អ្នកស្រី សឿង ជាអ្នករស់រានមានជីវិតពីជំងឺមហារីកសុដន់ មានកម្លាំងពីកូនស្រីតូច នៅពេលដែលអ្នកស្រីប្រឈមមុខការមាក់ងាយជុំវិញការរកឃើញជំងឺមហារីក។ រូបថត Miguel Jeronimo
ភ្នំពេញ៖ ការតាំងពិពរណ៍ «យើងទាំងអស់គ្នាយកចិត្ដទុកដាក់ចំពោះអ្នក» រៀបចំដោយអង្គការ Douleurs Sans Frontières (DSF) សហការជាមួយវិទ្យាស្ថាន Recherche pour le Développement (IRD) បានផ្ដល់ការគាំទ្រដល់អ្នកជំងឺមហារីក និងទទួលជំនួយតាមរយៈគម្រោងសិល្បៈ។
ការតាំងពិព័រណ៍សិល្បៈ និងសុខុលមាលភាព បំផុសក្តីសង្ឃឹម និងជំរុញការយល់ដឹងអំពីបញ្ហាប្រឈមផ្នែកថែទាំសុខភាពនៅកម្ពុជា ដែលចាប់បើកពីថ្ងៃទី ១៦ ខែមករា ដល់ថ្ងៃទី ១៦ ខែកុម្ភៈ នៅ F3 (Friends Futures Factory)។
យោងតាមអ្នករៀបចំកម្មវិធី បានឱ្យដឹងថា៖ «គោលបំណងនៃការតាំងពិព័រណ៍គឺជាការបង្ហាញរូបថតដែលបំផុសគំនិតដោយអ្នកថតរូបជនជាតិព័រទុយហ្គាល់ លោក Miguel Jeronimo ផ្ដិតយករូបភាពពេលវេលានៃសេចក្តីរីករាយ និងគ្រាដ៏លំបាករបស់អ្នកជំងឺ»។
គិតត្រឹមខែកញ្ញា ឆ្នាំ២០២៣ អ្នកស្រី សុផៃ បានរក្សានូវតុល្យភាពជីវិតរវាងការបំពេញវិជ្ជាជីវៈ និងការចំណាយពេលវេលាក្នុង នាមជាម្តាយសម្រាប់កូនស្រីតែម្នាក់បានយ៉ាងល្អ។
ប៉ុន្តែអ្វីៗទាំងនេះបានផ្លាស់ប្តូរ នៅពេលអ្នកស្រីបានរកឃើញថាខ្លួនមានជំងឺមហារីកស្បូនដំណាក់កាលទី៤។ ភ្លាមៗនោះ អ្នកស្រីបានប្រញាប់ទៅព្យាបាលនៅមន្ទីរពេទ្យ តែជំងឺមហារីកមានសភាពធ្ងន់ធ្ងរពេករហូតមិនអាចព្យាបាលជាសះស្បើយបានឡើយ។
យោងតាមអង្គការ DSF បានឱ្យដឹងថា៖ «ដើម្បីព្យាយាមប្រយុទ្ធនឹងជំងឺនេះ អ្នកស្រីបានឈប់បរិភោគសាច់ ដោយសង្ឃឹមថាអាចពន្លឺតការវិវត្តរបស់ជំងឺ។ យ៉ាងណាមិញ កម្លាំងរបស់អ្នកស្រីបានថយចុះ និងកាន់តែមានការឈឺចាប់ខ្លាំងឡើង»។
បន្ទាប់ពីនោះ អ្នកស្រី សុផៃ ត្រូវបានបញ្ជូនទៅកម្មវិធីថែទាំតាមផ្ទះរបស់អង្គការ DSF ដែលផ្តល់សេវាគ្រប់គ្រងការឈឺចាប់ ព័ត៌មានអំពីជំងឺមហារីក និងដំណើរវិវត្តរបស់ជំងឺ និងការគាំទ្រផ្នែកចិត្តសាស្ត្រ។
បច្ចុប្បន្ន អ្នកស្រីកំពុងរៀនសម្របខ្លួនទៅនឹងការធ្វើរោគវិនិច្ឆ័យជំងឺតាមរបៀបថ្មី។ ដោយមានការជួយជ្រោមជ្រែងពីអ្នកមើលថែ អ្នកស្រី សុផៃ កំពុងផ្លាស់ប្តូរការយល់ដឹងអំពីសុខភាព សុខុមាលភាព និងភាពធន់ ដែលជួយធ្វើឱ្យគាត់បានស្ងប់ចិត្ត។
