កុមារជាង ១៩៧០០០ នាក់បានទទួលការអប់រំប្រកបដោយគុណភាព និងប្រកបដោយបរិយាប័ន្ន ដោយជំនៈរនាំងភាពក្រីក្រ និងរនាំងដែលមិនត្រូវបានគេរាប់បញ្ចូល។ រូបថត សហការី
ភ្នំពេញ៖ អង្គការទស្សនៈពិភពលោកកម្ពុជាបានឈានដល់ដំណាក់កាលដ៏សំខាន់មួយក្នុងដំណើររបស់ខ្លួន ដើម្បីផ្លាស់ប្តូរជីវិតរបស់កុមារដែលងាយរងគ្រោះ។
របាយការណ៍យុទ្ធសាស្ត្រពាក់កណ្តាលគម្រោង ត្រូវបានលើកឡើងក្នុងសិក្ខាសាលាពិគ្រោះយោបល់ដែលធ្វើឡើងនៅរាជធានីភ្នំពេញថាជាព្រឹត្តិការណ៍ដ៏សំខាន់មួយសម្រាប់ការវាយតម្លៃយុទ្ធសាស្ត្ររយៈពេលប្រាំឆ្នាំរបស់អង្គការ។
ចាប់ផ្តើមនៅឆ្នាំ ២០២៣ យុទ្ធសាស្ត្រនេះមានគោលបំណងផ្ដល់ជំនួយដល់កុមារ ៥ លាននាក់នៅត្រឹមឆ្នាំ ២០២៧ ហើយពេលនេះបានឈានដល់កុមារជាង ៣ លាននាក់រួចហើយ។
សិក្ខាសាលានេះមានការចូលរួមតំណាងរដ្ឋាភិបាល ដៃគូអភិវឌ្ឍន៍អន្តរជាតិ អង្គការសង្គមស៊ីវិល ភាគីពាក់ព័ន្ធក្នុងវិស័យឯកជន និងថ្នាក់ដឹកនាំយុវជន ដើម្បីអបអរសាទរសមិទ្ធផលនានា ក៏ដូចជារំឭកឡើងវិញនូវភាពជោគជ័យនាពេលអនាគត។
យុទ្ធសាស្ត្ររយៈពេលប្រាំឆ្នាំតំណាងឱ្យការប្តេជ្ញាចិត្តប្រកបដោយមហិច្ឆតាក្នុងការដោះស្រាយបញ្ហាឫសគល់នៃភាពក្រីក្រ និងធានាថា កុមារគ្រប់រូបអាចរីកចម្រើន។
លោក Janes Imanuel Ginting នាយកប្រចាំប្រទេស របស់អង្គការទស្សនៈពិភពលោកកម្ពុជា បានថ្លែងថា អស់រយៈពេលជាងប្រាំទសវត្សរ៍មកហើយ ដែលអង្គការទស្សនៈពិភពលោកបានធ្វើការជាមួយសហគមន៍មូលដ្ឋាន និងដៃគូនានា ដើម្បីផ្លាស់ប្តូរជីវិតរបស់កុមារ និងក្រុមគ្រួសាររបស់ពួកគេ។
លោក Ginting បានថ្លែងថា៖ «បេសកកម្មរបស់យើង «ដើម្បីកុមារគ្រប់រូប មានជីវិតពេញបរិបូណ៍» បានជំរុញកិច្ចខិតខំប្រឹងប្រែងរបស់យើងដើម្បីបង្កើតការផ្លាស់ប្តូរប្រកបដោយនិរន្ដរភាព»។
សិក្ខាសាលាបានផ្តល់វេទិកាមួយដើម្បីពិនិត្យមើលវឌ្ឍនភាពនូវការអនុវត្ដយុទ្ធសាស្ត្រពាក់កណ្ដាលផ្លូវ។ ដោយបានទៅដល់កុមារជាង ៣ លាននាក់រួចហើយនៅទូទាំង ២០ ខេត្ត រួមទាំងទីក្រុងភ្នំពេញ អង្គការទស្សនៈពិភពលោកបានបង្ហាញពីសមិទ្ធផលសំខាន់ៗ ខណៈពេលដែលកំពុងស្វែងរកធាតុចូលអំពីរបៀបបង្កើនឥទ្ធិពលក្នុងឆ្នាំខាងមុខ។
ចាប់ផ្តើមនៅឆ្នាំ ២០២៣ យុទ្ធសាស្ត្រនេះមានគោលបំណងផ្ដល់ជំនួយដល់កុមារ ៥ លាននាក់នៅត្រឹមឆ្នាំ ២០២៧ ហើយពេលនេះបានឈានដល់កុមារជាង ៣ លាននាក់រួចហើយ។ រូបថត សហការី
យោងតាមអង្គការទស្សនៈពិភពលោកថា៖ «កុមារជាង ១៩៧០០០ នាក់បានទទួលការអប់រំប្រកបដោយគុណភាព និងប្រកបដោយបរិយាប័ន្ន ដោយជំនៈរនាំងភាពក្រីក្រ និងរនាំងដែលមិនត្រូវបានគេរាប់បញ្ចូល»។
កម្មវិធីការពារកុមាររបស់អង្គការបានការពារកុមារចំនួន ២៩៥០០០ នាក់ពីអំពើហិង្សា ការកេងប្រវ័ញ្ច និងការធ្វេសប្រហែស។ តាមរយៈគម្រោងផ្សេងៗ អង្គការបានបង្កើតបរិយាកាសប្រកបដោយសុវត្ថិភាពសម្រាប់កុមារ ដើម្បីលើកកម្ពស់សុខុមាលភាព និងការអភិវឌ្ឍរបស់ពួកគេ។ភាពធន់នឹងសេដ្ឋកិច្ចគឺជាមូលដ្ឋានគ្រឹះមួយទៀតនៃយុទ្ធសាស្ត្រ។
