ជនរងគ្រោះ Yu Emil ជនជាតិអាមេរិកាំងដើមកំណើតតៃវ៉ាន់ ដែលត្រូវបានជួយសង្គ្រោះកាលពីថ្ងៃទី១៥ មករា។ នគរបាលជាតិ
សមត្ថកិច្ចកម្ពុជាសង្គ្រោះជនរងគ្រោះពីការចាប់ជំរិតនៅប្រទេសថៃ ដែលត្រូវបានក្រុមឧក្រិដ្ឋជនដាក់ថ្នាំសណ្ដំ រួចយកមកបង្ខាំងទុកនៅកម្ពុជាដើម្បីជំរិតទារប្រាក់ពីក្រុមគ្រួសារ។
អគ្គស្នងការនគរបាលជាតិបានថ្លែងនៅក្នុងសេចក្ដីប្រកាសព័ត៌មាននៅថ្ងៃនេះថា ជនរងគ្រោះ មានឈ្មោះ Yu Emil ជនជាតិអាមេរិកាំងដើមកំណើតតៃវ៉ាន់។
ប្រតិបត្តិការជួយសង្គ្រោះដែលទទួលបានជោគជ័យនៅថ្ងៃទី១៥ ខែមករា ធ្វើឡើងតាមការជូនដំណឹងពីក្រុមគ្រួសាររបស់ជនរងគ្រោះតាមរយៈទំព័រហ្វេសប៊ុករបស់ក្រសួងមហាផ្ទៃ កាលពីថ្ងៃទី១៤ ខែមករា។
បើតាមនគរបាលជាតិ ជនរងគ្រោះត្រូវបានចាប់ជំរិតនៅទីក្រុងបាងកក ប្រទេសថៃ ដោយបានចាញ់បោកក្រុមឧក្រិដ្ឋជនជនជាតិចិនតៃវ៉ាន់នៅប្រទេសថៃ ដោយពួកគេបានលួងលោម បោកបញ្ឆោតឲ្យធ្វើដំណើរចេញពីខេត្តសៀងហៃប្រទេសចិន មកប្រទេសថៃ ដើម្បីចូលរួមកម្មវិធីសម្ពោធ ហាងនំមួយកន្លែងនៅទីក្រុងបាងកក។ នៅពេលមកដល់ទីក្រុងបាងកក ជនរងគ្រោះ Yu Emil ត្រូវបានក្រុមឧក្រិដ្ឋជនដាក់ថ្នាំ រួចដឹកបញ្ជូនមកកម្ពុជា បង្ខាំងទុក ធ្វើទារុណកម្ម និងជំរិតទារប្រាក់។
អគ្គស្នងការនគរបាលជាតិបញ្ជាក់ថា៖ «ក្រោយអន្តរាគមន៍សង្គ្រោះជនរងគ្រោះបានដោយសុវត្ថិភាព ក្រុមប្រតិបត្តិការនៃគណៈបញ្ជាការ បានឃាត់ខ្លួនជនសង្ស័យម្នាក់ជាជនជាតិចិនតៃវ៉ាន់ដូចគ្នាក្នុងចំណោមបក្ខពួកផ្សេងទៀត ដែលទទួលខុសត្រូវលើការគ្រប់គ្រងជនរងគ្រោះមិនអោយរត់គេច និងធ្វើទារុណកម្ម ដើម្បីឲ្យបណ្ដាញឧក្រិដ្ឋជននៅ ប្រទេសថៃធ្វើការទំនាក់ទំនងជាមួយក្រុមគ្រួសារទារប្រាក់ដោះដូរនឹងសុវត្ថិភាពរបស់ជនរងគ្រោះ»។
ជនរងគ្រោះកំពុងស្ថិតក្រោមការគ្រប់គ្រង តាមដានសុខភាពពីសមត្ថកិច្ចនគរបាលជាតិកម្ពុជា និងត្រៀមរៀបចំបែបបទប្រគល់ជូនតំណាងស្ថានទូតអាមេរិក ដើម្បីគ្រប់គ្រងបន្តនិងរៀបចំបែបបទចាកចេញពីកម្ពុជា។
ជនសង្ស័យម្នាក់ដែលសមត្ថកិច្ចមិនបញ្ចេញឈ្មោះ ត្រូវបានចាប់ខ្លួន។ នគរបាលជាតិ
សមត្ថកិច្ចកម្ពុជាកំពុងស្រាវជ្រាវកំណត់អត្តសញ្ញាណក្រុមឧក្រិដ្ឋជនជនជាតិចិនតៃវ៉ាន់ និងមេក្លោង ដែលមានអង្គការចាត់តាំងនៅប្រទេសថៃ និងអាចឈានទៅសហការជាមួយសមត្ថកិច្ចថៃ ដើម្បីកាត់ផ្តាច់បណ្ដាញឧក្រិដ្ឋកម្មនេះទាំងស្រុង»។
ក្នុងរយៈពេលប៉ុន្មានសប្ដាហ៍ចុងក្រោយនេះ ការចាប់ជំរិតជនជាតិចិនមានល្បីរន្ទឺ បន្ទាប់ពីតារាសម្ដែងចិនពីររូបត្រូវបានចាប់ជំរិត ហើយក្រោយមកត្រូវបានជួយសង្គ្រោះ។
តារាទាំងពីររូបរួមមាន Wang Xing ដែលគេស្គាល់ថាជា Ip Man 3 ដែលត្រូវបានក្រុមឧក្រិដ្ឋជនចាប់ជំរិតយកទៅប្រព្រឹត្តការឆបោកតាមអនឡាញ នៅប្រទេសមីយ៉ាន់ម៉ា ហើយត្រូវបានសង្គ្រោះកាលពី២សប្ដាហ៍មុន និងតារាម៉ូដែល Yang Zeqi ដែលត្រូវសង្គ្រោះកាលពីថ្ងៃទីចុងសប្ដាហ៍មុន៕