ព្រះតេជគុណ ណុប ប្រុស ព្រះជន្ម ៦០វស្សា មានសង្ឃដិកាថា៖ «មនុស្សគ្រប់រូបមានកម្មផល ហើយគ្រប់កាលៈទេសៈ ទោះលំបាកយ៉ាងណាក៏ដោយ សុទ្ធតែមានហេតុផល»។
ក្រោយវះកាត់ ព្រះតេជគុណបានជ្រើសរើសការបួសជាព្រះសង្ឃ ដោយមិនវិលត្រឡប់ទៅគ្រួសារវិញ។ ភាពស្ងប់ស្ងាត់របស់វត្តផ្តល់ឱ្យព្រះអង្គនូវស្ថេរភាព និងភាពច្បាស់លាស់។
អ្នកស្រី សឿង ជាអ្នករស់រានមានជីវិតពីជំងឺមហារីកសុដន់ មានកម្លាំងពីកូនស្រីតូច នៅពេលដែលអ្នកស្រីប្រឈមមុខការមាក់ងាយជុំវិញការរកឃើញជំងឺមហារីក។ រូបថត Miguel Jeronimo
អ្នកស្រី សឿង ជាអ្នករស់រានមានជីវិតពីជំងឺមហារីកសុដន់ មានកម្លាំងពីកូនស្រីតូច នៅពេលដែលអ្នកស្រីប្រឈមមុខការមាក់ងាយជុំវិញការរកឃើញជំងឺមហារីក។ អ្នកស្រីទទួលបានការគាំទ្រឥតឈប់ឈរពីអង្គការ DSF។
អស់រយៈពេល ៣០ ឆ្នាំមកហើយអង្គការ DSF គឺជាសញ្ញានៃក្តីសង្ឃឹមសម្រាប់ប្រជាជនដែលងាយរងគ្រោះ ដោយផ្តល់ការថែទាំវេជ្ជសាស្ត្រនៅទូទាំង ១១ ខេត្ត ដោយការផ្ដល់សេវាកម្មថែទាំតាមផ្ទះ និងការប្រឹក្សាតាមទូរស័ព្ទ។
លោកស្រី Claire Robaye នាយកប្រចាំប្រទេសរបស់ DSF បាននិយាយថា៖ «យើងបានបោះជំហានយ៉ាងសំខាន់ក្នុងការផ្ដល់សេវាកម្មដល់សហគមន៍ និងបណ្តុះបណ្តាលអ្នកជំនាញផ្នែកថែទាំសុខភាពក្នុងតំបន់។ ទោះជាយ៉ាងណាក៏ដោយ បញ្ហាប្រឈម ដូចជា ហេដ្ឋារចនាសម្ព័ន្ធជនបទមានកម្រិត លទ្ធភាពទទួលបានថ្នាំចាំបាច់មិនគ្រប់គ្រាន់ និងការមាក់ងាយខាងវប្បធម៌ចំពោះអ្នកជំងឺ»។
ការតស៊ូមតិរបស់អង្គការ DSF ពង្រីកលើសពីការព្យាបាល។ ពួកគេសហការជាមួយក្រសួងសុខាភិបាល និងរៀបចំយុទ្ធនាការយល់ដឹងដើម្បីដោះស្រាយគម្លាតផ្នែកថែទាំសុខភាព។
កិច្ចខិតខំប្រឹងប្រែងរបស់ពួកគេត្រូវបានទទួលស្គាល់ដោយអង្គការសុខភាពពិភពលោក ដោយបានសង្កត់ធ្ងន់បន្ថែមទៀតអំពីសារៈសំខាន់នៃបេសកកម្មរបស់ពួកគេ។
មូលដ្ឋានគ្រឹះនៃការងាររបស់អង្គការ DSF គឺកាត់បន្ថយការមាក់ងាយជុំវិញជំងឺដូចជាមហារីក។ នៅក្នុងសហគមន៍ខ្មែរជាច្រើន ការធ្វើរោគវិនិច្ឆ័យបែបនេះច្រើនតែមានការយល់ច្រឡំ ឬត្រូវបានបិទបាំងដោយស្ងៀមស្ងាត់។