អង្គការនេះបានគាំទ្រសហគ្រិនចំនួន ២៦០០ នាក់ បណ្តុះបណ្តាលកសិករចំនួន ២៦០០ នាក់ក្នុងបច្ចេកទេសកសិកម្មឆ្លាតវៃ បន្សាំនឹងបម្រែបម្រួលអាកាសធាតុ និងផ្តល់ឱ្យគ្រួសារដែលងាយរងគ្រោះចំនួន ៥៦០០ នូវលទ្ធភាពទទួលបានសេវាហិរញ្ញវត្ថុតាមរយៈក្រុមសន្សំ។
កិច្ចខិតខំប្រឹងប្រែងទាំងនេះបានបំពាក់គ្រួសារជាមួយនឹងឧបករណ៍ដើម្បីកសាងជីវភាពរស់នៅប្រកបដោយនិរន្តរភាព និងបំបែកវដ្តនៃភាពក្រីក្រ។
លោក ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប បានទទួលស្គាល់សមិទ្ធផលនេះ។
លោកបានលើកឡើងពីតួនាទីក្នុងការពង្រឹងគណនេយ្យភាពសង្គមតាមរយៈគំនិតផ្តួចផ្តើម ដូចជា ការអនុវត្តគម្រោងក្របខ័ណ្ឌគណនេយ្យភាពសង្គម (ISAF) ជាដើម។
លោក សុធា បានថ្លែងថា៖ «ជាផ្នែកមួយនៃការគាំទ្រជាបន្តបន្ទាប់សម្រាប់កំណែទម្រង់វិមជ្ឈការ និងវិសហមជ្ឈការ ដៃគូអភិវឌ្ឍន៍ និងអង្គការសង្គមស៊ីវិលត្រូវបានលើកទឹកចិត្តឱ្យរៀបចំផែនការយុទ្ធសាស្ត្រ និងសកម្មភាពថវិការបស់ខ្លួន»។
លោកបានបន្ដថា៖ «នេះរួមបញ្ចូលទាំងការគាំទ្រដល់ការរៀបចំ និងការអនុវត្តផែនការសកម្មភាព និងថវិកាប្រចាំឆ្នាំរបស់ គ.ជ.អ.ប ក៏ដូចជាការរួមចំណែកដល់ការអភិវឌ្ឍន៍ផែនការអនុវត្តរយៈពេលប្រាំឆ្នាំទីពីរ ដែលលេខាធិការដ្ឋាន គ.ជ.អ.ប គ្រោងនឹងរៀបចំនៅឆ្នាំ២០២៥»។
លោកស្រី Terry Ferrari ថ្នាក់ដឹកនាំអង្គការទស្សនៈពិភពលោកប្រចាំតំបន់អាស៊ីខាងកើត និងលោក ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប ក្នុងសិក្ខាសាលាពិគ្រោះយោបល់ដែលធ្វើឡើងនៅរាជធានីភ្នំពេញកាលពីថ្ងៃទី១៦ ខែមករា។ រូបថត សហការី
នៅពេលដែលឈានចូលដល់ពាក់កណ្តាលផ្លូវនៃយុទ្ធសាស្ត្ររយៈពេលប្រាំឆ្នាំ អង្គការនេះនៅតែផ្តោតលើការពង្រីកឥទ្ធិពលរបស់ខ្លួន។
គោលដៅនៃការឈានដល់កុមារចំនួន ៥ លាននាក់នៅឆ្នាំ ២០២៧ ទាមទារមិនត្រឹមតែការបន្តការយកចិត្តទុកដាក់ប៉ុណ្ណោះទេ ប៉ុន្តែក៏មានយុទ្ធសាស្ត្រសម្របខ្លួនដើម្បីដោះស្រាយបញ្ហាប្រឈមដែលកំពុងកើតមានផងដែរ។
លោកស្រី Terry Ferrari ថ្នាក់ដឹកនាំអង្គការទស្សនៈពិភពលោកប្រចាំតំបន់អាស៊ីខាងកើត បានអំពាវនាវឱ្យមានកិច្ចខិតខំប្រឹងប្រែងធ្វើសកម្មភាពក្នុងអំឡុងពេលវគ្គបិទសិក្ខាសាលា។
លោកស្រីបាននិយាយថា៖ «វានឹងត្រូវការយើងទាំងអស់គ្នារួមគ្នា ដើម្បីធានាថា គ្មានកុមារណាម្នាក់ត្រូវបានគេទុកចោលឡើយ និងដើម្បីកុមារគ្រប់រូបមានឱកាសរីកចម្រើន»។
លោកស្រី Ferrari បានសង្កត់ធ្ងន់លើការទទួលខុសត្រូវរួម និងតម្រូវការសម្រាប់កិច្ចសហការរវាងរដ្ឋាភិបាល អង្គការក្រៅរដ្ឋាភិបាល និងវិស័យឯកជន ដើម្បីជំរុញការផ្លាស់ប្តូរប្រកបដោយនិរន្តរភាពសម្រាប់កុមារកម្ពុជា៕
