ក្រុមក្មេងទំនើងចំនួន៧នាក់ ត្រូវបានឃាត់ខ្លួន ពាក់ព័ន្ធនឹងករណីបង្ហោះម៉ូតូតាមផ្លូវសាធារណៈ កាលពីសប្តាហ៍មុន នៅក្នុង សង្កាត់ព្រែកតាសេក ខណ្ឌជ្រោយចង្វារ។ រូបថត ស្នងការដ្ឋាននគរបាលរាជធានីភ្នំពេញ
ភ្នំពេញៈ អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ឯក ជួន ណារិន្ទ បានដាក់បទបញ្ជាឱ្យកម្លាំងនគរបាល ត្រូវតែបង្កើនសកម្មភាពទ្វេរដង ក្នុងការបង្ការ ទប់ស្កាត់ និងឈានទៅបង្ក្រាបក្រុមក្មេងទំនើង សម្រាប់ឆ្នាំ២០២៥នេះ។
ផែនការ ដែលលោកបានដាក់ចេញ ក្នុងសកម្មភាពទប់ស្កាត់ក្រុមក្មេងទំនើង ទៅតាមបទបញ្ជារបស់រាជរដ្ឋាភិបាល ដើម្បីធានាសន្ដិសុខ សណ្ដាប់ធ្នាប់ជូនប្រជាពលរដ្ឋនោះ មានទាំងការងារផ្សព្វផ្សាយអប់រំនៅតាមមូលដ្ឋាន នៅក្នុងវេទិកាសាធារណៈ ការពង្រឹងអនុវត្តវិធានការជំនាញ និងរឹងបន្ដឹងវិធានការច្បាប់ជាដើម។
លោកឧត្តមសេនីយ៍ឯក ក៏បានដាក់បទបញ្ជាដល់ស្នងការរងទទួលការងារព្រហ្មទណ្ឌ ជាពិសេសទទួលដឹកនាំការងារបង្ក្រាបទប់ស្កាត់ ក្រុមក្មេងទំនើង ត្រូវចុះធ្វើបច្ចុប្បន្នភាពនៅតាមមូលដ្ឋានទាំងមុខសញ្ញាបង្ហោះម៉ូតូ ឬកែច្នៃមធ្យោបាយនានាដើម្បីជាចំណែកក្នុងការអនុវត្តបទបញ្ជារបស់ប្រមុខរាជរដ្ឋាភិបាលឱ្យកាន់តែមានប្រសិទ្ធភាពខ្ពស់បំផុត។
លោកនាយករដ្ឋមន្រ្តីហ៊ុន ម៉ាណែត កាលពីសប្តាហ៍មុន បានបញ្ជាឱ្យគណៈអភិបាល ស្នងការនគរបាលរាជធានីខេត្ត អគ្គស្នងការដ្ឋាននគរបាលជាតិ និងកម្លាំងអាវុធហត្ថបន្តសកម្មភាព បង្រ្កាបក្រុមក្មេងទំនើងឱ្យអស់ ដោយមិនត្រូវដោះលែងពួកគេបន្ទាប់ពីឃាត់ខ្លួន ប៉ុន្តែត្រូវដាក់ទោសឱ្យបានធ្ងន់ធ្ងរ។
ថ្លែងក្នុងពិធីបិទសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការក្នុងការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៤ និងដាក់ចេញទិសដៅការងារឆ្នាំ២០២៥ របស់អគ្គស្នងការដ្ឋាននគរបាលជាតិ នាថ្ងៃទី៣១ ខែធ្នូ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកស សុខាក៏បាន ជំរុញឱ្យសមត្ថកិច្ចចំណុះក្រសួងមហាផ្ទៃបន្តរៀបចំផែនការបង្ការទប់ស្កាត់ និងបង្ក្រាបក្មេងទំនើង ដោយសហការជាមួយនឹងភាគីពាក់ព័ន្ធផងដែរ ជាពិសេស គឺនៅតាមបណ្តាខេត្តទេសចរណ៍មួយចំនួន។