អ្នកស្រី សឿង ទទួលបានការព្យាបាលពីអង្គការ DSF តាមរយៈសេវាថែទាំដល់ផ្ទះ។ រូបថត Miguel Jeronimo
អង្គការ DSF ប្រើប្រាស់សិក្ខាសាលា យុទ្ធនាការយល់ដឹង និងការនិទានរឿងផ្ទាល់ខ្លួន ដើម្បីជំរុញការសន្ទនាបើកចំហអំពីសុខភាព។ដោយប្រើឧបករណ៍ច្នៃប្រឌិត ដូចជា ល្ខោន និងការថតរូប វាលើកទឹកចិត្តឱ្យមានការធ្វើរោគវិនិច្ឆ័យ និងការព្យាបាលទាន់ពេលវេលា។
លោកស្រី Claire បានចែករំលែកថា៖ «អ្នកជំងឺច្រើនតែមានអារម្មណ៍ថាមានកំហុស ឬខ្មាសចំពោះជំងឺរបស់ពួកគេ។ តាមរយៈការចែករំលែករឿងពិត និងការលើកកម្ពស់ការអប់រំ យើងកំពុងបង្វែការយល់ខុស និងផ្តល់សិទ្ធិអំណាចដល់សហគមន៍ក្នុងការស្វែងរកការថែទាំដោយគ្មានការភ័យខ្លាច»។
យុទ្ធនាការបរិច្ចាគដែលកំពុងបន្តរបស់របស់ DSF រួមមាន ទឹកប្រាក់ ១០ដុល្លារ ពិនិត្យមនុស្សម្នាក់សម្រាប់ HPV ជាជំហានដ៏សំខាន់ក្នុងការការពារជំងឺមហារីកមាត់ស្បូន។
ទឹកប្រាក់ ២០ដុល្លារ ផ្តល់មូលនិធិដល់ការពិគ្រោះជាមួយការគាំទ្រផ្នែកវេជ្ជសាស្ត្រ និងផ្លូវចិត្តសម្រាប់អ្នកជំងឺ និងក្រុមគ្រួសាររបស់ពួកគេ និង ១០០ដុល្លារ ឧបត្ថម្ភយុទ្ធនាការយល់ដឹងពីជំងឺមហារីកសម្រាប់សិស្ស ១០០។
ការរួមចំណែកអាចធ្វើឡើងតាមរយៈគេហទំព័រផ្លូវការរបស់ DSF ឬ ABA' Pay ដោយធានាថារាល់ប្រាក់ដុល្លារគាំទ្រដល់វប្បធម៌នៃសុខភាព សេចក្តីថ្លៃថ្នូរ និងសហគមន៍។
ចក្ខុវិស័យរបស់របស់ DSF លាតសន្ធឹងហួសពីជញ្ជាំងវិចិត្រសាល។ គោលដៅរយៈពេលវែងរបស់ពួកគេគឺពង្រីកលទ្ធភាពទទួលបានការថែទាំអ្នកជំងឺ និងជំនួយផ្លូវចិត្តនៅទូទាំងប្រទេសកម្ពុជា ដោយបង្កើតបណ្តាញដែលធានាថាគ្មាននរណាម្នាក់ប្រឈមមុខនឹងជំងឺតែម្នាក់ឯង។
លោកស្រី Claire បានប្រាប់ភ្នំពេញប៉ុស្ដិ៍ថា៖ «បុគ្គលម្នាក់ៗអាចជួយដោយការស្ម័គ្រចិត្ត ឬការរៃអង្គាសថវិកា ខណៈពេលដែលអង្គការ និងម្ចាស់ជំនួយអាចចូលរួមចំណែកធនធានហិរញ្ញវត្ថុ ឬអ្នកជំនាញដើម្បីពង្រីកគំនិតផ្តួចផ្តើមរបស់យើង»។
ការតាំងពិព័រណ៍ «យើងទាំងអស់គ្នាយកចិត្ដទុកដាក់ចំពោះអ្នក» នេះ ឆ្លុះបញ្ចាំងពីការប្តេជ្ញាចិត្តរបស់អង្គការ DSF ក្នុងការលើកកម្ពស់ការយល់ដឹងអំពីការគ្រប់គ្រងការឈឺចាប់ និងការថែទាំអ្នកជំងឺ៕
