គំរូ នៃការស្នើសុំចុះបញ្ជី នូវផ្លាកលេខ ពិសេសផ្ទាល់ខ្លួនសម្រាប់រថយន្ដ ដែលត្រូវបានដាក់ឱ្យដំណើរការនាពេលកន្លងមក។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូនគម្រោងនឹងផ្តល់សេវាចុះបញ្ជីផ្លាកលេខពិសេសផ្ទាល់ខ្លួនសម្រាប់ម៉ូតូ នាពេលឆាប់ៗ នៅក្នុងឆ្នាំ២០២៥នេះ។ នេះជាយន្តការមួយ រួមចំណែកក្នុងការរបង្កើន និងប្រមូលចំណូលថវិកាជូនរដ្ឋ ក៏ដូចជា ការបង្ខិតសេវាឱ្យកាន់តែកៀក និងផ្តល់ជម្រើសបន្ថែមទៀតដល់ពលរដ្ឋផងដែរ។
អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន លោក ផន រឹមបានឱ្យដឹងថា៖«ឆាប់ៗខាងមុខនេះ យើងនឹងមានសេវាចុះបញ្ជីផ្លាកលេខពិសេសផ្ទាល់ខ្លួន សម្រាប់ទោចក្រយានយន្ត(ម៉ូតូ)»។
សេវាចុះបញ្ជីថ្មី ដែលដើម្បីបំរើតម្រូវការរបស់ប្រជាពលរដ្ឋនេះ គម្រោងនឹងធ្វើឡើង បន្ទាប់ពីសាធារណជនមានការគាំទ្រ និងប្រើប្រាស់ជាច្រើន នូវសេវាចុះបញ្ជីផ្លាកលេខពិសេស និងផ្ទាល់ខ្លួនសម្រាប់រថយន្ត។
ក្នុងនៅឆ្នាំ២០២៤ ក្រសួងសាធារណការ បានចុះបញ្ជីរថយន្តបំពាក់ផ្លាកលេខពិសេស និងលេខពិសេសផ្ទាល់ខ្លួនចំនួន ៣០ ៣៧១គ្រឿង ដែលផ្តល់ចំណូលបានសរុបប្រមាណជាង១៨លានដុល្លារ។ ចំនួននេះ មានការកើនឡើងបើធៀបនឹងឆ្នាំ២០២៣។
ក្រសួងបានឱ្យដឹងថា ការរៀបចំជាប្រភេទផ្លាកលេខ ដែលចុះតាមលេខរៀងគឺមានតំាងពីសម័យសង្គមរាស្រ្តនិយម ប៉ុន្តែតាមការអភិវឌ្ឍសង្គម និងដោយមើលនូវតម្រូវការជាក់ស្តែងរបស់ប្រជាពលរដ្ឋ នៅឆ្នំា២០១៧ ក្រសួងបានរៀបចំឱ្យមានការលក់លេខពិសេស ដែលអនុញ្ញាតឱ្យមានការផ្លោះស៊េរីលេខ ចុះបញ្ជី ព្រមទំាងការជ្រើសរើសលេខល្អ លេខសំណាង។
ក្រោយមកនៅឆ្នាំ២០២០ ក្រសួងក៏បាន រៀបចំឱ្យមានការលក់លេខចុះបញ្ជីពិសេសផ្ទាល់ខ្លួនបន្ថែមទៀត ដែលជាគំនិតច្នៃប្រឌិតមួយថ្មី និងជាការ ផ្តល់ជម្រើសដល់អ្នកប្រើប្រាស់បន្ថែមទៀត។ ប្រជាពលរដ្ឋមានសិទ្ធិអាចជ្រើសលេខចុះបញ្ជី ពិសេសផ្ទាល់ខ្លួនណាមួយ ដែលខ្លួនពេញចិត្តសម្រាប់ចុះបញ្ជីបំពាក់លើរថយន្តរបស់ខ្លួនបាន។
លេខចុះបញ្ជីនេះ អាចដាក់ជាឈ្មោះរបស់ខ្លួន ឬអាចជាបង្គុំមានជាលេខ ឬ ជាអក្សរឡាតាំង តែមិនឱ្យលើសពី៨ខ្ទង់។ ប៉ុន្តែ ក្រសួងមិនអនុញ្ញាត ចំពោះការបង្គុំលេខចុះបញ្ជីណា ដែលមានអត្ថន័យ ឬសូរស័ព្ទដែលប៉ះពាល់ដល់សណ្តាប់ធ្នាប់សាធារណៈ ឬឈ្មោះទីកន្លែង ប្រវត្តិសាស្រ្តនោះឡើយ។
ការរៀបចំនេះក៏បានអនុញ្ញាតឱ្យម្ចាស់កម្មសិទ្ធិលេខចុះបញ្ជីមានសិទ្ធិរក្សាទុកលេខ ចុះបញ្ជីរបស់ខ្លួនសម្រាប់ចុះបញ្ជីបំពាក់លើរថយន្តរបស់ខ្លួន ដែលមិនទាន់ចុះបញ្ជីមួយផ្សេងទៀតបាន។
ការដាក់ឱ្យដំណើរការការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ដ ក្នុងគោលបំណងផ្តល់ជម្រើសដល់ប្រជាពលរដ្ឋ ដែលមានលទ្ធភាពអាចជ្រើសរើសផ្លាកលេខ ដែលមានលក្ខណៈពិសេស អាចកម្ម៉ង់តាមការពេញចិត្ត ព្រមទាំងជួយសម្រួលដល់នីតិវិធី នៃការប្រមូលពន្ធថែមទៀតផង។
ភ្នំពេញប៉ុស្តិ៍ពុំទាន់អាចសុំអត្ថាធិប្បាយបន្ថែម ពីគម្រោងផ្តល់សេវាចុះបញ្ជីថ្មីនេះ ពីលោកផន រឹមបាននៅឡើយនោះទេ។ការប្រកាសពីការផ្តល់សេវាចុះបញ្ជីថ្មីនេះ ធ្វើឡើង ក្នុងពេលដែល ក្រសួងសាធារណការកំពុងតែធ្វើសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ រយៈពេល២ថ្ងៃ គឺថ្ងៃទី២២ ដល់ទី២៣ ខែមករានេះ។
ពិធីនេះធ្វើឡើង ដើម្បីពិភាក្សា និងពិនិត្យវាយតម្លៃឡើងវិញរួមគ្នា លើវឌ្ឍនភាពការងាររបស់វិស័យសាធារណការ និងដឹកជញ្ជូន ដែលក្រសួងសម្រេចបានក្នុងរយៈ ពេលមួយឆ្នាំកន្លងទៅ ក៏ដូចជាពិភាក្សាពីបញ្ហាប្រឈមនានា និងលើកទិសដៅការងារសម្រាប់ឆ្នាំ២០២៥។ ក្រសួងបានឱ្យដឹងថា លោកនាយករដ្ឋមន្រ្តី ហ៊ុន ម៉ាណែតនឹងធ្វើជាអធិបតី បិទសន្និបាតប្រចាំឆ្នាំនេះ៕