លោកបានណែនាំថា៖«កម្លាំងសមត្ថកិច្ចទាំងអស់ត្រូវតែប្រមូលផ្តុំកម្លាំងរួមដើម្បីបង្រ្កាបឱ្យបាននូវក្មេងទំនើងនេះ ដែលយើងឃើញថា នៅតែមានសព្វថ្ងៃនេះ។ ខ្ញុំសូមឱ្យរឹតបន្តឹងទៅលើកិច្ចការងារនេះឡើងវិញ»។
លោកឧបនាយករដ្ឋមន្ត្រីក៏បានឯកភាពទៅលើវិធានការចុះពិនិត្យនៅតាមផ្ទះសំណាក់ ដើម្បីរកក្រុមក្មេងទំនើងផងដែរ ព្រោះថា ពួកគេមួយចំនួនបានជួលបន្ទប់ដេករួមគ្នា ក្រោយពីបានដើរដាច់យប់។ លោកក៏បានអំពាវនាវ សុំឱ្យមានកិច្ចសហការពីម្ចាស់ផ្ទះសំណាក់ ឪពុកម្តាយ អាណាព្យាបាល និងលោកគ្រូអ្នកគ្រូផងដែរ។
លោកជួន ណារិន្ទ បានលើកឡើងថា គ្រប់ហេតុការណ៍ ដែលកើតឡើង គឺសមត្ថកិច្ចជំនាញ តែងតែធ្វើការបង្ក្រាបបានជាបន្ដបន្ទាប់ បើទោះបីទប់ស្កាត់មិនទាន់បានទាំងស្រុងយ៉ាងណាក៏ដោយ។
លោកបានឱ្យដឹងថា សកម្មភាពរបស់ក្រុមក្មេងទំនើងមានដូចជា ការកាប់ចាក់គ្នា ការប្លន់ អំពើឃាត់កម្ម និងអំពើលួច។ ក្នុង រយៈពេល៤ថ្ងៃ ចាប់ពីថ្ងៃ២៨ ដល់ថ្ងៃទី៣១ ខែធ្នូ ឆ្នាំ២០២៤ កម្លាំងសមត្ថកិច្ចរាជធានីភ្នំពេញ បង្ក្រាបបានក្រុមក្មេងទំនើង២៦នាក់ ដែលពាក់ព័ន្ធនឹង១៤ករណី។
លោកឧត្តមសេនីយ៍ឯកក៏បានលើកឡើងផងដែរថា វត្ថុតាង ដែលមានមធ្យោបាយប្រើសម្រាប់ធ្វើសកម្មភាព ដូចជា ដាវ និងកាំបិតជាដើមនោះ គឺសុទ្ធតែជាសម្ភារ ដែលត្រូវបានកែច្នៃដោយក្រុមក្មេងទំនើងនោះផ្ទាល់តែម្ដង។
លោកក៏បានដាក់បទបញ្ជាឱ្យនគរបាលជំនាញប្រឆាំងបទល្មើសសេដ្ឋកិច្ច ឱ្យបន្ដយកចិត្តទុកដាក់តាមដានពិនិត្យទីតាំងលក់វត្ថុអនុស្សាវរីយ៍ ព្រោះថា មានសម្ភារមួយចំនួនត្រូវបានយកទៅកែច្នៃ ជាដាវ ឬកាំបិតបាន ដើម្បីជាចំណែកបង្ការ និងទប់ស្កាត់កុំឱ្យធ្លាក់ទៅដល់ដៃក្រុមក្មេងទំនើង។
តុលាការរាជធានីខេត្តបានចាត់ការ លើសំណុំរឿងក្មេងទំនើងចំនួន២ ១១៥ករណី ក្នុងនោះ ក្មេងទំនើងចំនួន៣ ៣០០នាក់ត្រូវបានឃាត់ខ្លួនក្នុងរយៈពេលជាង៧ខែមកនេះ។ រាជធានីភ្នំពេញមានករណីក្មេងទំនើងច្រើនជាងបណ្តាខេត្តផ្សេងៗទៀត៕
