្តាប់ធ្នាប់ល្អ ដោយមនសិកាការពារផលប្រយោជន៍សាធារណៈ ឈរលើមូលដ្ឋានក្រមសីលធម៌ និងនិយាមវិជ្ជាជីវៈសារព័ត៌មាន ដើម្បីចូលរួមលើកកម្ពស់គុណតម្លៃវិជ្ជាជីវៈ គុណភាពសារព័ត៌មាន និងនិរន្តរភាពប្រព័ន្ធផ្សព្វផ្សាយនៅកម្ពុជា»។
លោករំឭកថា អ្នកសារព័ត៌មានត្រូវអនុលោមតាមច្បាប់និងលិខិតបទដ្ឋានជាធរមាន និងត្រូវអនុវត្តការងារដោយគោរពសិទ្ធិ តួនាទី និងករណីយកិច្ចរបស់ខ្លួនជាអ្នកសារព័ត៌មាន។
យោងតាមលោក អស្នារិទ្ធ បច្ចុប្បន្ននេះ កម្ពុជាមានអង្គភាពសារព័ត៌មានចំនួន ១៦២០ អង្គភាព សមាគមសារព័ត៌មានចំនួន២៦ អ្នកសារព័ត៌មានទាំងប្រព័ន្ធផ្សព្វផ្សាយប្រពៃណីនិងទំនើបសរុបចំនួនជាង ៨ពាន់នាក់ ដោយពួកគេបាននិងកំពុងបំពេញការងាររបស់ខ្លួនបានយ៉ាងពេញលេញ មានសុវត្ថិភាព ដោយឈរលើមូលដ្ឋានក្រមសីលធម៌ និងវិជ្ជាជីវៈសារព័ត៌មាន។
បច្ចុប្បន្ននេះ អ្នកសារព័ត៌មានកាសែត និងសារព័ត៌មានអនឡាញដែលជាអ្នកជាប់ពន្ធតូច បានទទួលអត្ថប្រយោជន៍នៃការលើកលែងពន្ធប៉ាតង់ ចំនួន ៥ឆ្នាំ គឺពីឆ្នាំ២០២៣ ដល់ ២០២៨ ខណៈការស្នើសុំអាជ្ញាប័ណ្ណក្នុងការបង្កើតអង្គភាពសារព័ត៌មានថ្មីនៅក្រសួងព័ត៌មាន ទទួលបានការកាត់បន្ថយកម្រៃសេវា ចំនួន ៥០ភាគរយ ផងដែរ។
នៅឆ្នាំ២០២៤ ក្រសួងព័ត៌មានបានសម្របសម្រួល និងដោះស្រាយបណ្តឹងពាក់ព័ន្ធនឹងការអនុវត្តវិជ្ជាជីវៈចំនួន ៤៣ករណី។ យ៉ាងណាក៏ដោយ មានអាជ្ញាបណ្ណអាជីវកម្មព័ត៌មានអនឡាញចំនួន ៥ ត្រូវបានលុបចេញពីបញ្ជី ដោយសារអង្គភាពបានបំពានក្រមសីលធម៌ធ្ងន់ធ្ងរ។
សម្រាប់លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (ខេមបូចា) លោកចង់ឃើញមានភាពប្រសើរឡើងនៃសេរីភាពសារព័ត៌មានតាមរយៈការពិនិត្យលើការធ្វើវិសោធនកម្មលើច្បាប់ពាក់ព័ន្ធឲ្យមានសង្គតិភាពជាមួយគ្នា ដូចជាក្រមព្រហ្មទណ្ឌ ច្បាប់ស្ដីពីទូរគមនាគមន៍ និងច្បាប់ស្ដីពីរបបសារព័ត៌មាន។
លោកជំរុញឲ្យច្បាប់ស្ដីការទទួលបានព័ត៌មាន ត្រូវបានអនុម័តឲ្យបានឆាប់ ខណៈដែលក្រសួងគួរពិចារណាលើការបារម្ភនានាដែលត្រូវបានលើកឡើងអំពីធម្មនុញ្ញសារព័ត៌មាន។ សម្រាប់ការពង្រឹងវិជ្ជាជីវៈអ្នកសារព័ត៌មាន លោកលើកទឹកចិត្តឲ្យមានការចូលរួមពីមន្ត្រីអនុវត្តច្បាប់ ជាជាងពង្រឹងតែវិជ្ជាជីវៈពីខាងអ្នកសារព័ត៌មាន។
លោកក៏លើកទឹកចិត្តឲ្យប្រើច្បាប់សារព័ត៌មាន នៅពេលអ្នកសារព័ត៌មានណាម្នាក់ប្រព្រឹត្តខុសក្រមវិជ្ជាជីវៈក្នុងពេលបំពេញការងារ ហើយការបៀតបៀនលើអ្នកសារព័ត៌មានដែលស៊ើបអង្កេតបទល្មើសណាមួយគួរត្រូវបានចាត់វិធានការផ្លូវច្បាប់។
លោកបន្តថា៖ «សម្រាប់បងប្អូនអ្នកសារព័ត៌មានក៏គួរតែឈរនៅលើវិជ្ជាជីវៈឲ្យបានរឹងមាំជាងពេលអ្វីដែលធ្លាប់បានធ្វើក្នុងការបំពេញការងារកន្លងមក ដើម្បីជំរុញការលើកកម្ពស់វិជ្ជាជីវៈ និងរក្សាកិត្តិនាមរបស់អ្នកសារព័ត៌មានផង និងដើម្បីជាខែលនៅពេលមានការប្ដឹងផ្ដល់លើអ្នកសារព័ត៌មាន»៕
